Read turkana Yeremia 7 Bible Online

Yeremia 7 - turkana bible

Yeremia 7

¹Erai naga akiroit na alimokini Ekapolon Akuj Yeremia tama,

²“Towo anakituk a akai a Akuj kiruor ngakiro nugu, topupokisi ngitunga a Yuda lu ilomete tooma akilip Ekapolon Akuj.

³Ebala Akuj Namerikanyer, na erai Akuj a Isirael kona: Kibeleto elote kus ka ngakiro na isubete sodi kemiek ayong esi toloma nege.

⁴Tapalikisi akigieno ngakiro na alioko ibalatar esi ‘Kibooyi sua akaalimon! Erai nege akai a Ekapolon Akuj, erai nege akai a Ekapolon Akuj, erai nege akai a Ekapolon Akuj!’

⁵“Kainyo ani kibeleto elote kus ka ngakiro na isubete esi, tosubea ipei kus daang niche na eriyan,

⁶ani kijongoto akichiakiarit ngitunga a akwap anache, ka ngikokiok ta ngapuseru, sodi tojongoto akiar ngitunga lu nyesechito anakwap kana, tapalikis akilipit ngakujo nache, na kinyasunete esi,

⁷ ani kibeloto esi nguna daang, kemiekini esi toloma nakwap naga, akwap nakolong ainakini ayong taapaakus a angorot.

⁸“Kingolikisi a, igienosi esi ngakiro na eraakasi ngapasiek.

⁹Ikokoyete esi, iarete, ilomete, ikongete alioko, ilemanakinete akuj nabe Baal ngakipeyos, kilipito ngakujo na nyeyena esi a ache.

¹⁰Ani erumor pot towaa alongaren kang, alokai ana elimitere ekiro kang kana, sodi tamasi, ‘Kibooyi sua akaalimon’, tarai irubakinito esi akisub ngakiro nakakadakinito ayong nguna!

¹¹Ikwa keliwor akai na elimitere ekiro kang aburibur na eduketa ngikokolak a? Toyena atamar aanyunga ayong daang na isubete esi!

¹²Kapesi tokona Chilo[5] nikolong esiauni ayong atoseu kelipeenere. Kingolikisi nakolong asubea ayong Chilo kotere ngasechesea a ngitunga kang, Ngisirael.

¹³Isuba esi ngasechesea nguna daang, ani na abongokinio akisuruor esi, ipot towout apupokin. Towout esi akikere nakanyaraa.

¹⁴Kotere nguna, asubea ayong akai na elimitere ekiro kang naga, ngakiro nakolong asubea ere a Chilo. Akai naga igienosi esi. Nikolong ainakini ayong taapaakus nege, asubea ngakiro napei kolong asubea Chilo.

¹⁵ Ketwarakini esi alongaren kang, loger lokolong etwarakinea ngiyenet kus, ngalesea a Epiraim daang.”

¹⁶Alimuni Ekapolon Akuj tama, “Yeremia, nyiilipak ngitunga lugu. Nyikigoronok ayong kotere kesi, kori nyiilipak. Nyikimaima ayong kotere kesi kainyo nyeirari ayong ngakiro kon.

¹⁷Ikwa nyitee iyong ngakiro na esubete kesi alorerea a Yuda ka ngirotin a Yerusalem a?

¹⁸Ikeyenunete ngide ngakito, kinokakis taapakech akim, tomunakis taito ngakiria, kidorokinioto ngamugati a akuj naberu enyaritae akapolon a adis. Ani nabo dang, elemanakinete kesi ngakujo ngache ngakipeyos a emuna, ketilileta ayong.

¹⁹Nakaneni mono tokona, ayong ketililiete kesi a? Ewanasi kesi make kiruma ngileech!

²⁰ Kotere ngakiro nguna, alimunit ayong Ekapolon lo arai Ekapolon Akuj kona, ‘Abukokini angoit kang ka anyunyura kang nege, lotunga, ka ngitieng, ka ngikito ta ngalemet. Ikokini angoit kang akim na emam itwaan itudunge. Ikoni angoit kang akim na emam itwaan itudunge.’ ”

²¹Alimu Akuj Namerikanyer na erai Akuj a Isirael kona, “Ngakipeyos napalem inomio tonomiasi, kiatakisi nakipeyos na inyamete esi. Kalimokinit tokona ayong esi atamar tanyama ngakipeyos nguna daang.

²²Kainyo akolongit nakolong epudunio ayong taapaakus alo Misiri, emam ngakiro adungok ayong kesi anakipeyos ana inomio tonomiasi, kori anakipeyos anache.

²³Nakaneni adungokinit ayong kesi atamar kiwapa akiroit kang, atoliwor ayong Akuj kech, toliworos kesi ngitunga kang. Alimokinit nabo atamar kiboikinos kesi loger lo adungokinit ayong, taanyuneta eboyor loajokon.

²⁴Nakaneni apot kesi nyiiwapakis kori nyeedetasi ngaki, pearai apot tosuba loger lo arikitotor kesi ngitai kech lukechanak aronok. Toliworos ebongete kaku akidwang alosit ngaren.

²⁵Napei kolong apudunioto taapaakus alo Misiri tanang akolongit naga, nyepalikina ayong ameanar ngikasubak etich kang ka ngikadwarak nikus jiik.

²⁶Nakaneni emam itwaan epupokini ngakiro kang todeta akit, akidwang akikokin neni, ipot esi kichanaketa noi, toroketa akidwang taapaakus.

²⁷“Tokona Yeremia, tolimok kesi ngakiro nu daang, nakaneni nyepupokinete kesi. Inyarae iyong kesi nakaneni nyikiyete.

²⁸Ilimokini iyong kesi tama, ‘Ebukut logo ngesi lo awouni akiwap ngakiro a Ekapolon Akuj, ana erai Akuj kech, towou arikin na erirare. Adaun iteni, nyeringa ngakituk kech elimito.’

²⁹ “Toluro, ngitunga a Yerusalem. Tachakasi ngitim. Kigoro tosutonokis anaitae a ngimukur anilapat, kainyo angoit ayong Ekapolon Akuj anger ngitunga kang.

³⁰“Asecha ngitunga a Yuda alongaren kang. Etowaa ngakujo kech nasubuna nakikadakinete alokai kang, enyasut.

³¹Aduko kesi ekeno lo enyaritae Topes nadipo a lokookeng a Inom, tachakakineta talokookech ka tanakookech nakim tarata ngakipeyos. Nyedungokina ayong kesi atamar tosuba kongina, kori amam nguna tani na etamit ayong.

³²Kotere nguna, enangi ngirwa lu epalikinere anyarit neni Topes kori adipo a lokookeng a Inom, pearai enyarao adipo a Aaranot. Enukakinio ngitunga neni kainyo engopi nabo wache enukakinio.

³³Eliworosi ngawat a ngitunga alukatoak kangulu akimuj a ngikieny ka ngitieng a moding, nakaneni emam itwaan esuri kesi.

³⁴ Alorerea a Yuda ka ngirotin a Yerusalem, atubori ayong ekare ka akimaritetere ta akinyiakanar a akuuta, kainyo eliwor akwap ariet.