Read turkana Yeremia 52 Bible Online

Yeremia 52 - turkana bible

Yeremia 52

¹Araakasi ngikaru a Sedekia ngitomwon-arei ka epei na aliworor ekapolon a Yuda. Toliwor ngesi ekapolon alo Yerusalem a ngikaru a ngitomon ka epei. Anyaritae itiokeng Amutal, nakookeng a Yeremia alo a ere a Libina.

²Tosechak ekapolon Sedekia Ekapolon Akuj, loger losek asechea apakeng Yeoyakim.

³ Tongoik Ekapolon Akuj ngitunga a Yerusalem ka lua Yuda noi, kitwarak kesi alongaren keng. Tonger Sedekia ekapolon a Babilonia lo anyaritae Nebukadinesa.

⁴Akolongit na ngatomon a elap alo a ngitomon a ekaru alo a ngikan-koomwon araakar Sedekia ekapolon, kirukut Nebukadinesa ka ajore keng daang toremo Yerusalem . Toloma kesi nikalapatan ere toduko ngakatiputipui kiriama ere.

⁵Kiriama kesi ere tanang ekaru lo a ngitomon ka epei lo araakar Sedekia ekapolon.

⁶Akolongit na ngakan-koomwon a elap alo a nguomwon a ekaru kangolo, torirau eron a akoro noi tongop ibore iche enyamio,

⁷apon ngawasea a ere tobwangae. Eriamito Ngibabiloniae ere, tani kikokini neni apot ngasigerea daang tosiwa alore nakwaare. Ewapete kesi erot lo elosere mana a ekapolon, kitoro lorot lo imorikinit ngawasea naarei, sodi tamataros lowae a adipo a Yorudan.

⁸Nakaneni abu ajore a Ngibabiloniae kiritasi Sedekia, kirumut anaroatin ana eyakasi diyete Yeriko. Apot ngasigerea a Sedekia dang toikis ngesi kaneni.

⁹Kirumut kesi ekapolon Sedekia torikosi nia ekapolon Nebukadinesa, alo ayei lore a Ribila nakwap a Amas, kirira Nebukadinesa Sedekia kaneni.

¹⁰Alo Ribila, taar Nebukadinesa talokookeng a Sedekia itee apakech, taar tani ngikatukok a Yuda.

¹¹ Ani erumor topuyok Nebukadinesa ngakonyen a Sedekia, sodi toenae a ngiriko torikoroe Babilon. Kiboi Sedekia alojela alo a Babilon tanang akolongit na atoanea.

¹²Akolongit na ngatomon a elap alo a ngikan, a ekaru alo a ngitomon ka ngikan-koomwon alo araakar Nebukadinesa ekapolon a Babilonia, abu Nebusaradan lo arai ekesuruoron a ekapolon tarai ekarikon a ngasigerea, toloma Yerusalem.

¹³Kinom ngesi akai a Akuj, ka akai a ekapolon ta ngakais a ngitunga kadaang alu ayenikinitae alo Yerusalem.

¹⁴Tobwanga ngasigerea a Ngibabiloniae ngawasea a ere.

¹⁵Ngitunga lusek edongito, abu Nebusaradan torik Babilonia.[34] Ngitunga ngulu kesi ngikunonoi, ka ngitunga lukolong asiyete toloto Lobabiloniae.

¹⁶ Nakaneni abu ngesi kimiek alo Yuda ngitunga ngiche lu eboosit, lu amam ibore kech ayei. Kitusub ngesi ngitunga ngulu etich anamanat a ngimusabib ka ngamanat nache.

¹⁷Tobwangabwangata Ngibabiloniae ngapirio a ngasua ananyangayek ka ngakitoweet na ijukio na ayakasi kai a Akuj, ta atanki a asuat ananyang. Apot kesi yaasi ngasua nanyangayek daang Babilon.

¹⁸Tolemasi kesi tani ngakalobochio nawadet ngalup, ka ngiboro lu ekuron lu itosegere ekeno a Akuj, ka ngiboro lu isutanarere ngataae ka ngatubwae na iwoore ngaakot a ngibaren alu a ngakipeyos, ka ngatubwae na inomere emitina ta ngiboro luche a ngasua ananyangayek daang, lu esubere etich alokai a Akuj.

¹⁹Tolemasi kesi ibore daang ni arai ika egolit, kori akwangat, kesi ngitubwae luuchik, ka ngabelekeke nalemet akim, ka ngatubwae na iwoore ngaakot a ngibaren alu a ngakipeyos, ka ngiboro lu ekuron, ka ngasipet a ataa, ka ngatubwae na inomere emitina ta ngatubwae na idokuunere emuna lo a ngakipeyos.

²⁰Ngapirio naarei a ngasua ananyangayek nakolong asubuni ekapolon Solomon kotere akai a Akuj, araakasi ngakitoropiet ngaarei, ka ngaurukukui na ijukio, ka atanki naapolon ta ngimongin lutomon ka ngiarei igangito. Apotiok ngiboro ngulu amam kona itemio.

²¹Ariyan ngakitoropiet naarei nguna. Arai aoyau a apei kech ngamitae ngakan-kauni, tarai ngamitae 5.3 elukuna. Aororete kesi. Arai alangirir a asuat ngamilimitae 75.

²²Kidiama aropiet daang, ayei apir a asuat ananyang arai aoyau keng ngamitae 2.2, kiriamito ngasua na iriwokina, na etisiritoe a asir ana ikwaan ka ngalam ana asubunitae daang anasuat ananyang.

²³ Aloriko a aropiet kadaang, ayakasi ngalam amiat apei. Anasir a apei a ngalam kanguna, atakanete analup ngatomwon-koomwon ka ngakan-kapei.

²⁴Abu Nebusaradan lo arai ekarikon a ngasigerea toen tani Seraya lo arai emuron loapolon a Akuj, ka Sepania lo arai emuron lo atupit Seraya ta ngikapolok luuchik nguuni lu asubete etich alokai a Akuj.

²⁵Toriko ngesi alore kangolo itwaan nisek arai ekarikon a ngasigerea, ka ngikesuruorok a ekapolon ngikan-kaarei lu ayakasi lore ta itwaan ni atupit ekarikon a ngasigerea. Itwaan ngini aweikinit ngakiro a ekimar a ngasigerea. Toriko tani ngitunga ngiche ngitomwon-kapei lu ayenikinitae.

²⁶Toriko Nebusaradan kesi nia ekapolon a Babilonia, alo eyei lore a Ribila,

²⁷nakwap a Amas. Tolim ekapolon kaneni atamar kibungae kesi ani erumor taarae. Apon ngitunga a Yuda kikokinae erikio neni, kipudoroe anakwap kech.

²⁸Erai logo ekimar a ngitunga alu erumiari Nebukadinesa eraakasi ngirikon. Ekaru keng lo a ngikan-kaarei araakar ekapolon, kirumia ngirikon ngabunge ngauni ka ngitomwon-arei ka nguuni.

²⁹Ekaru lo a ngitomon ka ngikan-kauni araakar Nebukadinesa ekapolon, abu kirumia ngirikon ngamiae ngakan-kauni ka ngitomwon-uni ka ngiarei alo Yerusalem.

³⁰Ani ekaru lo a ngitomwon-uni araakar Nebukadinesa ekapolon, kirumia Nebusaradan ngirikon ngamiae ngakan-kaarei ka ngitomwon-omwon ka ngikan. Ngitunga daang lu erumiario, arai ekimar kech ngabunge ngoomwon ka ngamiae ngakan-kapei.

³¹Ekaru lo aliworor Epilimerodak ekapolon a Babilonia, abu ngesi kidodiu ajokis ani a ekapolon a Yuda alo anyaritae Yeoyakin, talachak ngesi alojela. Asubakini ngesi ngakiro nguna akolongit na ngatomwon-arei ka ngakan, a elap alo a ngitomon ka ngiarei adaunet a ngikaru a ngitomwon-uni ka ngikan-kaarei, erumiarere Yeoyakin torikoe.

³²Kisuruor Epelimerodak ngesi niajokon kidodik ngesi arima noi akidwang ngikapolok luche daang lu ainikinitae ka Yeoyakin Babilonia.

³³Apon tachamakinae Yeoyakin ebutori ngiworui lusek aenitere tanap lukeng a ilope. Ngirwa daang, lu ayarea ngesi, toliwor imujeene alomeesa alo emujeenea ekapolon.

³⁴Akolongit daang, ainanakinio ngesi ngaropiyae na egielea ibore ni esaki, ngirwa daang lu ayarea ngesi.