Read turkana Yeremia 37 Bible Online

Yeremia 37 - turkana bible

Yeremia 37

¹Abu ekapolon a Babilonia lo anyaritae Nebukadinesa kitiliwo Sedekia lo arai lokookeng a Yosia ekapolon, kilunyok nados a Yeoyakin arai lokookeng a Yeoyakim.

² Nakaneni Sedekia ka ngikarikok a arieng keng luche ka ngitunga a akwap kangina, apot nyiirasi ngakiro nakolong alimuni Ekapolon Akuj kisitoru nikang a ekadwaran Yeremia.

³Tomeu ekapolon Sedekia ngitunga lugu nikang, Yeukal lokookeng a Chelemia, ka emuron a Akuj Sepania lokookeng a Maaseya. Pot kesi nikang tamasi, “Kilip kare Ekapolon Akuj na erai Akuj yok, kilipak akwap yok.”

⁴Aringa ayong atoronor alotunga kainyo aringa nyeenikina lojela.

⁵Eriamito ngasigerea a Babilonia Yerusalem. Ani iirarete kesi atamar eponito ngajorei a Parao alo a Misiri elama ekukuor kech, apot Ngibabiloniae tobongosi naabor.

⁶Abu Ekapolon Akuj katolimok ayong akiroit

⁷atamar atolimok Sedekia kona, “Ebala Ekapolon Akuj na erai Akuj a Isirael, ebunit ajore a Ngimisiri akingarakin iyong, nakaneni ebongete nakwap kech.

⁸Ebongunete Ngibabiloniae toremo ere, tolemasi sodi kichunyakis akim.

⁹Ayong Ekapolon Akuj kechikichiki esi atamar nyiingalasi make ibalasi kori nyebongunete Ngibabiloniae, kainyo ebongunete.

¹⁰Tani kidwang esi ajore daang a Ngibabiloniae alu ijiete ka esi, toliworos ngikiliok lu ewanan make kesi eperete aloeman kech, enyounete kesi kichunyakis ere logo akim.”

¹¹Tobongo ajore a Ngibabiloniae alo Yerusalem kainyo abu ajore a Misiri taapuu.

¹²Sodi atonyou ayong alo Yeremia alo Yerusalem, atolot nakwap a Benjamen akirum ekimar a awi kosi kaina.

¹³Ani anangi ayong lokidor a Benjamen, ketowo ekapolon a ngasigerea ana eteete ekidor ngolo. Arai ekiro keng Irija, lokookeng a Chelemia, tarai etatait a Anania. Tama Irija, “Isaki iyong alosit nia Ngibabilonia!”

¹⁴Atatachak atama, “Mam jik! Nyalosi ayong nikech.” Nakaneni nyiirara Irija ngakiro kang. Kerum ngesi ayong katoriko lokarikok.

¹⁵Katongoikis kesi ayong, todungokis ngitunga atamar kebungata ayong ani erumor katoinikis kai a Yonasan, alo erai ekegiran anitubet ekies. Apon akai a Yonasan kitiliworoe ni eananakinio ngitunga.

¹⁶Kewaakin ayong lojela lo ayei tooma nalup, eboi kaneni nikooyen.

¹⁷Ani enangi ngirwa ngiche, katanyaraa ekapolon Sedekia nawi keng kengit kirukit ka ngesi bon tama, “Eyei akiroit adio a Ekapolon Akuj eyei a?” Atatachu ayong atama, “Eyei. Kirikorio iyong lokapolon a Babilonia.”

¹⁸Sodi engit ayong ngesi atama, “Nyo kasechakinit ayong iyong ka ngikarikok luche ta ngitunga lugu, kainikinitere ayong lojela?

¹⁹Nyaalu ngikadwarak kon lukolong abalasi iyong, ‘Ekapolon a Babilonia a, nyikitijikini iyong ka akwap kon’?

²⁰Kiira kare tokona ngakiro kang, kamaimai iyong, ekapolon loketimon. Nyikibua ayong lojela lo a awi a Yonasan. Ani kibua iyong ayong neni, atoanikini ayong neni.”

²¹Todung ekapolon Sedekia atamar nyekabuar ayong lojela lo alotooma ngalup, pearai katoikin lojela lo a akai a ekapolon. Eboikin ayong neni, toliwor akolongit daang kainunio amugati tanang na adaunotor ngamugati alore.