Read turkana Yeremia 39 Bible Online

Yeremia 39 - turkana bible

Yeremia 39

¹Elap lo a ngitomon a ekaru alo ngikan-koomwon alo araakar Sedekia ekapolon a Yuda, tangau ekapolon a Babilonia lo anyaritae Nebukadinesa ajore keng daang torem Yerusalem.

²Akolongit na ngakan-koomwon a elap alo a nguomwon a ekaru alo a ngitomon ka epei alo araakar Sedekia ekapolon, apon awas a Yerusalem tobwangae. (

³Ani elemario Yerusalem, pot ngikarikok daang a arieng a Babilonia kiboikinos lokidor lo alokiding. Ngikarikok ngulu kesi ta Nerigal Sareser, ka Samigar Nebo, ka Sarisekim ta Nerigal Sareser eche.)[23]

⁴Ani ingolikinete ekapolon Sedekia ka ngasigerea keng daang ngakiro na asubakinosi, apot tasaka akisii alore nakwaare. Torotokis kitoro lorot lo a amana a ekapolon, kitoro lorot lo imorikinit ngawasea naarei, tosiwa toloto lowae a adipo a Yorudan.

⁵Nakaneni kirit ajore a Ngibabiloniae kesi, kirumut Sedekia anaroatin ana ayakasi diyete Yeriko. Torikoe Sedekia nia Nebukadinesa, alo ayei Ribila, nakwap anyaritae Amas. Kirira Nebukadinesa ngesi kaneni.

⁶Taar ekapolon a Babilonia talokookeng a Sedekia itee apakech. Abu taar tani ngikapolok a Yuda.

⁷Ani erumor tolim atamar topuyokinae ngakonyen a Sedekia, sodi toenae a ngiriko torikoroe Babilonia.

⁸Apot Ngibabiloniae kinoma akai a ekapolon a Yuda ka ngakais a ngitunga ka aukor ngawasea a Yerusalem.

⁹Esal kanguna kadaang, Nebusaradan lo arai ekarikon a ngasigerea, abu toriko ngitunga daang Babilonia tarata ngirikon. Ngitunga ngulu kesi lusek edongito lore, erukito ka lu esiaunete tosiwa, toloto Babilonia.

¹⁰Kimiek ngesi alo Yuda ngitunga ngiche lu eboosit, nak kesi ngamanat a ngimusabib ka ngamanat nache.

¹¹Abu ekapolon Nebukadinesa todungok ekarikon a ngasigerea lo anyaritae Nebusaradan, tama,

¹²“Kape tasaka Yeremia tosubea ngesi naajokak. Nyiiwan ngesi, nakaneni tosubea ngakiro daang nache esaki ngesi.”

¹³Apot Nebusaradan ka ngikapolok lu anyaritae Nebuchasiban ka Nerigal Sareser ta ngikapolok luche a arieng a Babilonia

¹⁴katorikut ayong nalaar a akai a ekapolon. Kerumakis ayong Gedalia, lokookeng a Aikam, tarai etatait a Chapan. Gedalia keteni ayong atanang nawi akaalimon. Sodi atolom ni alomito ngitunga luche.

¹⁵Abu Ekapolon Akuj tolimok Yeremia akiroit na ayakar nalaar a akai a ekapolon. Abala akiroit ngina,

¹⁶“Kape tolimok Ebedimelek lo a akwap a Kuch atamar Alimu Akuj Namerikanyer, na erai Akuj a Isirael ebala, ‘Kingolik a, eyookini ayong ngakiro nakolong abala asubakini alore kalo, ngakiro naaronok, meere naajokak. Esubakinio ngakiro nguna itee iyong.

¹⁷Nakaneni kayuuni ayong Ekapolon Akuj iyong akolongit ngina. Nyikipotorio iyong lotunga lu iemit iyong.

¹⁸Keyoki ayong iyong nyikiar akwara. Isii iyong iyari, kainyo kigieno iyong ayong. Ayong Ekapolon Akuj alimu nguna.’ ”