Read turkana Yeremia 38 Bible Online

Yeremia 38 - turkana bible

Yeremia 38

¹Chepatia lokookeng a Matan, ka Gedalia lokookeng a Pachur, ka Yeukal lokookeng a Chelemia ta Pachur lokookeng a Malikia, apot keirasi ayong alimonokini ngitunga

²atamar ebala Ekapolon Akuj kona, “Itwaan cha daang ni idongi lore, eari akwara, ka akoro ta edeke. Nakaneni itwaan cha daang ni idongi sodi tolot nia Ngibabiloniae, eyari. Ikokini ngesi itwaan ni angatar, kimiekinae toyar.”

³Atolimok ayong kesi nabo atamar ebala Ekapolon Akuj kona, “Epotori ayong ere logo ainak ajore a Babilonia tolemasi.”

⁴Apot ngikarikok luche a arieng toloto nia ekapolon tamasi, “Ejoikinit itwaan en etoani, kainyo ekiruor lo tokona iruoro ngesi logo, esuri ngitai a ngasigerea ka lua ngitunga kadaang alu idongito lore logo. Nyesaki ngesi akingarakin ngitunga, esaki akiwan.”

⁵Tatachu ekapolon Sedekia tama, “Itemokino nguna, eraakasi ngakiro keng ngaka akiding kus, tosubeta ngesi daang nacha isakete esi. Nyapedori ayong akiratakin esi.”

⁶Sodi kirumut kesi Yeremia, kiyoolikis a ngaunoi kare a Malikia, alo arai lokookeng a ekapolon. Ayei akar ngina diyete akai a ekapolon. Amam ngakipi ayakasi kare ngina, echoto bon ayei. Kiilor Yeremia lochoto.

⁷Ayei itwaan ni anyaritae Ebedimelek ni agelemitae, tarai ika akwap a Kuch.*g** Asubi ngesi etich alokai a ekapolon. Kiira ngesi atamar achakakin Yeremia nakar. Esaa ngolo, ebooyi ekapolon alokidor a Benjamen.

⁸Tolot Ebedimelek ni ebooyo ekapolon sodi tolimok tama,

⁹“Ekapolon loketimon, esubito ngitunga lugu naaronok ani achakakineta ekadwaran Yeremia nakar ni edikino akoro earea, kainyo emam akimuj eringa idongit lore.”

¹⁰Abu ekapolon todungok Ebedimelek tama, “Kirukosi ka ngitunga nguuni, kiriut ekadwaran Yeremia anakar eringa nyetoana.”

¹¹Abu Ebedimelek kirukosi ka ngitunga ngulu tolomasi lokeru a akai a ekapolon, tolemut ngawarui nachilichila ka ngiworui lu adaudauna kiyoolikis Yeremia alotooma akar, a ngaunoi.

¹²Tolimok Ebedimelek Yeremia tama, “Tongichak ngawarui nachilichila nugu nakirididea, kidokok ngaunoi alokidiama.” Abu Yeremia kikok neni.

¹³Kiriut kesi Yeremia a ngaunoi, kiriut nikalapatan. Kiboi Yeremia analaar ana ebooyoto ngiketeok akai a ekapolon.

¹⁴Akolongit ache, tomeu Sedekia itwaan anyarare ayong. Eriamariama ka ngesi lokidor lo a nguuni a akai a Akuj. Katolimok Sedekia ayong tama, “Asaki ayong akingit iyong akiroit, nakaneni wara nyikimunon akiroit tani apei.”

¹⁵Atatachak ayong ngesi atama, “Ani pekemunon ayong iyong akiroit tani apei, kiari iyong ayong. Nabo ani kalimok ayong iyong ngakiro na echamit isubakini, nyiirari iyong.”

¹⁶Abu ekapolon kikong erai ayong bon kirukit ka ngesi tama, “Ekong jik tani Akuj na eyari, nakolong asubi ngitai yok, nyakaari ayong iyong kori nyekepotori kainak ngitunga lu esakete akiar iyong.”

¹⁷Sodi atolimok ayong Sedekia atama, “Ekapolon Akuj Namerikanyer na erai Akuj a Isirael, ebala, ‘Ani kiwou iyong akitijwore ngikapolok a arieng a Babilonia, emam itwaan kiari iyong. Emam itwaan inomi ere logo, nabo iyarete iyong ka ngitunga a awi kon.

¹⁸Nakaneni ani pekijala iyong tolot lokarikok a Babilonia, ipotorio ere logo nakinae Ngibabiloniae, kichunyakis akim. Engopi iyong kona ibuchar.’ ”

¹⁹Abu ekapolon Sedekia katolimok ayong tama, “Aemit ayong Ngisirael lukolong alot nia Ngibabiloniae. Epedorio ayong arikor nikech katoboliatar.”

²⁰Atolimok ayong ngesi atama, “Nyikirikorio iyong nikech. Kiwapak tokona akiroit a Ekapolon Akuj kotere ngakiro nakalimok ayong iyong. Ejokearosi ngakiro anikon, toyuun iyong.

²¹Nakaneni kedodik ayong Ekapolon Akuj akisingolikinet a ngakiro ana esubakinosi erai pekijal iyong ejie.

²²Anakisingolikinet kangina, engolik ayong ngaberu daang nakolong aisikinitae alokai a ekapolon a Yuda erikoritae lokarikok a arieng a Babilonia, ebalasi, ‘Ekapolon, kingalata iyong talopae kon lu emunoi, kidwang kesi iyong. Ani kona epokea ngakejen kon alochoto, kiisikis kesi iyong.’ ”

²³Abu ayong eatak atama, “Erikorio ngaberu kon daang ka ngide nia Ngibabiloniae. Nyibuchar tani iyong ilope anikech. Kiriki esi ekapolon a Babilonia, sodi kinomae ere logo.”

²⁴Katolimok Sedekia ayong tama, “Wara itwaan tani ipei nyeeyen atamar kiruor ayong ka iyong ngakiro nugu, nakaneni nyitoani iyong.

²⁵Ani kiirasi ngikarikok a arieng atamar kiruor ayong ka iyong, epote kingita iyong ebalasi, ‘Tolimokinae sua ngakiro na ianete iyong ka ekapolon. Ani kilimok iyong sua ngakiro daang, nyimunono tani apei, nyikiari sua iyong.’

²⁶Tolimok kesi atamar kimaimai iyong ayong ibala nyakabua lojela lo a awi a Yonasan totoan kaina.”

²⁷Apot ngikarikok a arieng daang pot akingitanar ayong ngakiro, atatachak ayong kesi loger losek kalimokinitor ekapolon. Tasalu ekiruor kang ka kesi kaneni, kainyo emam itwaan iche abu kiira ekiruor kang ka ekapolon.

²⁸ Kemiekin ayong ebooyi analaar a akai a ekapolon tanang akolongit na alemarere Yerusalem.