Read turkana Yeremia 40 Bible Online

Yeremia 40 - turkana bible

Yeremia 40

¹Abu Ekapolon Akuj katolimok ayong Yeremia akiroit na kalachakinea Nebusaradan lo arai ekarikon a ngasigerea alo Rama. Karikio kolong ayong inaa kaenitae a ngiriko, erukito ka ngitunga luche lu arikunio alo Yerusalem ka Yuda. Arikoritae ngitunga ngulu Babilonia eraakasi ngirikon.

²Katachada ayong ekarikon a ngasigerea nikang bon, tolim tama, “Ekapolon Akuj na erai Akuj kon, alimuni kolong atamar enyasuni akwap naga.

³Asubaki tokona ngesi ngakiro nakolong abala asubakini. Ani kona kolong isechakineta esi Ekapolon Akuj towout akiirar ngakiro keng, asubakin nugu anikus.

⁴Kingolik tokona, alachakini ayong ngiriko anakan kon, katalakak iyong tolot. Ani kisaki iyong akirukor ka ayong Babilonia, emam ngakiro, kariki ayong iyong. Ani pekisaki iyong akirukor ka ayong, emam ngakiro. Kingolik a, eyei akwap naga daang etia ni etia ngaren kon. Kape lowae locha kijoikini iyong.”

⁵Ani awouni ayong akitach ngakiro keng,[24] tolim Nebusaradan tama, “Tobongo nia Gedalia, lokookeng a Aikam, tarai etatait a Chapan, lo etiliwo ekapolon a Babilonia ekarikon a ngirerea a Yuda. Ipedori iyong akiruk ka ngesi kiboi alokiding ngitunga, kori ipedori iyong alosit wadaang nicha isaki.” Abu ekarikon a ngasigerea kainak ayong akimuj ka ainakinet, ani erumor kemiek atolot.

⁶Atolot ayong nia Gedalia lokookeng a Aikam lo ayei Misipa. Tolom Yeremia kiding ngitunga lu edongito nakwap ngina.

⁷Ayakasi ngikapolok a Yuda ka ngasigerea ngache na apot towout akisil. Kiirasi kesi atamar aseu ekapolon a Babilonia Gedalia aliwor ekapolon a ewae kangolo, toweik ngitunga daang lukolong edongete na arikere luche Babilonia. Araakasi ngitunga ngulu lu eboosit anakwap.

⁸Tonyout Ichimael lokookeng a Nesania, ka Yoanan lokookeng a Karea, ka Seraya lokookeng a Taniumes, ka talokookeng a Epai lu eponito alo Netopa ta Yesania lo ebunit alo Maaka, toloto ka ngitunga kech nia Gedalia alo Misipa.

⁹Tolimok Gedalia kesi ikongi tama, “Nyieam akisil ka Ngibabiloniae. Toloma nakwap naga tosuba etich a ekapolon a Babilonia, nakaneni ejokearosi ngakiro daang anikus.

¹⁰Alomi ayong elope Misipa atoliwor ekaweikinan kus na eponeta Ngibabiloniae nege. Nakaneni ani eliwor esi, ipedorete akilem ka akidiatakin emuna, ka ageor ta akimiet kiboyoto anadakarin ana ilomito esi.”

¹¹Ngirwa lupei ngulu, apot Ngisirael daang lu alomito Moab, ka Amon, ka Edom ta ngakwapea nache kiirasi atamar abu ekapolon a Yuda kimiek ngitunga ngiche idongete Yuda. Kiirasi nabo dang atamar etiliwo ngesi Gedalia ekapolon kech.

¹² Tochunun kesi daang anakwapea ana kolong apetakina, tobongosi Yuda. Pot nia Gedalia alo Misipa, togerut ageor nakaalan ka emuna.

¹³Ekisidi kanguna, apot Yoanan lokookeng a Karea ka ngikarikok a ngasigerea anasek awounete akisil, toloto nia Gedalia alo Misipa

¹⁴sodi tolimokis ngesi tamasi, “Iyeni mono iyong atamar ekapolon Baalis lo a Amon emeunit Ichimael lokookeng a Nesania akiar iyong kori emam?” Towou Gedalia akinup ngakiro nguna.

¹⁵Kisuruor Yoanan Gedalia alopei tama, “Kimiek atolot ataar Ichimael, emam itwaan eanyuni atamar ngae aari ngesi. Nyo nitibore imiekinitere ngesi kiari iyong en? Epetari ibore ngini Ngisirael daang lu achunun ni iyei iyong, nabo eyauni ngakiro naaronok lotunga daang lu idongito Yuda.”

¹⁶Nakaneni abu Gedalia tatachak Yoanan tama, “Nyiar ngesi! Meere ngakiro na iruoror iyong Ichimael ngaka iteni!”