Read turkana Yeremia 48 Bible Online

Yeremia 48 - turkana bible

Yeremia 48

¹ Ngakiro nugu alimuni Akuj Namerikanyer na erai Akuj a Isirael kotere Moab, “Oitiakoi kare ngitunga a Nebo! Enyasun ere kech. Alemar Kiriasaim, aukor awas keng nakaagongon, kisurumae ngitunga keng ngileech.

²Adaun ekipur a Moab. Alema emoit Echibon nabo etukit akinyasun Moab. Emunyario ere a Madimen. Irisi akwara kesi.

³Igorosi ngitunga a Oronaim ebalasi, ‘Amoitanut! Nginyas!’

⁴“Enyasun Moab. Kiira ngide igorosi.

⁵Kiira akisutusuta kech alorot alo etenere Luis, akigoro na eriabatar alorot alo etenere Oronaim.

⁶Ebalasi, ‘Kipungaros! Tamataros toyuunos. Tamataros loger a esikiria a moding alo eyei nariet!’

⁷“Moab, igieno iyong ngikilinga kon ka ebari, nakaneni kidwangio tokona tani iyong. Elosi akuj kon Kemoch nakwap ache, irukorete ka ngikapolok ta ngimurok.

⁸Emam ere ebuchar alonyas kangulu. Adipo ka aro, inyasunio. Ayong Ekapolon Akuj alimu nguna.

⁹Nak Moab ngabeben topororea.[29] Idongete ngirerea keng eraakasi alaireng. Emam itwaan eringa elomi neni nabo.” (

¹⁰Kilam itwaan ni nyesubi etich a Ekapolon Akuj a etau keng kadaang! Kilam itwaan ni nyichumi taar!)

¹¹Tolim Ekapolon Akuj tama, “Iangarit Moab napei kolong a ekiditeu, emam akolongit arikere nakwap ache. Ikoni Moab emuna lo imiekinio tokulau, lo nyebukio alotuo a epei tobukokinae loche. Eringa abobou keng nyilochokino. Eringa akukuny keng ikoni nikolong sek.

¹²“Tokona bocha, enangi ngirwa lu amearea ayong ngitunga tobukosi Moab loger a emuna. Ebukorete kesi emuna daang alotuol, sodi tobwanga ngituol kialasi.

¹³Sodi kirum Ngimoab ngileech kotere akuj kech na enyaritae Kemoch, loger lokolong erumeta Ngisirael ngileech kotere Besel, akuj na egienosi kesi.

¹⁴Ngimoab, nyo ibalatar esi, ‘Kikileenikinit sua kirai ngikajwok’?

¹⁵Enyasun Moab ka ngirerea keng. Angol ngisorok kech luajokak. Ayong arai Akuj Namerikanyer na arai ekapolon, ngesi alimu nguna.

¹⁶Aapuu esal a Moab. Edikino inyasunio atipei.

¹⁷“Kigoro tosutonokisi kotere ebukut ngolo, esi daang lu idunyatar, lu iyenete ekipur keng. Tamasi, ‘Abil aburo a apolou keng nakaagongon. Abil ebela keng lo ekipur.’

¹⁸Esi lu ilomito Dibon, totiyaunos ani kirimare, kiboikinos nalup, napua. Eyei ekenyasunan a Moab nege, enyasu ngawasea kus nakaagongok.

¹⁹Esi lu ilomito Aroer, towaa alorot kidarut. Kingita lu amatarosi, tongichutu anikech ngakiro na asubakinosi.

²⁰Etachunete kesi tamasi, ‘Esurum Moab ngileech kainyo adakar. Kikaloutu, kiuteto. Tolimutu anangolol a Arinon atamar enyasun Moab!’

²¹“Abu eriras lorerea lu eyakasi lomuria, lu enyaritae Olon, ka Yaisa, ka Mepaas,

²²ka Dibon, ka Nebo, ka Bes Dibilasaim,

²³ka Kiriasaim, ka Besigamul, ka Besimeon,

²⁴ka Kerios ta Bosira. Abu eriras lorerea daang a Moab, lu eloka ka lu eapiyete.

²⁵Eriar agogongu a Moab. Enyasun apolou keng. Ekapolon Akuj alimu nguna.”

²⁶Tolim Ekapolon Akuj tama, “Kitamat Moab epurot kirakar, ani kangerio ayong. Ibelobelo Moab analekan keng a ilope, sodi tokianatar ngitunga.

²⁷Moab kitamu eger lokolong ikianar iyong Ngisirael. Asibit iyong arukito kesi ka ngirukooi a? Toliwor nacha iruoror iyong ngakiro kech kimungumung akou a?

²⁸“Esi ngitunga lu ilomito Moab, torotokisi alorerea kus. Kapesi toloma nataaba! Kikokisi akuuri na eduki akai keng lokwaas a achukule.

²⁹Inisana Moab! Eira ayong eger lo eraakatar ngitunga lukenisak, lukewogak taraakas lu iwojosi.

³⁰Ayong Ekapolon Akuj, ayeni ngiwog kech. Erai akinisa kech aka pas. Nyerubete ngakiro na esubete kesi.

³¹Tokona bocha, eute ayong kotere Moab. Egoro kotere ngitunga daang a Moab. Egoro atosutonok kotere ngitunga a Kir Eres.

³²Ee ngitunga a Sibima, kegoror ayong esi, akidwang ngitunga a Yaser. Ere a Sibima, ikoni iyong emusabib lo enangito ngasepukan keng nanam a Amakat, topetara nabo tanangito Yaser. Nakaneni tokona, ageor kon na akamu ka ngamusabib kon, atubokin ekenyasunan.

³³Akiana ka alakara alemar anakwap anaajokon a Moab. Atubo ayong emuna ani echiyeenere. Emam itwaan emuri emuna, kimaritetek.

³⁴“Ngitunga a Echibon ka Eleale igorosi. Epupio akigoro kech alo Yaas. Epupio alo Soar. Epupio akigoro ngina tani alo Oronaim ta Egilas Chelichiya. Aono tani ingolol ni enyaritae Nimirim.

³⁵Eratakini ayong ngitunga a Moab tojongoto akipeyore ngakipeyos na inomio ani ilipeeneta ka alemanakin ngakujo kech ngakipeyos. Ayong Ekapolon Akuj alimu nguna.

³⁶“Egoro ayong atosutonokini kotere Moab ka ngitunga a Kir Eres, loger a itwaan ani ekutakinit ebune kotere eeos lo enukere itwaan, kainyo ibore daang nikolong atingito kesi, adaun.

³⁷Kesi daang abany ngakies kech ka ngajul a ngabokonya. Adungudunguoto kesi daang ngakan kech, nabo enapit itwaan daang ngiguniae.

³⁸Alokidiama ngakais a Moab ka ngaroatin na etukuotor ngitunga, akigoro na esutonokinere bon eyei, kainyo abwang ayong Moab loger a akurum ana emam itwaan emisit. Alimu ayong Ekapolon Akuj nguna.

³⁹Abwanga Moab! Kikaloutu! Eruma Moab ngileech. Aliwor asakatan na ekianatar ngibukui daang lu idunyasi ka ngesi. Ayong Ekapolon Akuj alimu nguna.”

⁴⁰Ebala Ekapolon Akuj kona, “Kingolik a, eporuni ebukut loger a egole, kimukok Moab ngabeben.

⁴¹Elemario ngirerea kirumunae ngawasea nakaagongok. Akolongit ngina, ngitai a ngasigerea a Moab, ebuli kikokis etau a aberu ana eriaba esaki akidoun.

⁴²Inyasunio Moab, nyeringa nabo eliwor ebukut kainyo kangeri ngesi ayong Ekapolon Akuj.

⁴³Ebuloi, akipany, ka eloit, idarito ngitunga a Moab. Ekapolon Akuj alimu nguna.

⁴⁴Itwaan ni esaki akilany ebuloi echakakin nakipany, ani ni edokuni anakipany, ipoki eloit, kainyo ayauni ayong ngakiro nia Moab, ekaru lo iriraare Moab.

⁴⁵“Lotorube a Echibon elomarete lu edokinito esakete akimech. Arirau akai a Sion asarae. Anom akim[30] ngikukuorin ka ngaitae a ngimoru, a ngitunga alu eminasi ejie alu enyaritae Ngimoab.

⁴⁶Oitiakoi! Abe etioko nginyas ianyu iyong Moab. Amunyar ngitunga lu elipito Kemoch. Kainyo arik talokookon ka tanakookon aliworosi ngirikon.

⁴⁷Nakaneni abuuni ayong ebari a Moab nabo, ngirwa lu monan a ekisidi, alimu ayong Ekapolon Akuj. Ikoni eriras a Moab neni. Ayong Ekapolon Akuj alimu nguna.”