Read turkana Yeremia 43 Bible Online

Yeremia 43 - turkana bible

Yeremia 43

¹Ani arumori ayong alimokin ngitunga daang ngakiro nakalimokini Ekapolon Akuj na erai Akuj kech atamar atolimok kesi,

²apot Asaria lokookeng a Ochaya ka Yoanan lokookeng a Karea ta ngitunga luche lukewogak daang, katolimokis ayong tamasi, “Isudi iyong ngakiro. Nyikimeunit iyong Ekapolon Akuj na erai Akuj kosi alimokin sua atamar nyikiwot Misiri atoloma inaa.

³Baruk lokookeng a Neria ngesi kichichuunit iyong nikosi, sodi kidwangeta Ngibabiloniae sua, kitaar kori kitorikosi Babilonia.”

⁴Apot Yoanan ka ngikarikok a ngasigerea ta ngitunga luche daang towout akiwap ngakiro na adungunit Ekapolon Akuj atamar nyeeramakis anakwap a Yuda.

⁵Nakaneni Yoanan lokookeng a Karea, ka ngikarikok a ngasigerea, apot torikosi ngitunga lupiyayek a Yuda daang toloto Misiri. Kimoriasi ka ngitunga daang lukolong abongunete anakwapea ana kolong apetakina kesi.

⁶Araakasi ngitunga ngulu ngikiliok, ka ngaberu, ka ngide ta tanakookeng a ekapolon, ka itwaan daang nikolong aisikinitor ekarikon a ngasigerea lo anyaritae Nebusaradan, toisikinea Gedalia, ka Baruk ta ayong.

⁷ Nyiwapa kesi ngakiro na adungunit Ekapolon Akuj, toloto tolomasi Misiri, tananga lore lo anyaritae taipanes.

⁸Katolimok ayong Ekapolon Akuj alo Taipanes tama,

⁹“Tolem ngamoru naapolok ngadi tonukak lochoto lo eyei lomataparea lu eyakasi lorot lo elomarere kai a Parao alo Taipanes. Tonuk ngamoru nguna iteete Ngisirael.

¹⁰Ani erumor tolimok kesi atamar ayong Akuj Namerikanyer na arai Akuj a Isirael, arikuni ekasuban etich kang Nebukadinesa, ekapolon a Babilonia nakwap naga. Iwaakini ngesi ekicholong keng lo a apolou namoru na inuk iyong[27] nugu. Imukokini ngesi kesi eam lo a apolou.

¹¹Ebuni Nebukadinesa kidwang ngitunga a Misiri. Ngulu eraakasi ngikatoak a edeke, eari edeke. Ngulu eraakasi ngirikoro, erikio. Ngulu eraakasi ngiaran a akwara, eari akwara.

¹²Enomi ayong ngakais a ngakujo anagelayek a Ngimisiri. Inomi ekapolon a Babilonia ngakujo kech, kori iwoki. Itosegi ekapolon a Babilonia akwap a Misiri, loger lo elemea ekeyokon ngilach aloworui keng. Erotokini ekapolon a Babilonia kebwang Ngimisiri alojie kerumor.

¹³Inyasuni ngesi ngamoru na ilipitere ngakujo ani enyaritae Eliopolis alo Misiri. Inomi ngesi ngakais a ngakujo a Misiri.”