Read turkana Yeremia 9 Bible Online

Yeremia 9 - turkana bible

Yeremia 9

¹Arai bo tarai akou kang akar a ngakipi dang, ani ngakonyen kang tarata eitanit a ngakiyo, kegor ayong apaaran ka akwaar, kotere ngitunga kang lu aario.

²Arai bo toyei ni alomi anariet dang, kadok ayong alotunga kang. Kainyo eraakasi daang ngimalaae a ngakujo, eraakasi ajore a ngirukooi.

³Ekudokinete kesi ngangajepa kech loger a akau togumasi engalas Aliwor alioko epolokinitere akwap, meere iteni. Idokete ngitunga kang aronis naronis nache, nabo nyakalimorito ayong atamar arai Akuj kech. Ekapolon Akuj alimu nguna.

⁴Ejoikinit itwaan daang iyoki ekidunyet keng, kori nyiigienokin lokaatokeng. Kainyo ingalana itwaan daang, nabo eswami itwaan daang ekidunyet keng.

⁵Ingalae itwaan daang ekidunyet keng, emam tani ipei iruoro iteni. Itanaikinito kesi ngangajepa kech alioko. Esubete kesi naaronok akuruwo akilung.

⁶Ichiakiarete itwaan ipei, ani eringa kichiakiasi niche, kiata engalas longalas loche. Awout alimor ayong. Ayong Ekapolon Akuj alimu nguna.

⁷Kotere nguna, ebala Akuj Namerikanyer, “Etokeari ayong kesi loger a asuat ening, kainyo nyaanu ngache asubea ngitunga lukang lugu?

⁸Ikote ngangajepa kech ngimalea a amod, lu iwasakinitae ekitoe lokaaran, nyepalikinete akisud ngakiro. Itobobokinit ipei kech daang ekidunyet keng akituk, tarai imanit alotau.

⁹Ekoe, nyerirae ayong kesi kotere nguna? Ikwa nyatachakini ayong ngakiro na asubi ebukut lo ikoni logo a? Ayong Ekapolon Akuj alimu nguna.”

¹⁰Atolim ayong atama, “Egoror ayong ngimoru atosutonok, eute kotere nginyia lua ariet, kainyo aoko deu, emam itwaan itori neni. Emam itwaan eringa epupi eruye a ngaatuk. Epungarosi ngikieny ka ngitieng a moding angopiasi.”

¹¹Ebala Ekapolon Akuj kona, “Enyasuni ayong Yerusalem. Ee robo, etiliwori aburibur a ngikolowoi. Etiliwori ngirerea a Yuda alaireng, ni emam itwaan elomit.”

¹²Engis ayong atama, “Nyaai ni eyei ekooson lo eyenuni ngakiro nugu? Ngae alimoki Ekapolon Akuj ngakiro nugu esaki atamar kiruor? Nyo enyasunor akwap edongio erai alaireng, tongop tani itwaan itori neni?”

¹³Tatachu Ekapolon Akuj tama, “Erai ni angerioto kesi etal kang lokolong ainakini. Nyiwapa kesi ngakiro kang kori nyesuba kesi na alimokini ayong.

¹⁴Akikarun akikokin neni, echanaketa kesi alomasi akilipit akuj nabe Baal, loger lokolong etatameta taapaakech kesi.

¹⁵Tokona bocha, topupok na asubakini ayong Akuj Namerikanyer, na arai Akuj a Isirael. Ainakini ayong ngitunga kang akimuj naadwaran tanyama, ainak ngakipi na iwaakinitae ekitoe lokaaran tamata.

¹⁶Apetakini ayong kesi lobukui lusek nyeyenete kesi, kori taapaakech. Ameari ayong ngasigerea na itijikinete kesi, tomunyasi daang.”

¹⁷Ebala Akuj Namerikanyer kona, “Kitamasi ngakiro na esubasi! Tanyarautu ngaberu na igorosi tosutonokis. Ee robo, tanyarautu ngakunonoi a ngieosio alu enukere ngitunga.”

¹⁸Tolimut ngitunga tamasi, “Tolimokisi kikomaut kitoeokis sua ngieosio lu enukere ngitunga, talakakis ngakonyen kosi ngakiyo, tachalachala ngakiir a ngakonyen ani igorore.”

¹⁹Epupio akigoro alo Sion ebala, “Kibukor kare sua! Kisurum ngileech lokojokon! Kiisik sua akwap kosi kainyo abwang ngakais kosi.”

²⁰Atolim ayong atama, “Ngaberu, kiirasi ngakiro a Ekapolon Akuj. Todetasi ngaki kiirasi ngakiro keng. Kitatama tanakookus eger lo igorotor tosutonokis. Ani ngikidunyet kus kitatama ngieosio lu enukere ngitunga.

²¹Kainyo apunun akitu alopukei a ngakais yok, alomu tooma ngakais a ngikapolok yok. Etongop ngide yok alorotin, etongop tani ngisorok yok ani egielanarere ngiboro.

²²Eperete ngawat a ngikatoak awadaang, ikote ngasenon a ngasike anamanat, ikote ngasiina na imiekini ekaleman, tongop ikachunakinan wapei. Nguna kalimokini Ekapolon Akuj ayong atamar tolimu.”

²³Ebala Ekapolon Akuj kona, “Nyiinisakinor ekooson aosou keng, nyiinisakinor nikaagongon ngikilinga keng, ani ekabaran nyiinisakinor ebari keng.

²⁴ Ani ni esaki akinisakin, kinisakin ani kayenea ayong, katochoiarite, kainyo erai amina kang na nyedaun, nabo asubi na eriyan ka na etenooko. Ngakiro nguna kaminarito ayong. Ayong Ekapolon Akuj alimu nguna.”

²⁵Ebala Ekapolon Akuj kona, “Epote ngirwa lu eriraa ayong ngitunga daang lu ilengeritae, tarai nyilengeritae ngitai kech.

²⁶Ngitunga ngulu kesi Ngimisiri, ka lua Yuda, ka Ngiedomae, ka Ngiamon, ka Ngimoab ta ngitunga daang lu elomito nariet, lu etubete ngitim.[6] Eringa ngibukui ngulu nyilengera nabo eringa ebukut a Isirael daang nyilengera alotai kech.”