Read turkana Yeremia 41 Bible Online

Yeremia 41 - turkana bible

Yeremia 41

¹Elap lo a ngikan-kaarei a ekaru kangolo, Ichimael lo arai lokookeng a Nesania, tarai etatait a Elichama, abu toloto ka ngikiliok ngitomon Misipa aanyun Gedalia. Arai Ichimael eyenet a ekapolon, nabo arai epei a ngikapolok a arieng a Babilonia. Ani na emujeta kesi akimuj aapei,

²toutut Ichimael ka ngikiliok lutomon ngilengea kech taara Gedalia.

³ Taar Ichimael tani Ngisirael daang lu arukito ka Gedalia alo Misipa. Taar tani ngasigerea a Ngibabiloniae na ayakasi neni.

⁴Akolongit na atupit ngina, ani eringa itwaan tani ipei nyeyena ngakiro a akitu a Gedalia,

⁵pot ngikiliok ngitomwon-kauni alo Chekem, ka Chilo ta Samaria. Abanyarito kesi ngajul a ngabokonya kech, tochilichilito ngiworui ka adungudung ngawat kech. Ayaarito kesi ngakipeyos a ngalemet ka emitina alemun alokai a Akuj.

⁶Abu Ichimael lokookeng a Nesania tonyou alo Misipa tolot akisiriam kesi, egoro ngesi elosi alorot. Ani enanguni ni ayakasi kesi, tama, “Tolomutu kare taanyunos ka Gedalia.”

⁷Ani napei alomareta kesi lore, apot Ichimael ka ngitunga keng taara kesi tachakakis ngawat kech nakipany.

⁸Nakaneni ayakasi ngirukitos a ngitunga kangulu ngitomon lu alimokinete Ichimael tamasi, “Nyikiar sua kainyo eyakasi ngakanoi, ka erau, ka akimiet ta akimiet a ao na kiweit sua alomana.” Abu ngesi tajal kesi ka ngirukitos kech nyear.

⁹Akipany na achakakini Ichimael ngawat a ngitunga alu aari, arai akipany naapolon nakolong aboki ekapolon Asa ngirwa lu etijio ngesi ekapolon a Isirael lo anyaritae Baacha. Kileleb Ichimael ngawat nakipany ngina.

¹⁰Ani erumor kitiliwo tanakookeng a ekapolon ka ngitunga luche daang lu ayakasi Misipa ngirikon. Ngitunga ngulu kesi lukolong erumakini ekarikon a ngasigerea Nebusaradan Gedalia atamar toweik. Kitiliwo Ichimael kesi ngirikon, toriko totena nakwap a Amon.

¹¹Apot Yoanan lokookeng a Karea ka ngikarikok a ngasigerea daang kiirasi ngakiro naaronok daang asubi Ichimael lokookeng a Nesania.

¹²Sodi tonyout kesi ka ngitunga kech toloto akitijwore Ichimael. Toditasi ngesi anabwel anaapolon alo Gibeon.

¹³Ngirikon lu arikit Ichimael na aanyungareta Yoanan ka ngikarikok a ngasigerea lu arukito ka ngesi, talakaros.

¹⁴Toreeunos ngitunga daang lukolong ariki Ichimael alo Misipa, tobongosi toloto nia Yoanan.

¹⁵Nakaneni Ichimael ka ngikiliok ngikan-kauni, apot tosiwa ani a Yoanan, toloto nia Ngiamon.

¹⁶Yoanan ka ngikarikok a ngasigerea lu arukitotor, toweikis ngitunga lukolong ariki Ichimael[25] alo Misipa na aarea Gedalia. Araakasi ngitunga ngulu ngasigerea ka ngaberu, ka ngide ta ngitunga lu agelemitae. Tobuu Yoanan kesi alo Gibeon

¹⁷Toloto kesi toloma Gerus Chimiam ni ayei diyete Betleem, esakete alosit Misiri

¹⁸kotere Ngibabiloniae. Akerito kesi Ngibabiloniae ani aarea Ichimael Gedalia, lo aseuni ekapolon a Babilonia toliwor ekapolon a ewae kangolo.