Read turkana Akigoro 5 Bible Online

Akigoro 5 - turkana bible

Akigoro 5

¹Ee Ekapolon Akuj, kitam kare ngakiro na asubakinosi anikosi. Tokienyikinae sua, kingolik ngileech kosi!

²Eruma ngitunga lugelayek akwap kosi. Kesi elomito nawiyei kosi.

³Kiliwor sua ngikokiok, emam taapakosi. Aliworosi taitiokosi ngapuseru.

⁴Kitachi sua ngakipi na kimasi. Kigieli ngakito nakipoet.

⁵Kitusubio ngitichisio loger a ngitieng. Kiburunit nakaneni nyikisiangario.

⁶Kibakinit sua Ngimisiri ka ngitunga a Asiria ngakan, ataanyuneta akimuj nakisimwoni.

⁷Asechete kolong taapaakosi, nakaneni nyeringa tokona eyarete. Kianyunit sua ngichan kotere ngasechesea kech.

⁸Ngikedalak kipolokinito sua. Emam ikayuunan sua anakan kech.

⁹Kianyuni sua akimuj ani kijalea akiyar kosi, kainyo ewowooto ngikaarak anariet.

¹⁰Eriraate ngawat kosi loger a akim, ani anomea eron a akoro ngawat.

¹¹Atikoonor ngaberu kosi alomoru a Sion. Atikoonor ngide lupesur alorerea a Yuda.

¹²Amieda ngimoe ngikarikok kosi a ngaunoi. Nyirimae ngikasukou kosi.

¹³Itingakinitae ngisorok akiriere ngakiria, Imatamatasi ngisapa ani inuitotor ngakito.

¹⁴Nyeringa ngikasukou ianenete alokitoe kech alokidor a ere. Ajongoto ngisorok aeo.

¹⁵Adaun alakara alotai kosi. Elochokin edonga kosi aliwor akigoro.

¹⁶Asalu akiwolit kosi. Oitiakoi kare! Kibukor chanai ani kisechea!

¹⁷Kotere ngakiro nguna, kiriaba sua ngitai, nabo ariboki ngakonyen,

¹⁸kainyo aliwor emoru a Sion alaireng, ngikolowoi make ewowooto kaneni.

¹⁹Nakaneni iyong Ekapolon Akuj irai ekapolon jik. Nabo erubi apolou kon analesea kadaang.

²⁰Nyo kimiekinea iyong sua jik? Nyo kichakarea iyong sua ngirwa lukaalak kona?

²¹Tobuunae sua nikon, Ee Ekapolon Akuj, sodi atobongunioto! Tobuakinae ekipur kosi lokolong ngorot!

²²Kori robo kinger iyong sua jik? Ikwa kolong nyesaluni angoit kon a?