Read turkana Akigoro 4 Bible Online

Akigoro 4 - turkana bible

Akigoro 4

¹Kengoreaner egolit, kilochokin egolit loasegan! Epetakina asir lowaitin daang a erot.

²Talokookeng a Sion, ajokak kolong ekote egolit loasegan. Nakaneni etusubun tokona ngamoti nalupe, na eyee itwaan a ngakan!

³Itanaki tani kolowo ngitak keng, nakaneni ngitunga kang, ekokis ngikaleeso a ariet, emoitanikinito ngide kech.[3]

⁴Aoko ngidokolei a ngide kech, ani enyamitor akure. Ilipasi ngide kech akimuj, tongop itwaan einakini.

⁵Ngitunga lukolong emujete akimuj naajokon, eriyonokini tokona akoro lorotin. Lukolong etanunio anajako ipunupunosi tokona alokuron.

⁶ Epolot eriras a ngitunga kang, akidwang tani lokolong a ngitunga a Sodom, lukolong amunyario atipei anakan a Akuj.

⁷Ekiuna ngikarikok noi, akwangak akidwang ngakile. Amalimalete ngawat kech loger a ngikam. Ebuseak ngawat kech loger a ngamoru anapusiek-arengak.

⁸Apuseaniasi tokona ngireetin kech akidwang ekuron, emam itwaan epedori akiyen alorot. Arinyonokis ngamunyin kech nakoyo, aoko loger a ngakito.

⁹Kejok akitu alu aario a akwara akidwang akitu alu ariyo erogo, alu etoakete epali ani angopikinea akimuj.

¹⁰ Ngakan a ngaberu ana ngisien, etukulaut ngide kech a ngikulepek, kitiliwosi akimuj kech, kotere nginyas lu apot lotunga kang.

¹¹Esunyu dir Ekapolon Akuj anyunyura keng. Abuku ngesi angoit keng erirae loger a akim. Enokak ngesi akim alore a Sion, anomia aliwor ekuron.

¹²Peanupito ngikapolok a ngibukui, kori peanupito ngitunga a akwap, atamar epedorete ngimoe alomun Yerusalem.

¹³Asubakinosi nguna kotere ngasechesea a ngikadwarak a ere, ka aronis a ngimurok keng, alu aarete ngitunga lu atenooko.

¹⁴Kitwapatwapa kesi loger a ngimuduk. Etiliworito ngaakot kesi lupeetaleuno, amam itwaan asaki akitap kesi.

¹⁵Kikilakis ngitunga kesi tamasi, “Kapesi! Nyitaleuno esi. Kapesi! Kapesi! Nyikitap sua.” Apot kesi todokis toliwor ewowooto, Tamasi ngitunga a ngibukui, “Nyeringa kesi kiruki ka ngoni jik.”

¹⁶Ekapolon Akuj alope apeta kesi. Nyemisikini nabo ngakiro kech jik. Apot ngitunga nyiidodikis ngimurok arima, nyeminakina ngikarikok.

¹⁷Aburu ngakonyen yok akienyiarit kidarit akingarakino na angop. Kikienyiarit lobukut lo nyepedori ayuun.

¹⁸Toliworos ngimoe kiperunito ngoni, tongop ngoni kona kilosi alorotin yok. Adauna ngirwa yok, abu tanang esal yok.

¹⁹Apiraka lu kirisito ngoni edwangito tani ngigolei lu eporito. Kirita ngoni tanang lomukur, kitoperut ngoni anariet.

²⁰Ngolo lo aseuni Akuj, lo erai ngesi kiyarea ngoni, apot kesi kisuruma anapanya kech. Ngolo ngesi lo kibala, “Kiyuuni logo ngoni alobukui.”

²¹Talakaros kichurokisi, esi ngitunga a Edom, ka lu ilomito nakwap a Us. Nakaneni eponito naaronok nikus dang. Imatamatakinosi tobutosi ngiboro anawat.

²²Ngitunga a Sion, etemokin eriras kus, nyeringa nabo Ekapolon Akuj kimiekini esi iraakasi ngirikon. Ani esi Ngiedomae, kirirae esi Ekapolon Akuj, iwoluni ngesi ngasechesea kus.