Read turkana Akigoro 2 Bible Online

Akigoro 2 - turkana bible

Akigoro 2

¹Kotere angoit keng, emuk Ekapolon Sion a aribu. Emasu ngesi akibuseanu a Isirael anadis, achaku kwap. Nyitamuna ngesi tani akai keng, akolongit na a angoit keng.

²Wadaang ni alomito ngalesea a Yakobo, enyasuni Ekapolon nyisieno. Kotere anyunyura keng, abwang ngawasea nakaagongok a ngitunga a Yuda. Apolou keng ka ngikarikok keng, atiyau kwap esurum ngileech.

³Angoi ngesi kilelebun, totubo ajwonu a Isirael daang. Awouni ngesi akingarakin kesi, alongaren ngimoe kech. Arirau ngesi alo Isirael loger a asarae a akim, anom lu eyakasi neni daang.

⁴Akudoki akau keng loger a emoit, eketak a akan ana aloteten loger a emoit, taar daang lu enisar Isirael. Tobukun angoit keng Sion loger a akim.

⁵Ekok Ekapolon emoit, amunya Ngisirael. Enyasu ngakais a ngikapolok kech. Ani ngawasea kech nakaagongok, etiliwo asakatan. Etalala alotunga a Yuda, akigoro ka asutonokin.

⁶Aukori ngesi akai keng, loger a epem alomana. Enyasu nikolong elipeenere ngesi, Atubo ngisukukui ka ngasabatoi alo Sion. Kotere angoit keng naationon, ekota ekapolon ka emuron.

⁷Anger Ekapolon ekeno a ngakipeyos keng, nabo aisiki akai keng. Emiekini ngesi emoit eukori ngawasea a ngakais a ngikapolok. Min akimaritetere kai a Ekapolon Akuj, loger a akolongit a esukukuu.

⁸Atiakuni Ekapolon Akuj aukor awas a Sion toliwor asakatan. Kigerok ngiwaitin daang esaki atamar kinyasunae. Esigor ngesi ngalaarin ka ngawasea, enyasun kesi aapei.

⁹Atiko ngalup ngidorin keng. Abilibilaar ngakito kech. Arik ekapolon ka ngikajakaanak keng nakwapea nache. Emam etal eringa itatamio. Ani ngikadwarak, nyeringa Ekapolon Akuj isurujae.

¹⁰Eboikinosi ngikasukou a Yerusalem kwap ililingete chek. Ewasakis apua nakies kech, ani erumor tanapa ngiguniae. Itasionosi ngapesur a ere kangolo.

¹¹Abwoto ngakonyen kang kotere akigoro. Esurur etau kang. Ealolongi ayong noi ani amunyarere ngitunga kang. Nabo ariyorosi ngide alorotin a ere.

¹²Igoronokinete ngide taitiokech ebalasi, “Nyaani akimuj, nyaani ibore nimatat?” Adakanarosi alorotin ikwa ibore esibit ewanitae, totoka anakan kata itiokech.

¹³Wae Yerusalem! Anukiro kalimokini, ngae kesikwaanea iyong? Ekokini kesililingi ai? Wae Yerusalem, elalak nginyas kon etia ngakipi a anam. Ngae epedori akitedekuun iyong?

¹⁴Ngikadwarak kon, irujaate akirujare na erai alioko. Kingal iyong akitatam kech, awout akisileereun akisech kon. Kitooliyosi iyong ngakiro kech na eraakasi alioko.

¹⁵Kikianatar iyong ngitunga daang lu itorito lorot. Imungimungete ngakies kech, kijotojotas kotere Yerusalem ebalasi, “Ere lokolong abeyo ekebusean noi, nabo erai alakara a akwap kadaang logo a?”

¹⁶Kikianatar iyong ngimoe kon daang, inyaiyonorete kimialanakinete ngangajepa, ebalasi, “Kinyasu sua ngesi! Akolongit kolong kidarit sua naga. Kianyunga tokona!”

¹⁷Asubaki Ekapolon Akuj nakolong asaki. Asubaki ngesi nakolong abala asubakini. Kimunya ngesi iyong peidodiunit ngisien, loger lokolong atiakunea a angorot. Esidwang ngimoe kon, kitalaka kesi ani kidwangeta iyong.

¹⁸Ee Yerusalem, kikaloik Ekapolon![1] Talakak ngakiyo kon loger a angolol, akwaar ka apaaran! Wara nyianga! Wara nyiidopok!

¹⁹Tonyou kigor akwaar kiiya, kigoronok Ekapolon. Tobuk ngakiro alotau kon loger a ngakipi alongaren Ekapolon. Kibak ngesi ngakan kilipak ngide kon. Ngide lu erikinit erogo lorotin daang a ere!

²⁰Ee Ekapolon Akuj, kingolik a, ngae iche isubea iyong ngakiro nugu? Ekoe, enyamete taito ngide kech lu eraakasi ngika ngakookies kech a? Earakinio ngimurok ka ngikadwarak kai kon a?

²¹Lusorok ka lumojong aapei, eperete etoakito anapua a ngirotin. Ngapesur ka lusapa, aar akwara. Iari iyong kesi akolongit na ingoea nyisieno.

²²Inyarauni kolong iyong ngimoe kang, tosub inyaraunit losukukuu, ketubulo ayong alowaitin kadaang. Emam itwaan abu tobuchun akolongit na angoit kon ngina. Taara ngimoe ngide kang lukolong etanuni ayong atominak.