Read turkana Yeremia 4 Bible Online

Yeremia 4 - turkana bible

Yeremia 4

¹Ebala Ekapolon Akuj kona, “Ayoro Isirael, ani kibongu iyong, Ani kibongu iyong nikang, Ani kichaka iyong ngakujo nakikadakinete alongaren kang, nyiiliwor imatamata ananupit kon,

² Ani kikong iyong a ekiro kang kotere iteni ka ngakiro na eriyan ka ateneanut, apiari ayong ngibukui, kepuruut kesi ayong.”

³Elimokinit Ekapolon Akuj ngitunga a Yuda ka lu elomito Yerusalem ebala, “Tochila ngamanat kus nakitet. Nyiitakis ngikinyam kus lookwa.

⁴Esi ngitunga a Yuda ka lu ilomito Yerusalem. Kitaleunos ani a Ekapolon Akuj kikokis itwaan ni ilengeritae. Tolemasi naaronok alotai kus loger a itwaan ani epachar amuny. Ani pekikokis esi neni, erirauni anyunyura kang loger a akim, kitonom esi tongop ekitudungee, kotere ngakiro naaronok isubete esi.”

⁵“Tolimosi, kiremasi alo Yuda ka Yerusalem. Tarama elii awadaang anakwap. Kiremasi tamasi, ‘Tochunakinos wapei! Tamataros lorerea lu a ngawasea!

⁶Kikeasi abendera a ejie kingolia Sion, tamataros toyara, nyiimamakis. Eyaunit Ekapolon Akuj ngakiro naaronok, ngakiro naaronok na itorunito kwap.

⁷Eger a engatuny alo elomunit ani edukitor iwapit ekenyasunan a ngibukui erot. Ebunit ngesi akinyasun Yuda. Idongete ngirerea a Yuda eraakasi asakatan, emam itwaan elomi neni.

⁸Tokona bocha, tanap egunia, kigor tokunuak, kainyo eringa anyunyura a Ekapolon Akuj nyerotokino ani a Yuda.’ ”

⁹Ebala Ekapolon Akuj, “Akolongit ngina, ipirisaarosi ngitai a ngikapolok ka ngikarikok. Eriangakinosi ngimurok a Akuj, kuumwokis ngikadwarak.”

¹⁰Abu ayong atama, “Wae Ekapolon lo irai Ekapolon Akuj, ingala iyong dir ngitunga a ere a Yerusalem! Ilimokini iyong kesi atamar emini ekisil, tarai itubuikinitae ekileng lodokolei kech.”

¹¹Ngirwa ngulu elimokinio ngitunga a ere a Yerusalem tamarae, “Ekutunit ekuwam lo iwari niamonan anariet, ekutunit lotunga kang. Meere ekuwam ngolo lo ekutari ngatunyeny make,

¹²pearai eliwor loationon lo ebunit anikang! Ayong Ekapolon Akuj alemunit eriras alotunga kang.”

¹³Kingolik a, ebunit emoit loger a ngidowon. Ngaurukukui keng a ejie, ikote ekuwam lo ipiripiri, epiraka ngangolei kech idwangito ngigolei. Oitiakoi! Abe etioko nginyas kianyuni ngoni!

¹⁴Yerusalem, kilota naaronok alotau minio kona iyuunor. Itami iyong naaronok tanang wori?

¹⁵Iruoro itwaan alore a Dan elimorit nginyas a ngimukur a Epiraim.

¹⁶Ikilakinit ngibukui, elimokinit Yerusalem atamar eponito ngikaremok anakwap anaalonan, esakete akitijikin ngirerea a Yuda.

¹⁷Irikaunito Yerusalem loger a ngitunga alu iteete ngamanat, kainyo angero ngitunga a Yerusalem Ekapolon Akuj. Alimu Ekapolon Akuj nguna.

¹⁸Iyong Yuda inyarakin nugu daang, kotere eboyor kon ka ngakiro na isubi iyong. Akisech kon ayau ariaba nakaapilan naga. Kichum iyong apedor tooma lotau.

¹⁹Kapipilikinit! Nyanaikini ayong nikaapilan! Oitiakoi kare etau kang! Erono eger lo edoununio etau kang. Nyapedori ayong akililing. Apupi ayong ngaburucho ka elii a ejie.

²⁰Etupasi nginyas. Edong akwap daang erai auyongorot. Inyasun ngieman atipei. Achilichilaar ngawarui kech.

²¹Etee ayong ngabenderae a ejie tanang wori? Apupi elii a ejie tanang wori?

²²Ebala Ekapolon Akuj kona, “Ebangaaka ngitunga kang, Nyakayenete ayong. Ikote kesi ngide lubaang, emam ibore eyenete. Eyenikinitae kesi kotere akisub naaronok, nakaneni nyeyenete akisub naajokak.”

²³Engolikini ayong akwap erai alaireng. Engolik adis emam akicha.

²⁴Engolik ngimoru, erikirikete, ani ngimukur iriangariangasi.

²⁵Engolik akwap, atoriam emam itwaan. Kepot ngikieny daang toporosi.

²⁶Engolik akwap naketurupan ngikinyam atoriam keliwor ariet. Kinyasun ngirerea keng kotere anyunyura naaronon a Ekapolon Akuj. (

²⁷Kainyo ebala Ekapolon Akuj kona, “Eliwor akwap daang alaireng, nakaneni nyenyasuni ayong lokojokon.)

²⁸Kotere nguna, igoro akwap, toribok adis. Kainyo alimu ayong, nabo nyelochi nguna etamit. Atiaku ayong, nyabongi akamaluwot.

²⁹Ani iirario echale alu edokito ngangolei, ka lu ekodito ngimalea a amod, ipungar itwaan daang. Ematarosi ngiche namoni, edokete ngiche ngatabab. Idongi ere ibooyi kongin, emam itwaan elomi neni.

³⁰Yerusalem, erokearosi ngakiro ianyuni iyong. Nyo ieritor iyong? Nyo inapitor iyong asir a egolit, kitunguranite ngakonyen a emunyen? Isirit iyong pas! Kingero iyong ngiminan kon. Esakete akiar iyong.

³¹Eirari ayong akigoro na ikoni na aberu ana eriaba, ikoni na aberu ana egearit akidoun. Arai Yerusalem isileki akianga, ibaarit akan keng ebala ‘Oitiakoi kare! Eponito akiar ayong!’ ”