Read turkana Yeremia 46 Bible Online

Yeremia 46 - turkana bible

Yeremia 46

¹Katolimok Ekapolon Akuj ayong ngakiro a ngibukui,

² kisiak akisuruor ngakiro a Misiri. Ngakiro nugu alimuni ngesi kotere ajore a ngasigerea a ekapolon a Misiri alo anyaritae Neko. Edwangete ngasigerea a Nebukadinesa kesi alo Karikemich alodiyete angolol a Eupurate. Arai ekaru loa nguomwon lo araakar Yeoyakim ekapolon a Yuda. Tama Ekapolon Akuj kona,

³“Iremasi ngikapolok a Misiri ebalasi, ‘Totinga ngaupwala kus, tonyout toloto lojie!

⁴Toena ngangolei kus, todokasi! Totupakinos, tanapa ngapukoto kus! Kipenasi ngakwaaras! Totinga ngiboro lujiet!’ ”

⁵“Ani nyoni etee ayong? Ebulit kesi areasi abongosi naabor. Abwang ngasigerea kech amatarosi noi. Nyingoliarete naabor jik, eyei ebuloi wadaang.

⁶“Nyebucharosi lukapiranak. Nyepuunosi ngasigerea. Alokwap alowae a Eupurate, ilegeuni kesi ibore tadakaros.

⁷Ngae en ekurupupuunit loger a Nili, angolol na atenikis ngakipi ngikipetetio?

⁸Misiri ekurupupuunit loger a Nili, angolol na atenikis ngakipi ngikipetetio. Ebala Misiri ‘Akurupupuuni ayong, atoburuchia akwap daang. Enyasuni ayong ngirerea ka ngitunga lu elomito lorerea ngulu.

⁹Ee ngangolei, kapesi ngaren! Kibiroros ngaurukukui! Ngasigerea toloto ngaren. Ngikiliok lu eponito alo Kuch, ka Libia, iwokito ngaupwala, ta ngitunga lu eponito alo Lidia, ngikunonoi a ngimalea a amod.’ ”

¹⁰Erai akolongit naga aka Ekapolon Akuj Namerikanyer. Etachakini naaronok akolongit naga. Irirae ngimoe keng akolongit naga. Enyami akwara kesi toup, tanang itudunge akure keng a ngaakot. Akolongit naga, ipeye Ekapolon Akuj Namerikanyer ngakipeyos keng alokwap, alodiyete angolol a Eupurate.

¹¹Ngitunga a Misiri, kapesi Gilead[28] tasaka ekitoe lo itedekatar! Ekitoe kus daang aliwor pas. Nyikitangalekini esi!

¹²Eirasi ngibukui ngileech kus. Eira itwaan daang akigoro kus. Anang asiger apei nache, adakarosi kesi daang aapei.

¹³ Abunet a ekapolon a Babilonia alobe Nebukadinesa akitijikin Misiri, kesuruor ayong Ekapolon Akuj tama,

¹⁴“Tolimo alorerea a Misiri, alo Migidol ka Mempis ta Taipanes. ‘Tonyoutu tosubakinos. Kainyo kimunyari esi daang akwara.

¹⁵Nyo bo amataror akuj kus nabe Apis? Nyo bo aukoror ngesi na erai akuj namong? Ekapolon Akuj ejukari ngesi.’

¹⁶Ananganangaar ngasigerea kus adakarosi. Isuruori ipei kech daang niche ebala, ‘Tonyou atipei! Bua apana nawi lotunga yok atobucharos anakwara a emoit!’

¹⁷“Ekapolon a Misiri lobe Parao, tolimokisi ekiro lokitetet lobe, ‘Ekachalan lo emiekini esaa keng edaun pas.’

¹⁸Ayong Akuj Namerikanyer arai ekapolon. Ayong arai Akuj na eyari. Eger lo ilengitor Tabor ngimoru luche, kilengite emoru Karimel anam, ikote ngikilinga alo ebunit akitijikin iyong neni.

¹⁹Tosubakinos kitiliwor ngirikon, esi ngitunga a Misiri! Itiliworio Mempis ariet, alaireng na emam itwaan elomit.

²⁰Ikoni Misiri aite naajokon, na egumit lolingakori lo ebunit alokwap.

²¹Tani ngasigerea keng na igiritae apotioketo ngawat ekwaanikin ka ngitak lukanakunak. Ee robo, areasi amatarosi. Nyeweikina kesi ejie. Anang akolongit na eanyuneta naaronok.

²²Epungar Misiri, eruo loger a emun, na aapuunea ajore a ngasigerea a emoit. Eponito nikeng a ngaepe, loger a ngitunga alu itelete ngikito,

²³kinyasut amoni keng, na emam kona epedio, kainyo nyimarun ngasigerea kech, Elalak idwangit ngimases.

²⁴Esurum ngitunga a Misiri ngileech. Edwang ngitunga lu eponito alokwap kesi. Ayong Ekapolon Akuj alimu nguna.”

²⁵Akuj Namerikanyer na erai Akuj a Isirael, ebala, “Erirae ayong Amon, akuj a Sebes, aapei ka Misiri, ta ngakujo keng ka ngikapolok. Alemari ayong ekapolon a Misiri ka daang lu igienosi ngesi,

²⁶atoriko ni eyakasi lu esakete akiar kesi. Atoriko nia ekapolon a Babilonia alo enyaritae Nebukadinesa, ka ngasigerea keng. Ani ekisidi, elomete ngitunga Misiri nabo loger lokolong sek alomitotor. Ayong Ekapolon Akuj alimu nguna.”

²⁷ Ekapolon Akuj alimu ebala, “Ngitunga kang, warasi nyieam, Ngisirael, warasi nyikibul. Kayuuni ayong esi anakwap anaalonan kangina. Ayuuni ngalesea kus anakwap ana eraakatar ngirikon. Ibongunete esi nawi kiboikinos akaalimon. Emam ibore iche iemete esi.

²⁸Ngitunga kang, warasi nyieam. Kainyo kirukit ayong ka esi. Amunyari ayong ngibukui daang, anakwapea ana kapetakini esi, nakaneni nyakamunyari ayong esi. Karikini ayong esi a erot alo eriyan.”