Read turkana Yeremia 51 Bible Online

Yeremia 51 - turkana bible

Yeremia 51

¹Ebala Ekapolon Akuj kona, “Kingolik a, etukutuni ayong ekuwam lo a nginyas nia Babilonia, ka ngitunga keng.

²Ameari ngitunga a akwap anache Babilonia, topietasi Babilonia Imiekinete kesi akwap elapat, na eremioto alowaitin kadaang, akolongit na ngichan.

³Wara ngikagumak nyiiketakis ngakawa kech, kori nyeenapa ngiboro lukigaet. Nyiilakak ngisorok keng! Tomunya ajore keng daang pil!

⁴Earakinio kesi lorerea a Babilonia, ewanio topero alorotin.

⁵Ayong Akuj Namerikanyer eringa nyengero Isirael ka Yuda, tani kasechakinito kesi ayong Akuj a Isirael naasegan.

⁶“Tamataros alo Babilonia! Toyuu itwaan daang akiyar keng! Wara nyikiar kotere akisech a Babilonia. Anang tokona ni atachakinea naaronok, erira ngesi loger lo itemokino.

⁷ Ekoni Babilonia ekopo lo egolit anakan kang, esirakanari akwap daang epurot. Amaase ngibukui emuna keng kikerepik.

⁸Aukor Babilonia atipei enyasun. Kigorotor! Kiwasakisi ekitoe najemei keng, ejok toyei kona engalekinete.”

⁹ Atamarete ngitunga a akwap anache lu alomito neni, “Kisaki sua akitangalekin Babilonia, nakaneni towout ngajemei keng angalekin. Kimiekisi, tonyoutu atoloto, tolot itwaan daang nakwap keng. Erira Akuj Babilonia niaronon noi, anang eriras keng nadis.”

¹⁰Ebalasi Ngisirael, “Edodiu Ekapolon Akuj atamar emam ibore kisechit ngoni. Potu atolimosi alo Sion. Ngakiro a etich a Ekapolon Akuj ana erai Akuj yok.”

¹¹Ekurukurok Ekapolon Akuj ngikapolok a Media, ani esakea akinyasun Babilonia. Eger ngolo etachakinea ngesi ngakiro a akai keng ana enyasunio. Ebalasi lu itijikinito, “Kipenasi ngimalea kus a amod! Tolemutu ngaupwala!

¹²Kikeasi abendera a ejie toremere ngawasea a Babilon. Kisibaka ngasigerea. Kiwaakisi ngiketeok! Toperutu ngimoe!” Kainyo Ekapolon Akuj areki nabo asubaki, nakolong abala asubea Babilon.

¹³ Ee, esi lu ilomito nangololin nakaalak, tabarito. Anang esal kus, atubo irukan a akiyar kus.

¹⁴Akuj Namerikanyer ekong a ekiro keng a ilope. Ebala ayauni ngajorei nakaalak etia asepich a emaase, kiremasi kesi ani kidwangeta esi.

¹⁵Asubi Ekapolon Akuj akwap a agogongu keng. Tosubak akwap a aosou keng, sodi kiguro adis a achwaanu keng.

¹⁶Na edungunio ngesi akiroit, torukis ngakipi na eyakasi kidiama adis.[32] Kitonyou eloch anasalunet a akwap. Kisitoru akimilea nakiru, talakak ekuwam anisek egolokino.

¹⁷Ebangaana itwaan daang iwaarit, Irumito ngileech itwaan ni esubi ngakujo nasubuna Irumete ngileech kotere ngakujo nguna, kainyo eraakasi ngakujo nguna ngaka alioko, nyeyarete.

¹⁸Eraakasi kesi ngapasiek, ejoikinit ekianare. Inyasunio na ebunio Ekapolon Akuj akirirare kesi.

¹⁹Kainyo nyikwaan Akuj a Yakobo ka ngakujo nasubuna nguna, ngesi kolong asubuni ibore daang. Nabo aseu ngesi Isirael aliwor ebukut keng a ilope. Akuj Namerikanyer ngesi erai ekiro keng.

²⁰Ebala Ekapolon Akuj “Babilonia, irai iyong akujuk kang, irai iborosit ni ejie. Ngesi abwangabwangaa ayong ngibukui, ngesi enyasunea ngapolosio.

²¹Ngesi abilibilaarea ngangolei ka lu edokinito. Ngesi abilibilaarea ngaurukukui ka ngikameak ngaurukukui nguna.

²²Ngesi anyilinyilaarea ngikiliok ka ngaberu, atonyilinyilaa lumojong ka lusorok, lusapa ta lupesur.

²³Ngesi angolea ngikeyokok ka ngisipaan kech, atongolea ngiketak ka ngirukitos kech, ngesi eriakinea ngikaweikinak a arieng ka ngikarikok a ngasigerea.”

²⁴Ebala Ekapolon Akuj, “Kingolikinete esi ayong atachakini ani a Babilonia ka ngitunga keng, ngakiro daang naaronok nakolong asubeta kesi Yerusalem.

²⁵“Babilonia, irai iyong emoru lo inyasuni akwap daang. Kingolik a, ayong Ekapolon Akuj, kanyoik iyong. Kanyoikini ayong iyong, kekokoriuni ayong iyong anakope, ketiliwo emoru lo anomia.

²⁶Engopi amoru elemunio anikon todukokinere agule a akai. Engopi amoru elemunio anikon todukokinere ngateak a akai. Ikokini iyong jik ariet. Ayong Ekapolon Akuj alimu nguna.

²⁷“Kikea abendera a ejie! Tokutak aburuch kiirasi ngibukui! Kitonyou ngibukui kitijikis Babilonia! Tanyarau ngapolosio a Ararat, ka Mini ta Achikenas, kitijikis ngesi. Toseu ekarikon a ngasigerea lo eremi ngesi. Toneteu ngangolei loger a asepich a emaase.

²⁸Kitonyou ngibukui kitijikis Babilonia. Tanyarau ngikapolok a Media, ka ngikarikok kech ka ngikaweikinak a arieng, ta ngasigerea a ngakwapea kadaang ana epolokinito kesi.

²⁹Emaranikini akwap torikirikok, kainyo eweikinit Ekapolon Akuj ngakiro na esaki asubea Babilonia. Esaki akitiliwor Babilonia alaireng, na emam itwaan elomi.

³⁰Apalikis ngasigerea a Babilonia ejie. Aliwor ibooyete anawasea kech anakaagongok. Akuriaketa kesi, ekokis ngaberu. Anom akim ngakais kech, Abwangasi ngasua a ngidorin a ere kech.

³¹Epeuni itwaan ipei kiriamun ka niche. Bu emeuna epei kiriamun ka loche. Alimokin ekapolon a Babilon atamar abwang ere keng alowaitin kadaang.

³²Alemasi ngimoe ngidoketa a angolol. Echunyakis atiriwae alokwaas a angolol. Abul ngasigerea a Babilonia.

³³Ayong Namerikanyer, na arai Akuj a Isirael abala, ebuni emoit atipei kirira ngitunga a Babilonia, kipuda kesi loger a ngikinyam, alu eyakasi ni iriere.”

³⁴Epudaari ekapolon a Babilonia Yerusalem, kirika. Echidari ngesi ibore daang kaneni, kidong elapat, kiliko loger lo ilikorea etiengit lokanyaman. Tose nikatoronon kilelebea akook keng, tachaka nipiya.

³⁵Etamarete ngitunga a Sion, “Ngawat kosi na ewanitae, epaikinio Ngibabiloniae!” Etamarete ngitunga a Yerusalem, “Ngaakot kosi, epaikinio Ngibabiloniae!”

³⁶Kotere ngakiro nguna, ebala Ekapolon Akuj kona, “Kaikini ayong iyong atatachak na kisubere. Etooni ayong eitanit a Babilonia. Etooni ngangololin keng.

³⁷Eliwor Babilonia asakatan na etukokina. Achukut a ngikolowoi, ibore ni kitubuli, ka ibore ni ijotajotare, tongop itwaan elomi neni.

³⁸“Irurumaate Ngibabiloniae loger a ngingatunyo, kingoorata loger a ngitak a ngingatunyo.

³⁹Ekoe, etingit kesi etereku a akimuj a? Edorokini ayong kesi akimuj nakaalan esimuj, ani erumor etamat epurot kiraka, sodi talakaros. Ejotoorosi ngaju nakajik, nyekenyunete jik. Alimu Ekapolon Akuj nguna.

⁴⁰Arikuni ayong kesi loger a ngimesekin aluuchik, tongolae loger a ngimesekin ka ngikora.

⁴¹“Alemar Babilon, ere lokolong epuruunito ngibukui daang. Aliwor tokona lo kitubuli alokiding ngibukui.

⁴²Aleleki anam Babilon. Aburuchia a ngitoroi alukaruok.

⁴³Erai ngirerea keng lu kitubulete. Aono akwap deu aliwor ariet. Akwap na emam itwaan elomit, emam tani ekaloton itori.

⁴⁴Erirae ayong Bel, akuj a Babilonia, eteleku ngiboro lukokoa. Nyeringa nabo ngibukui erimaate nikeng. Aukorosi ngawasea a Babilon.

⁴⁵“Tamataros alo Babilon, ngitunga kang! Toyuun itwaan daang ananyunyura kang anaaronon!

⁴⁶Warasi ngitai kus nyiipirisaarosi kori nyieam kotere ngakiro na iirasi. Epetarosi ngakiro ekaru epei ani erumor topetaros nache ekaru loche. Ngakiro a ekurikur alo eyei nakwap, tamarae etijik ekapolon epei loche.

⁴⁷“Enangi ngirwa lu eriraa ayong ngakujo nasubuna a Babilonia. Irumete ngileech akwap daang, eario ngitunga keng daang.

⁴⁸ Sodi adis ka akwap ka ibore daang ni eyei nikech, eeokinete elakara kotere Babilon, kainyo epote ngitunga lu emunyarete Babilon, epote alokwap.

⁴⁹Eukorio Babilonia ani aarea Ngisirael, ka ni aarea ngitunga a akwap kadaang.”

⁵⁰“Esi lu ibucharosi anakwara! Kapesi, nyiwaa! Tani kiloka esi anawiyei kus, kitamunae ayong Akuj kus. Kitamanasi tani Yerusalem.

⁵¹Abe ibalasi esi, ‘Kititing sua etimoi nabo kisurum ngileech. Kingopik sua kona kikokini, kainyo ngitunga a akwap anache alomasi ni italeuno alokai a Akuj.’

⁵²“Tokona bocha, kingolik a, alimu ayong Ekapolon Akuj atamar, enangi ngirwa lu eriraa ayong ngakujo keng nasubuna. Anakwap keng kadaang, ikalounete lu ewanan tokunuas.

⁵³Tani kedoka Babilon kidiama, todukok awas nakaagongon inaa, ameari ayong ngitunga kinyasut ngesi. Ayong Ekapolon Akuj alimu nguna.”

⁵⁴Ebala Ekapolon Akuj, “Topupokisi! Ebunit akigoro ngina alo Babilon! Akigoro a nginyas aluapolok anakwap a Ngibabiloniae.

⁵⁵Enyasunit ayong Babilon Esililingi eruye keng loationon. Ekerete ngajorei kech loger a ngitoroi alukaruok, ejiete echalasi lokojokon.

⁵⁶Apot kesi akinyasun Babilon, erumun ngasigerea keng, Abilibilaar ngakawa kech. Arai ayong Akuj na erirae naaronok, nakaneni asubakinea Babilon na echamit esubere.

⁵⁷Esirakari ngikatukok keng epurot, ka ngikoosok, ka ngikarikok, ta ngikarikok a ngasigerea. Ejotoorosi kesi nakajik nakaneni nyekenyunete jik. Ayong Akuj Namerikanyer alimu nguna.

⁵⁸“Alimu ayong Akuj Namerikanyer kona, awas naapolon a Babilon, aukokin nalup. Ani ngidorin keng lukooyak, echunyakin akim. Esubete ngitunga etich pas. Ituburuna kesi kotere ibore ni enomiari akim.”

⁵⁹Emeanara a ekapolon Sedekia, anyaritae Seraya lokookeng a Neria, tarai etatait a Maseya. Ekaru loa nguomwon lo araakar Sedekia ekapolon a Yuda, apot Seraya ka ekapolon Sedekia toloto Babilonia. Abu ayong Yeremia esuruor Seraya.

⁶⁰Egirak ayong nakitab naga nginyas daang lua Babilonia, ka ngakiro nache daang.

⁶¹Atolimok ayong Seraya atama, “Ani inangi Babilon, echamit isomakini ngitunga ngakiro nugu.

⁶²Ani erumor kilip kona, ‘Ee Ekapolon Akuj, ilimu iyong atamar inyasuni nege, tongop ibore emini nakwap naga, alotunga ka ngitieng. Eliwor nege ariet jik.’

⁶³Ani irumori akisomare akitab naga, toinik namoru kimasa nangolol a Eupurate,

⁶⁴ sodi tama, ‘Ikokini Babilonia etiyaar neni, nyiikeun nabo jik, kainyo eyauni Ekapolon Akuj nginyas luaronok nikeng.’ ”[33] Esal a ngakiro a Yeremia logo.