Read turkana Yeremia 42 Bible Online

Yeremia 42 - turkana bible

Yeremia 42

¹Ngikarikok a ngasigerea daang, aapei ka Yoanan lokookeng a Karea ta Asaria[26] lokookeng a Echaya, kirukut ka ngitunga daang napei aniichi tanang niapolon,

²katolimokis ayong tamasi, “Tosubak kare nakilimokini sua iyong! Kilip Ekapolon Akuj na erai Akuj yok kotere ngoni! Kilip kotere ngoni daang lupiyayek. Kilalak ngoni, nakaneni kikidioko tokona ngoni lupiyayek, loger lo tokona iteeo iyong dang.

³Kilip sodi kidodik ngoni Ekapolon Akuj na erai Akuj yok erot lo ejoikinit ngoni kiwapi, ka ngakiro na ejoikinit kisubi.”

⁴Atatachak ayong kesi atama, “Eira ayong. Elipi ayong Ekapolon Akuj na erai Akuj yok, loger lo kilimokineta esi ayong. Ani ngakiro na elimuni ngesi, kalimokini ayong esi. Emam ibore kemunoni ayong esi.”

⁵Sodi katolimokis kesi ayong tamasi, “Kimiek Ekapolon Akuj toliwor akaanyunan na iteni ka na emunoi anikosi, erai pekisubak sua akiroit daang na kimeunitor iyong Akuj nikosi.

⁶Tani kejok kori kerono, kiwapi sua etoil a Ekapolon Akuj ana erai Akuj yok ana kilimokini sua iyong atamar kilip. Ejokearosi ngakiro aniyok erai kiwap ngoni ngesi.”

⁷Adaunet a ngirwa a ngitomon, abu Ekapolon Akuj katolimok ayong akiroit.

⁸Abu ayong atanyarau Yoanan ka ngikarikok a ngasigerea lu arukitotor ta ngitunga luche, napei ani nyeyenikinitae tanang ni eyenikinitae.

⁹Atolimok kesi atama, “Ekapolon Akuj na erai Akuj a Isirael, nangoon ibalasi esi ayong kilip, ebala,

¹⁰‘Ani kisakete esi akilom nakwap naga, kaduki ayong esi, nyakayatari. Kadupakini ayong esi nyakadituni. Nginyas lu ayau ayong nikus, kesialolong ayong noi.

¹¹Tojongoto akerit ekapolon a Babilonia lo iemito esi. Nyiikear ngesi, kainyo kirukit ayong ka esi, kayuuni ayong esi anakan keng.

¹²Ketaanyuni ayong esi ngisien, sodi toliwor ngesi lo a ngisien anikus, kimiek esi toloma nakwap na erai akus a ngikulepek. Ayong Ekapolon Akuj alimu nguna.’

¹³“Nakaneni ani kitamasi esi, ‘Nyikilomi sua nakwap naga,’ nyiiwapa esi etoil a Ekapolon Akuj ana erai Akuj kus

¹⁴tamasi, ‘Emam, kilosi sua Misiri ni emam ejie, kori elii a arem ka akoro. Kilomi inaa.’

¹⁵Tokona, kiirasi akiroit a Ekapolon Akuj, esi ngitunga a Yuda lu idongito. Akuj Namerikanyer, na erai Akuj a Isirael, ebala, ‘Ani kingoliarito esi Misiri, isakete alosit toloma inaa,

¹⁶kidoli esi ejie lo ikerito nabo kiwapi akoro nakitubuli totoanikis inaa.

¹⁷Ngitunga daang lu ingoliarito Misiri esakete alosit akilom inaa, eari akwara ka akoro ta edeke. Emam tani ipei kech ni idongi, nabo emam tani ipei ni epuun anakiro anaaronok ayauni ayong nikech.’

¹⁸“Akuj Namerikanyer, Akuj a Isirael, ebala, ‘Loger lokolong abukokinere angoit ka anyunyura kang lotunga lu elomito Yerusalem, eger lopei ngolo abukokinea anyunyura kang lotunga a Misiri. Iliworosi esi ibore nikikadakini, ka niketubulon, ka ni ilamam, ka ni imenyio. Nyeringa esi ianyungarete akwap naga nabo jik.’ ”

¹⁹Atorubak ayong eruoro abala, “Ebala Ekapolon Akuj kona, ‘Esi ngitunga a Yuda lupiyayek, nyiilot Misiri.’ Toyena dir atamar kechikichiki ayong esi akolongit naga.

²⁰Kainyo iwoliyosi esi ijal akiyar kus. Kilimokinete esi ayong atamar kelipak esi Ekapolon Akuj na erai Akuj yok. Ipot esi tolimut atamar isubete ngakiro daang na edunguni ngesi.

²¹Nakaneni kalimok ayong esi akolongit naga, nakaneni iwounito esi akiwap etoil a Ekapolon Akuj ana erai Akuj kus, nyiwapa esi akiroit daang nakameuni ngesi ayong alimokin esi.

²²Toyena bocha tokona atamar kiari esi akwara, ka akoro ta edeke anakwap ana isakete esi alosit toloma.”