Read turkana Yeremia 49 Bible Online

Yeremia 49 - turkana bible

Yeremia 49

¹ Ngakiro alimuni Ekapolon Akuj ani a Ngiamon nugu, “Emam Isirael talokookeng a? Ikwa emam ekeruman akwap keng eyei a? Ani nyo emiekineta kesi ngitunga lu ilipito Malikom elomarete Gad? Kimiekis ngitunga ngulu elomete neni.

²Tokona bocha, kingolik a, eponito ngirwa lu esiirarea ayong Ngiamon lu elomito Raba echale a ejie. Eliwor ere ngolo akatiputipu a asakatan. Inomio ngadakarin keng. Sodi tobua Isirael akwap ani eyakasi lukolong ademarete kesi, alimu ayong Ekapolon Akuj nguna.

³Kikalou kare Echibon! Kainyo enyasun Ai. Ngaberu a Raba, kikaloutu tosutonokisi! Tanapa ngiguniae kigoro. Tamataros ama ka ama kibilerit. Eyaario akuj kus Malikom nakwap ache, aapei ka ngimurok ta ngikapolok.

⁴Nyo iwogatar esi ngitunga lu nyikimunoi? Adaunosi ngikilinga kus. Nyo igienotor esi agogongu kus, ibalasi abe emam itwaan kitijikini.

⁵Kingolikisi a, ayauni ayong ebuloi nikus alowaitin kadaang. Imatarosi esi daang. Ematar ipei kus daang esaki ni eyuunor. Engopi itwaan ni echunakini ngasigerea kus nabo.

⁶Ani ekisidi abuuni ayong ebari a Amon. Ayong Ekapolon Akuj Namerikanyer alimu nguna.”

⁷ Ngakiro nugu alimuni Akuj Namerikanyer kotere Edom. “Kengop kolong aosou alo Edom a? Adau atukuoru alotunga alukachwaak a? Adaun kolong aosou daang a?

⁸Ngitunga a Dedan, toreas tamataros! Toduka anaburibur! Amunyari ayong ngalesea a Esau, kainyo anang ngirwa lu eriraa ayong kesi.

⁹Na eponeta ngikalemak a ngamusabib, imianakinete ngadikidio kidongo lomusabib. Ngikokolak na eponeta nakwaare, elemarete ibore ni iitanito bon.

¹⁰Nakaneni ngalesea a Esau, adema ayong ibore daang. Ewolo wadaang ni edukitotor kesi, tongopea kesi ni eduketa. Amunyar ngitunga a Edom daang. Emam tani ipei kech ni eringa idongit.

¹¹Kimiekinere ayong ngide kus lukokiok, achoikini ayong kesi. Kimiekisi ngapuseru kus kegienokinosi ayong.”

¹²Alimu ayong Ekapolon Akuj kona, “Tani kitamasitere lukolong peetemokino irirao ekopo a anyunyura kang, esibit esi ibucharosi aloriras a? Mam jik, itemokino esi imaasa ekopo ngolo!

¹³Ekong ayong alope a ekiro kang abala, ere a Bosira na inyasunere, eliwor ibore nikitubuli, ka ariet. Ekianatar ngitunga, tolimito ekiro keng ilamatar. Ngadakarin na idunyatar ngesi daang, eliworosi asakatan jik.”

¹⁴Atolim atama, “Ngitunga a Edom, aanyu ayong ngakiro ani a Ekapolon Akuj. Amea ngesi itwaan lobukui tolimo tama, tochunakisi ngasigerea wapei. Pot kitijikis esi.

¹⁵Kingolikisi a, kitapalagagi esi Ekapolon Akuj alobukui. Kimenyarete esi ngitunga.

¹⁶ Kingal esi ekinis kus. Emam itwaan kikerit esi akiding ngakiro na ibalatar esi kikeritere. Ilomito esi nipakak a ngatabab, itingito aita a emoru. Nakaneni tani kilomito esi kidiama loger a egole, kitiyauni esi Ekapolon Akuj. Ekapolon Akuj alimu nguna.”

¹⁷Tolim Ekapolon Akuj tama, “Nginyas lu epote Edom, erokearosi noi toliwor itwaan daang ni itoruni neni, eriangakin tobul. Eliwor ijotajota kotere ngakiro naaronok a Edom.

¹⁸Esubakin ngakiro napei nguna alo Edom loger lo asubakinotor alo Sodom ka Gomora, ngirwa lu enyasunere kesi ka ngirerea lu edunyatar. Emam itwaan elomi neni nabo.

¹⁹Kingolikisi a, abuni ayong esupunga Ngiedomae atipei anakwap kech, loger a engatuny alo epuduni anamoni a Yorudan tanangu nachokor nakaliban. Ekarikon lo aseuni ayong ngesi epolokini akwap. Ngae kikwaan ka ayong? Ngae kibolo ka ayong? Ekapolon ali ketepegi ayong?

²⁰Kiira tokona ngakiro na areat ayong kotere Edom, ka ngakiro na asaki ayong asubea ngitunga a ere a Teman. Iriyario tani ngide kech, toriangakin itwaan daang.

²¹Na eukoror Edom, emaranikini akwap. Iirario akigoro kech anapas a Akaba.

²²Kingolik a, eremi emoit Bosira ikoni egole lo epetarit ngabeben. Akolongit ngina, ebuli ngasigerea a Edom, kikokis aberu na eriab, esaki akidoun.”

²³ Ngakiro nugu alimuni Ekapolon Akuj kotere Damasko. “Ngitunga a ngirerea a Amas ka Aripad, ialolongete toriabas, kainyo eirasi ngakiro naaronok. Ilapi ariaba alokidiama kech loger a anam nakaneni nyiangarete kesi.

²⁴Epalag ngitunga a Damasko epungarosi ebulit. Eriabasi kesi kitasionos loger a aberu ana esaki akidoun.

²⁵Ere lo eyenikinitae lokolong aminasi ngitunga keng alakara edong esil.

²⁶Akolongit ngina, edakakinosi ngisorok keng lorotin a ere, tomunyarae ngasigerea keng daang.

²⁷Echunyakini ayong ngawasea a Damasko akim. Enomi ayong ngakais a ekapolon Benadad. Ayong Akuj Namerikanyer alimu nguna.”

²⁸Ngakiro nugu alimuni Ekapolon Akuj kotere ngitunga a Kedar ka ngitela a Asor, nakolong alemari ekapolon Nebukadinesa lo a Babilonia. “Tonyoutu kitijikisi Kedar. Tomunyasi ngitunga lu alo kide!

²⁹Tolemasi ngieman kech ka ngibaren, ngawarui a ngieman kech ka ngiboro daang lu eyakasi loeman. Torujasi ngikaala kech, tolimokis ngitunga tamasi, ‘Kiriamit esi ebuloi alowaitin kadaang!’

³⁰“Ngitunga a Asor, ayong Ekapolon Akuj, kechikichiki esi atamar tamataros nialonan toduka. Kainyo Nebukadinesa ekapolon a Babilonia kitukor esi, eya ngakiro esaki anikus.”

³¹Ebala Ekapolon Akuj Ngibabiloniae, “Tonyoutu kitijikisi ebukut lo ibooyi akaalimon emam ibore ichani! Emam ere kech ngidorin ka ngakilori, tamam itwaan iratakinit.”

³²“Engatario ngikaala kech daang todemarae tani ngaatuk daang. Apetari lowaitin daang ngitunga lu eiriete ngitim lua ngikwaasea a ngakies. Ayauni ayong ngakiro naaronok nikech alowaitin kadaang.

³³Aliwor Asor adui a ngikolowoi, eliwor ariet jik. Emam itwaan elomi neni. Emam itwaan itori neni.”

³⁴Ani napei aliworor Sedekia ekapolon a Yuda, katolimok ayong Akuj Namerikanyer ngakiro a akwap ana enyaritae Elam.

³⁵Tolim tama, “Kingolikisi a, Ayong Akuj Namerikanyer, abili ngakawa a Elam na itogogongito ngesi.

³⁶Etukutuni ayong ekuwam nia Elam alowaitin kadaang. Apetari ayong ngitunga keng wadaang. Emam akwap idongi nyenanga ngitunga keng lu edokinito.

³⁷Etoem ayong ngitunga a Elam ngitunga lu esakete akiar kesi. Ani kona angoea ayong noi, amunyari ayong ngitunga a Elam, atomea ngasigerea kitijwoto kesi daang.

³⁸Amunyari ayong ngikapolok kech ka ngikarikok, atosipok ekicholong a apolou kang inaa.

³⁹Nakaneni ani ngirwa lu isidiuno, etabari ayong ngitunga a Elam nabo. Ayong Ekapolon Akuj alimu nguna.”