Read turkana Akigoro 3 Bible Online

Akigoro 3 - turkana bible

Akigoro 3

¹Ayong dir aanyu ngichan lua akulit a anyunyura a Akuj.

²Kejukari ngesi ayong katachakak naribu nakirion meere nakicha.

³Kitorwaa ngesi akan keng kataram, kebunga apaaran juui.

⁴Abuto ngesi akiring ka amuny a akwaan kang. Abilibilaa ngakoyo kang.

⁵Kesiriam ngesi ayong kemukok ngiman ka ngichan.

⁶Kesiboi ngesi ayong anaribu, loger a ekasian.

⁷Kesiriam ngesi ayong awas nyaasi. Kaen a ngiriko aluapotiok.

⁸Egorokini ayong Akuj asaki kengarak, nakaneni ewounit ngesi akiirar.

⁹Agol erukudi kang a ngamoru, nabo esulugulug ngirotin kang.

¹⁰Kaperunit ngesi ayong loger lo eperunitor ebu etiengit. Ikoni engatuny lo edukit.

¹¹Keritari ngesi ayong alorot, katonyilinyilia, ani erumor kemiek kaneni.

¹²Akudokini ngesi akau keng katogum, kitebeik emal a amod nakwaan kang.

¹³Edirakini ngesi lotau kang, ngimalea a amod keng.

¹⁴Aliwor ngitunga daang kakianatar ayong. Kaeotor ngiitesinei apaaran juui karasito.

¹⁵Keleleb ngesi ayong ngiman, ketuup ekitoe lokaaran.

¹⁶Apokopoko ngesi ngikel kang anamoru, kemiek ebelobelo alokuron.

¹⁷Nyeringa etau kang eyeni ibore be ekisil. Kemuriak kolong ayong ibore be alakara.

¹⁸Abala bocha tokona ayong, “Adaun ekipur kang. Adaun tani akigieno kang, Ekapolon Akuj.”

¹⁹Toyen atamar ngichan ka ariaba kang, ikwaan ka ekitoe lokaaran.

²⁰Etamanari ayong nguna jiik, nakaneni eriaba etau kang.

²¹Tarai na etamunea nugu, min akigieno nabo.

²²Nyedaun amina a Ekapolon Akuj. Ee robo, emam ngisien keng esal.

²³Eraakasi ngikitet ataparach daang. Epol amuno keng.

²⁴Ekapolon Akuj bon asakit ayong, kotere nguna, egienokin ayong ngesi.

²⁵Ejok Ekapolon Akuj anitwaan kadaang ani igieno ngesi.

²⁶Ejoikinit itwaan idaruni ekiilingat, kidaru ayuuno a Ekapolon Akuj.

²⁷Ejoikinit itwaan itatama akiwok eegos eringa esorokana.

²⁸Na eanyunea ngesi ngichan, ejoikinit iboikin nikeng bon kililing, etitinyikinit.

²⁹Kijuuru ngesi itiditeuna, ejok toringa akigieno eyei.

³⁰Ejoikinit ngesi ipotori amatengen kibapae, sodi kiyenyae.

³¹Nyikingeri ngoni Ekapolon jik.

³²Tani kisialolong ngesi ngoni, idodiuni ngisien aniyok nabo, itemem ka alalau a amina keng ana nyedaun.

³³Nyemina Ekapolon Akuj aboliar, kori akisialolong ngitunga.

³⁴Na ipudaare daang lu eenitae alojelae a akwap,

³⁵na imikere itwaan ibore ni erai ikeng, alongaren Ekapolon Akuj na Epol Noi,

³⁶na emodere itwaan anitubet ngakiro, nyechamit Ekapolon.

³⁷Ngae epedori adungun akiroit tosubakin, nyelimuno Ekapolon atamar kikokis neni?

³⁸Ikwa meere nakituk a Ekapolon Akuj ana Epol Noi, eponitotor naajokak ka naaronok a?

³⁹Nyo iburaa itwaan tarai eyari, na iriraare kotere ngasechesea keng?

⁴⁰Ejoikinit ngoni kitemi elote yok, sodi atobongutu nia Ekapolon Akuj.

⁴¹Atangakisi Akuj na eyei nadis ngitai yok ka akibakin ngakan kibala,

⁴²“Kisech sua kinger iyong, nakaneni nyerimakina iyong sua.

⁴³“Ingo iyong lokojokon kirita sua, kiar iyong sua nyisieno.

⁴⁴Imukokin iyong edou loapolon, tongop akilip kosi kona epedun tanangu nikon.

⁴⁵Kitiliwo iyong sua asakatan ka ekabose alokiding ngibukui.

⁴⁶“Kikianatar sua ngimoe kosi daang.

⁴⁷Kibiler sua nabo kilokakinitae, abu akitu ka akinyasuno.”

⁴⁸Elakakinito ngakonyen kang akaale, ani amunyarere ngitunga kang.

⁴⁹Eropiyete ngakiyo anakonyen kang, nyetubosi, nyiangarete jik,

⁵⁰tanang Ekapolon Akuj anadis ekienyuuni kwap kitaanyunga.

⁵¹Ealolongi ayong na engolikinea ngakiro na esubere ngaberu a ere kalo.

⁵²Ngulu karemokino ayong pas, kalokakinito loger a ikeny.

⁵³Katachakakis kesi ayong nakipany ayari, sodi tobura akituk a akipany a amoru.[2]

⁵⁴Kelikosi ayong ngakipi tanang nakou, atama, “Esal kang lo.”

⁵⁵Ee Ekapolon Akuj, kekaloik ayong iyong alokwap akipany.

⁵⁶Ibu iyong kiira akilip kang. Nyegolo iyong ngaki kon nakekaloikinio.

⁵⁷Nakanyaraa, bu iyong diye kang, kitolimok tama, “Nyiiem.”

⁵⁸Ee Ekapolon Akuj, kitoik iyong ayong sodi toyuu akiyar kang.

⁵⁹Ianyunga iyong naaronok kasubere ayong. Totubokinae ngakiro na itemokino.

⁶⁰Ianyunga iyong ngiman a ngimoe kang, ka naaronok katukotor kesi ayong.

⁶¹Iira iyong ngieosio kech lua ngimeny, ka naaronok katukotor kesi ayong.

⁶²Apaaran juui, nyiangarete ngakituk kech ka ngitamen kech anikang.

⁶³Akiboikin ka anyoun kech, ayong kaeotor ngiitesinei karasito.

⁶⁴Ee Ekapolon Akuj, kirira kesi, itemem ka etich a ngakan kech.

⁶⁵Kisiloik kesi ngitai, kilam iyong kesi.

⁶⁶Kiwapak ingoikinit, tomunya. Kikisa kesi anakwap.