Read turkana Yeremia 44 Bible Online

Yeremia 44 - turkana bible

Yeremia 44

¹Katolimok Ekapolon Akuj ayong akiroit kotere Ngisirael alu alomito Misiri, ayakasi lorerea a Migidol, ka Taipanes, ka Mempis ta Pasiros.

²Akuj Namerikanyer, na erai Akuj a Isirael, tolim tama, “Ingolikis esi ngikulepek naaronok daang nakolong ayauni ayong Yerusalem ka ngirerea luche daang a Yuda. Kingolikisi a, tani tokona akolongit naga, eraakasi kesi alaireng, emam itwaan elomit neni

³kainyo asubete ngitunga naaronok ketongoa ayong. Epeyonokinete kesi ngakujo nagelayek emitina, tosuba etich a ngakujo ana peayenete kesi, kori esi, kori taapaakus.

⁴Tarai ameununi ayong ngikadwarak nikus lu araakasi ngikasubak etich kang, kitolimonokis esi atamar nyiisuba ibore niaronon aremokino ayong en.

⁵Nakaneni towout esi apupokin kori adetar ngaki kiirasi. Towout esi apalikin eboyor kus loaronon ipeyonokineta ngakujo nache.

⁶Kotere nguna, abu ayong atobukok angoit kang ka anyunyura lorerea a Yuda ka ngirotin a Yerusalem, echunyak akim. Kidongo kesi eraakasi alaireng, ka ibore nikitubuli, loger lo tokona ikoneta neni.

⁷“Tokona, Ekapolon Akuj Namerikanyer, na erai Akuj a Isirael, ingita atamar, nyo isubanakinotor esi ngakiro naaronok na ikote nege? Isakete esi amunyar ngikiliok ka ngaberu, ka ngide, ta lu itanakio, sodi tongopea itwaan a ekitela kus ni idongi a?

⁸Nyo kitongoeta esi ayong ani ilipitotor ngakujo nasubuna, ka akipeyonokin ngakujo nagelayek kane alo Misiri, ani ipot esi akilom? Isubete esi nugu tomunyarotor a? Isakete esi ebukut daang anakwap toliwor kimenyarit esi ka alimit ekiro kus ilamar a?

⁹Ikwa kimuriakinito esi ngakiro naaronok daang nakolong asubete taapaakus, ka ngikapolok a Yuda, ka ngaberu kech, ka esi ta ngaberu kus alorerea a Yuda ka ngirotin a Yerusalem a?

¹⁰Eringa esi nyeliworo ngitunga lu itiditeuna tanang akolongit naga. Nyidodikina esi ayong arimatoi kori nyiboikino esi iwapito ngitalio daang lu ketaanyuni ayong esi ka taapaakus.

¹¹“Tokona bocha, ayong Akuj Namerikanyer, na arai Akuj a Isirael, kanyoikini esi atomunya Yuda daang.

¹²Ani ngitunga a Yuda lupiyayek, lu esakete alosit akilom Misiri, amunyari ayong kesi daang. Etoakete kesi daang, lu eyenikinitae ka lu nyeyenikinitae, etoakete alo Misiri, alojie kori edeke. Eliworosi ibore nikikadakini ka niketubulon ka nilamam ta ni imenyio. Imenyarete kesi ngitunga toliworos elimito kesi na ilamatar.

¹³Erirae ayong lu elomito Misiri, loger lokolong eriraa Yerusalem a akwara, ka akoro ta edeke.

¹⁴Emam ngitunga lupiyayek a Yuda lu epote akilom Misiri lu esiyete kori ebucharosi. Emam tani ipei kech ni ebongori Yuda, ni iitanito akilom nabo. Emam itwaan ebongi, mati ngitunga ngidikidio lu edokinete.”

¹⁵Sodi pot ngikiliok daang lu ayenete atamar epeyonokinete ngaberu kech ngakujo nache, ka ngaberu daang na awaasi kaneni, aapei ka Ngisirael lu alomito kuju Misiri ni anyaritae Pasiros, araakasi daang ajore nakaalan noi, katolimokis ayong tamasi,

¹⁶“Nyikisaki sua akiirar ngakiro nakilimok iyong sua ilimit ekiro a Ekapolon Akuj.

¹⁷Nakaneni kisubi sua ngakiro daang nakilimu atamar kisubi. Kipeyonokini sua akuj kosi naberu, na erai Akapolon a adis, kibukokini sua ngesi ngakipeyos a emuna loger lokolong kisubea kata apaakosi, ka ekapolon kosi ta ngikarikok kosi alorerea a Yuda ka ngirotin a Yerusalem. Ngirwa ngulu, kitingit sua akimuj nakaalan, kibooyi niajokon, amam ngichan.

¹⁸Nakaneni nakolong kipalikinea sua akipeyonokin Akapolon a adis, atojongoto abukonokin ngesi emuna, kingopik ibore daang, nabo atoaka ngitunga kosi alojie ka akoro.”

¹⁹Apot ngaberu tamasi, “Nakolong kipoo sua ngamugati na esikwaanitae ka Akapolon a adis, epeyonokisi ngesi, ajoikinito ngikiliok kosi ngakiro nakisubi sua.”

²⁰Sodi atolimok ayong ngitunga daang lukalimokinete ayong ngakiro nguna, lukiliok ka luberu, atama,

²¹“Ani emitina lo ilemunete esi, ka taapaakus, ka ngikapolok kus, ka ngikarikok kus ta ngitunga a akwap, tolemut alorerea a Yuda ka ngirotin a Yerusalem, esibit esi peayeni Ekapolon Akuj ngakiro kech, kori esibit esi apot ngakiro kech kimuriakis ngesi a?

²²Akolongit napei tokona naga, aliwor akwap kus alaireng, emam itwaan elomit neni. Aliwor ibore nikitubuli, nabo ilamam, kainyo aburu Ekapolon Akuj anaikin ngakiro naaronok isubete esi.

²³Apot ngakiro naaronok noi nugu nikus kainyo ipeyonokis esi ngakujo ngache, tosechakis Ekapolon Akuj ani iwouneta akiwap ngitalio keng ka ngakitatamet ta ngakiro daang.”

²⁴Atolimok ayong nabo ngitunga daang, tarai cha noi ngaberu atama, “Kiirasi akiroit a Ekapolon Akuj, esi ngitunga a Yuda daang lu ilomito Misiri.

²⁵Akuj Namerikanyer na erai Akuj a Isirael, ebala kona: Ilimut esi ka ngaberu kus a ngakituk kus, nabo isubakis a ngakan kus ngakiro na ikongokis Akapolon a adis, atamar ipeyokinete ngesi ka abukokin emuna. Kasiosi robo! Kirichakisi nguna ichikakis! Kiyookis ngakikongiet kus!

²⁶Nakaneni topupokisi tokona akikong na ekong ayong Akuj Namerikanyer a ekiro kang aloationon ani a Ngisirael kadaang alu elomito Misiri. Nyeringa nabo ayong emiekini tani ipei kus ikongi a ekiro kang ebala, ‘Ekong jik tani Akuj na eyari!’

²⁷Kingolik a, eteorit ayong kesi anaaronok, meere anaajokak. Ngikiliok lu eponito alo Yuda daang lu elomito Misiri, emunyario a akwara ka erogo, tanang daang emunyario pil.

²⁸Ani ngulu epuunosi anakwara, ebongunete anakwap a Misiri toloto Yuda. Eyenunete lu epuunosi atamar anukiro eraakasi iteni, nakech kori nakang.

²⁹Ayong Ekapolon Akuj kedodikini esi ibore ni isileereuni atamar kerirae ayong esi kane, ka akidodiun atamar akichikichika na abalar ayong ayauni nginyas nikus iyookin.

³⁰ Epotori ayong ekapolon a Misiri lo enyaritae Opira atorikok ngimoe keng lu esakete akiar ngesi. Ekokini neni loger lokolong epotorea ekapolon a Yuda lo anyaritae Sedekia, atorikok Nebukadinesa lo arai ekapolon a Babilonia, lo arai emoit keng asaki akiar ngesi.”