Read turkana Yeremia 50 Bible Online

Yeremia 50 - turkana bible

Yeremia 50

¹ Ngakiro nugu kalimokini ayong Ekapolon Akuj kotere ere a Babilon ka ngitunga keng.

²“Tolimok ngibukui ngakiro! Kisisa! Kidodiu emachar tolimo! Wara nyiimunon! Alemar Babilon! Abwang akuj keng na enyaritae Mariduk! Ngakujo nasubuna a Babilon esurum ngileech, eroborobaar ngakisikwaanet keng!

³“Abu ebukut alokwap akitijikin Babilonia, kitiliwo ariet. Ematarosi ngitunga ka ngitieng, emam itwaan elomi inaa.”

⁴Ebala Ekapolon Akuj, “Na enangea ngirwa ngulu, epote ngitunga a Isirael ka Yuda igorosi, kasakete ayong, Akuj kech.

⁵Ingitakinosi kesi erot lo etenere Sion, inaa ebalasi, ‘Potu emorikin ka Ekapolon Akuj anachamunet anakajik, ana nyikichwangakini.’

⁶“Ikote ngitunga kang ngamesekin na achakasi ngikeyokok kech alomoru. Etubonor kesi alomoru a epei toloto loche, emuriak kesi ni eyei awi.

⁷Daang lu iriamete ka kesi, itijikinete. Ebalasi ngimoe kech, ‘Asechakinete Ekapolon Akuj, kotere ngakiro nguna, nyeroko na kisub ngoni. Egienosi kolong taapaakech Ekapolon Akuj, ajoikinit kesi daang ibooyete eraakasi lu emunosi Ekapolon Akuj.’

⁸“Ngitunga a Isirael, tamataros alo Babilonia! Tonyoutu anakwap a Ngibabiloniae! Kingarenikisi loger a ngikora anaanei.

⁹Kingolikisi a, echuchuuni ayong ngajorei a ngibukui alukajwok alokwap, emiek kesi kitijikis Babilonia. Erekinosi kitijikis akwap ngina tolemasi. Ikote ngimalea kech ekajwon lokeosean lo nyebonguni a ngakan anikirion.

¹⁰ Engatario ngiboro a Ngibabiloniae. Ani ngulu engatarete ngiboro kech, eupete ngiboro. Ayong Ekapolon Akuj alimu nguna.”

¹¹Ebala Ekapolon Akuj ngitunga a Babilonia, “Ingatarete esi ngiboro a ebukut kang. Ilakara esi imariteteete, ichurosi loger a ngitak alonyia, kori loger a angole ana edwarunito.

¹²Nakaneni ere kon lo eyenikinitae, eliwor ibore ni etimoi ka ngileech. Eliwor Babilonia ebukut lo nyeyenikinitae akidwang luche daang. Eliwor ariet na emam ngakipi na eonit deu.

¹³Emam itwaan elomi Babilon kotere angoit kang. Imiekinio erai alaireng. Ani itwaan daang ni itoruni neni, eriangakin toliwor ijotajota kotere ngakiro nguna.

¹⁴“Ngikajwok a ngakawa torekinos kitijikis Babilon kiriama. Toguma esi daang Babilon a ngimalea a amod, kainyo kasechaki ngesi ayong Ekapolon Akuj.

¹⁵Tarama elii a ejie awadaang a ere! Ekea Babilon ngakan alojie. Abwang ngawasea keng aukor. Asutorit ayong nia Ngibabiloniae. Tatachak tokona na asubete kesi, tosubea kesi napei asubeta kesi luche.

¹⁶Nyiichamak ngikinyam itakinio nakwap ngina, kori ngamanat elemio anakwap kangina. Itwaan a akwap anache ni elomit neni, eemi ajore a ngasigerea na engaunit, tobong nawi keng.”

¹⁷Ebala Ekapolon Akuj, “Ikote ngitunga a Isirael ngamesekin na iritarete ngingatunyo kialasi. Esiauni kolong ekapolon a Asiria kitijik. Ani erumor tongereb ekapolon Nebukadinesa ngakoyo kech.

¹⁸Kotere ngakiro nguna, ayong Akuj Namerikanyer, na arai Akuj a Isirael, erirae Nebukadinesa ka akwap keng, loger lokolong eriraa ayong ekapolon a Asiria.

¹⁹Abuari ayong Ngisirael nakwap kech. Enyamete akimuj na erupunit alomoru a Karimel ka akwap a Bachan, nabo enyamete ngalemet daang na erupunito anakwap a Epiraim ka Gilead.

²⁰Ngirwa ngulu, emam akisech emini Isirael, emam aronis emini Yuda, kainyo arimakini ayong lu ajal ayong, emiek idongito. Ayong Ekapolon Akuj alimu nguna.”

²¹Ebala Ekapolon Akuj, “Kape kitijik ngitunga a Merasaim ka ngitunga a Pekod. Taar kesi tomunya pil. Tosub ibore daang ni kadungok iyong. Ayong Ekapolon Akuj alimu nguna.

²²Epupio echale a ejie anakwap, apean nginyas luaronok.

²³Edichakini Babilonia akwap daang etia ni etia kiala, nakaneni abwanga tokona akujuk ngina. Ariangakinosi ngibukui daang kotere ngakiro na asubakinosi alo Babilonia.

²⁴Babilonia, kitopegi iyong ayong, kirum iyong eloit lo alokakini ayong peiyeni iyong. Kianyun iyong kirumun

²⁵Angaa ayong edula a ngiboro alujiet Ango ayong epud ngiboro lu anyunyurar ayong, kainyo ayong Ekapolon Akuj Namerikanyer, eyei etich lo asaki akisub alo Babilonia.

²⁶Kitijikisi kesi alowaitin kadaang. Tobwanga ngidulae a ngikinyam keng! Kidilakisi ngiboro lu engatario wapei loger a ngatukioto a ngikinyam. Kinyasutu akwap ngina jik, tongop ibore idongi!

²⁷Taara ngasigerea kech daang! Tongola kesi kesi loger a ngimongin! Oitiakoi! Abe etioko nginyas aanyut ngitunga a Babilonia! Anang ngirwa lu iriraare kesi!

²⁸“Topupokisi! Apot lu edokinito alo Babilonia, apot Yerusalem, isisaate ngakiro na atachakinea Ekapolon Akuj na erai Akuj yok, ngakiro na asubeta Ngibabiloniae akai keng.

²⁹“Tanyarautu lua ngimalea a amod kitijikis Babilon. Tomeasi itwaan daang ni eyeni akiketakin emal a amod. Kiriama ere, nyeebuchar itwaan tani ipei. Tatachakisi daang nakolong asubete kesi. Tosubeta napei kolong asubeta kesi luche, kainyo ketepegi ngesi ayong enisakin, Akuj a Isirael naasegan.

³⁰ Akolongit ngina, edakakinosi ngisorok lorotin a ere. Tomunyarae ngasigerea keng daang. Ayong Ekapolon Akuj alimu nguna.

³¹“Babilonia, inisana iyong lokojokon. Kotere ngakiro nguna, ayong Ekapolon Akuj Namerikanyer, kanyoik iyong! Anang tokona akolongit nakeriraa iyong.

³²Nikenisan ilegeuni ibore, tadakar. Engopi itwaan itonyouni. Enokakini ayong akim lorerea keng tomunya daang lu iriamito ngesi.”

³³Ebala Akuj Namerikanyer, “Ngisirael ka ngitunga a Yuda, ichiakiaritae. Ngulu kolong erumunete kesi toriko, iratakinito lokojokon nyesakete alakakin.

³⁴Nakaneni egogong ekalakunan kech, ekiro keng ngesi Akuj Namerikanyer. Ngesi elope eikini kesi, yau ekisil nakwap. Ani Ngibabiloniae, inu ngichan.”

³⁵Ebala Ekapolon Akuj, “Nyope eremio akwara Babilonia! Nyope eremio ngitunga keng! Nyope eremio ngikapolok keng ta ngikoosok!

³⁶Nyope eremio akwara ngikadwarak keng, sodi tarata ngikabangabangae! Nyope eremio ngasigerea keng tomunyarae!

³⁷Nyope eremio akwara ngangolei ka ngaurukukui kech, ka ngasigerea kech na igiritae a, sodi kikokis ngaberu! Nyope eremio akwara ebari kech daang, sodi tangatarae!

³⁸Yau akamu nakwap, tooko ngangololin. Kainyo erai akwap a ngakujo anasubuna, na kitubulete Babilonia, ana esikerepikis ngitunga.

³⁹“Kotere ngakiro nguna, ngitieng a moding ka ngibuin luongora ta ngikaleeso,[31] epete Babilon. Nyeringa nabo ngitunga elomete neni a ngirwa a ngikaalak isidiunosi.

⁴⁰ Esubakin ngakiro napei nguna alo Babilonia loger lokolong asubakinotor alo Sodom ka Gomora, na enyasunea ayong kesi ka ngirerea lu edunyatar. Emam itwaan eringa elomi neni, nabo emam itwaan itori. Ayong Ekapolon Akuj alimu nguna.

⁴¹“Kingolikisi a, eponito ngitunga alokwap, ebukut loationon ka ngikapolok lukaalak. Eponito ejie anakwap anakalonak.

⁴²Etingito kesi ngakawa ka ngakwaaras. Emoitaka kesi emam ngisien. Eruosi loger a anam ana ekulae, emeto ngangolei kech. Erekina kesi esakete akitijikin Babilonia.

⁴³“Eira Ekapolon a Babilonia nguna, ating ngakan keng emudekeke. Ariabakin ngesi aanyu apipilu loger a aberu ana esaki akidoun.

⁴⁴“Abuni ayong Ekapolon Akuj atipei esipunga Ngibabiloniae alore kech, loger a engatuny alo elomuni anamoni a Yorudan tanangu nachokor nakaliban. Aseuni ayong itwaan ni asaki topolok ere ngolo, kainyo ngae kikwaanikin ka ayong? Ngae kibolo ka ayong? Ekeyokon ali kaweikini ayong?

⁴⁵Tokona bocha, kiira ngakiro na areat ayong Ekapolon Akuj kotere ere a Babilon, ka ngakiro na asaki asubea akwap a Ngibabiloniae. Iteni dir iriyario tani ngide kech, sodi tobul itwaan daang kotere ngakiro nguna.

⁴⁶Esaa lo elemarere Babilon, emini eruye loapolon noi lo itamaranikini akwap daang. Iirarete ngibukui luche akigoro keng.”