Read turkana Yeremia 47 Bible Online

Yeremia 47 - turkana bible

Yeremia 47

¹Ani eringa ekapolon a Misiri nyitijikino Gasa, katolimok ayong Ekapolon Akuj ngakiro a Pilistia.

² Tama, “Kingolik a, ekurupupunito ngakipi alokwap, eleleunete loger a ngakalel. Eburichiarete akwap ka ibore daang ni eyei nakwap, napei alorerea tanang lotunga lu elomito neni. Enyarasi ngitunga ebalasi kingarakin. Ikalouni itwaan daang anakwap lokojokon.

³Iirarete kesi eruye a ngakejen a ngangolei, ka echale a ngaurukukui ana irito ngangolei, ka eruye a ngakejen a aurukuk. Nyebongorete taapa ni eyakasi ngide kech. Etingi emudekeke ngakan kech.

⁴Anang ngirwa lu inyasunere Pilistia. Totuboroe alo Tiro ka Sidon ekengarakinan daang lo eringa idongit. Ayong Ekapolon Akuj amunyari Ngipilisti, daang lu eponito alokwaasea a Kirete.

⁵Aluro ngitunga a Gasa. Elilinga ngitunga a Achikelon. Esi lupiyayek a Pilistia, igorosi esi tanang ori?

⁶Igorosi esi ibalasi, ‘Akwara a Ekapolon Akuj! Ichumichumi iyong tanang ori? Tobongo nakuroru tourienikin neni kianga!’

⁷Nakaneni ikokini ngesi iangari ai, tarai ainaki Ekapolon Akuj ngesi etich lo esubi? Adungok ayong ngesi atamar kitijik Achikelon ka ngitunga lu elomito lokwaas a anam.”