Read turkana Yeremia 8 Bible Online

Yeremia 8 - turkana bible

Yeremia 8

¹“Ngirwa ngulu, ngakoyo a ngikapolok a Yuda, ka na ngikasubak etich a arieng, ka na ngimurok a Akuj, ka na ngikadwarak ta na ngitunga alu elomito Yerusalem, ekutunio analielin.

²Emam itwaan enuki ngakoyo nguna, ikokinete analup ngasike, kialarae alongaren akolong, ka elap ta ngikanyer lukolong aminasi ngitunga ngulu tosubete etich kech. Ngiborei ngulu asakanarete kesi kilipa.

³Ngitunga daang lupiyayek a ebukut aloaronon kangolo, awadaang ani kolong apetakini ayong, egaase akitu akidwang akiyar. Ayong Akuj Namerikanyer alimu nguna.”

⁴Ilimokini iyong kesi tama, ebala Ekapolon Akuj kona, “Ekoe, na edakarotor ngitunga, ikwa nyenyounete nabo a? Ani kedepa ipei erot, ikwa nyebonguni nabo lorot a?

⁵Ani nyo bo, areatar ngitunga lugu, torubakis ikote neni, nyiibongut nikang? Eneikina kesi longalas, towout abongun nikang.

⁶Adetarit ayong akit apupokinit, nakaneni emam akiroit a iteni tani apei ilimut esi. Emam itwaan eriangakina kotere aronis keng. Kori emam ni ingita ebala, ‘Nyoni asub ayong?’ Itorit itwaan daang lorot keng a ilope, loger a angole ana ibiroro lojie.

⁷Eyenete ta pelekuto dang esaa lo ebongunioto. Ngakurio ka talogecha ta ngiumio, iwapito ngirwa lu eramanakineta. Nakaneni nyeyenete ngitunga lukang lugu, ngitalio kang, ayong Ekapolon Akuj.

⁸Ikokinete esi itamarete, ‘Kiosok sua, kiyeni ngitalio a Ekapolon Akuj.’ Ikwa ngikegirak lukaliokok, eloch ngitalio kang!

⁹Irumete ngileech ngikoosok kus. Ibileri kesi kikokis lu esipok. Angero kesi akiroit kang, ayong Ekapolon Akuj. Aosou ani tokona aanyut kesi?

¹⁰ Kotere nguna, alemuni ngaberu kech ainakini ngitunga luche. Ani ngamanat kech, epotok ngitunga luche tolemasi. Kainyo napei ani nyeyenikinitae tanang ni eyenikinitae, iterekuyarit aanyun ebari a amodeanut. Napei alokadwarak tanang lomurok a Akuj, eliokoko daang.

¹¹Itedekete ngajemei a ngitunga kang ipasakinito. Ebalasi, ‘Eyei ekisil’, tarai emam ekisil.

¹²Apot mono kiruma ngileech na asubeta ngakiro nakikadakinete nguna? Mam jik! Nyiruma kesi ngileech jik. Peayenete tani atamar akirum ngileech nyo. Kotere nguna, edakarosi kesi loger lo edakarotor luche. Na erira ayong kesi, eliwor esal kech ngolo. Ayong Ekapolon Akuj alimu nguna.”

¹³Ebala Ekapolon Akuj kona, “Asaki ayong achunakin ngitunga kang, loger lo echunakinea itwaan ngalemet. Nakaneni ikote esi ngimusabib lu nyekoniunete ngamusabib. Ikote esi ngimeyana lu nyekoniunete ngameyana. Nabo aoniyosi tani ngakui kech. Kotere ngakiro nguna, emiek ayong ngitunga lugelayek elemarete akwap.”

¹⁴Ingitasi ngitunga a Akuj ebalasi, “Nyo mono kibooyo ngoni kirwaritor? Tonyoutu atamataros lorerea lu eyakasi ngawasea atotoniasi inaa. Ekapolon Akuj, Akuj yok, atiaku atamar kitoaki ngoni. Kiinak ngoni ngakipi iwaakinitae ekitoe lokaaran atamata, kainyo kisechak ngoni ngesi.

¹⁵Kigieno atamar ataanyutu ekisil, nakaneni emam ibore ajokon kianyu. Kigieno atamar kitangalekinoe ngidekesinei, nakaneni ebuloi kipot ataanyutu.

¹⁶“Anangut ngimoe lore a Dan, Epupio ngangolei kech itusasi. Na erukinioto ngangolei kech a ejie, tamaranik akwap daang. Apot akinyasun akwap ka ibore daang ni eyei nakwap. Apot akinyasun ere ka ibore daang ni eyei lore.

¹⁷Tochoikinos! Kainuni ayong esi ngimunio. Ngakipomea nakadwarak na emam itwaan ipipauni. Kikonyete esi ngakipomea nguna. Ayong Ekapolon Akuj alimu nguna.”

¹⁸Kangopiki kona esililinga, atojongo akialolong. Echanakin etau kang.

¹⁹Topupok! Wadaang anakwap, apupi ayong ngitunga kang igorosi ebalasi, “Ekoe, emam Ekapolon Akuj alo Sion a? Emam ekapolon a Sion alore a?” Etachuni Ekapolon Akuj na erai ekapolon kech tama, “Nyo kitongoitotor esi ayong ilipitotor ngakujo nasubuna ka ngakujo nagelayek?”

²⁰Nakaneni igorosi ngitunga ebalasi, “Adaunosi ngalemet, esiak akamu, toringa ngoni nyeyuuna.”

²¹Alilimiyo etau kang kainyo alilimiyosi ngitunga kang. Egoro ayong, kabul noi.

²²Ekoe, emam ekitoe matat alo Gilead a? Emam ngiketedeakak kaina? Ani nyo awounea edeke a ngitunga kang angalekin?