Read turkana Esekiel 1 Bible Online

Esekiel 1 - turkana bible

Esekiel 1

¹Akolongit na ngakan a elap alo a nguomwon a ekaru alo a ngitomwon-uni,[1] ayei ayong Esekiel lokwaas a angolol a Kebar kirukit ka ngitunga luche lurikon. Abu adis tangaar sodi engolik ayong ngakisingolikinet a Akuj. (

²Arai ekaru lo a ngikan napei kolong arikere ekapolon Yeoyakin.)

³ Abu Ekapolon Akuj katolimok ayong akiroit, ayong lo arai emuron keng, lokookeng a Busi, na ayakar Babilonia lokwaas a angolol a Kebar, katotikokin agogongu keng.

⁴Ani akienyiari, engolik ekuwam lotiapolon eneteuna alokwap. Engolik edou lotiapolon eriamit akwangis kimileaununi akim alodou. Amalimali akim ngina loger a asuat ananyang.

⁵Alokiding ekuwam ngolo, abu engolik ngiborei lu eyarete nguomwon lu ikwaan ka ngitunga,

⁶nakaneni ayakasi ipei kech daang ngireetin nguomwon ka ngabeben ngoomwon.

⁷Etenara ngakejen kech nabo ekote ngimaagor kech lua emong. Amalimalete kesi loger a asuat ananyang ana ipusitae.

⁸Aapei ka ngireetin luomwon ka ngabeben naomwon, ayakasi nabo ipei kech daang ngakan ngoomwon na a ngitunga, akan apei kwap abebenit apei.

⁹ Apetara ngabeben kech atapap. Arai na erotokinioto, torotokis toten ipei kech daang ngaren nyereasi.

¹⁰Ngiborei lu eyarete ngulu, ayakasi ipei kech daang ngireetin nguomwon lugelagelae, ereet a itwaan ngaren, ereet a engatuny teten, ereet a emong kedieny, ereet a egole naabor.

¹¹Ekote ngireetin kech neni. Apetara ngabeben ngaarei a ipei kech kadaang atapito ngabeben aniche, sodi tarapa ngabeben nache arei ngawat.

¹²Nicha asaki etau kesi toloto, kirukosi daang lowae epei nyerea ngawat, kainyo engoliarit ipei kech daang lowaitin luomwon.

¹³Kiding[2] ngiborei lu eyarete ngulu, ayei ibore ni ekwaan ka ngatotol na enokete na alakanakinete ngikatweny lu atubonorosi alokiding ngiborei ngulu. Anokununi akim ngina ka akimileaunun.

¹⁴Ebironorosi ngiborei ngulu ngaren ka akamaluwot atipei loger a akimilea.

¹⁵Esaa lo esemo ayong ngiborei lu eyarete ngulu, abu engolik ngatairio ngoomwon etapito ngalup, eyei apei lokwaas a ipei kech[3] kadaang.

¹⁶Ekwaan ngatairio naomwon daang. Amalimalete kesi loger a amoru ananyang. Angedakina atair apei kiding nache alotooma,

¹⁷topedoreta ngatairio nguna alosit lowaitin luomwon daang nyerea.

¹⁸Aburuchiarito ngakonyen ngakilelei a ngatairio.

¹⁹Nacha erotokinioto ngiborei lu eyarete ngulu, torotokis ngatairio dang.

²⁰Aloose ngiborei ngulu nicha asaki etau kesi toloto, asubete nabo ngatairio napei kiro nguna, kainyo arikito ngiborei ngulu ngatairio.

²¹ Toliwor nacha erotokinioto ngiborei lu eyarete ngulu, kori na ewaatar, kori na ikeunotor analup, tosubakis ngatairio dang napei kiro nguna, kainyo ayei etau a ngiborei alu eyarete kangulu natairio.

²²Kidiama ngakies a ngiborei alu eyarete kangulu, ayei atorite nakaliliwan loger a akiyo na aburuchiarit ngakies nguna.

²³Awaasi ngiborei lua ngabeben ngulu alokwap atorite nakaliliwan ngina, itorwaarito ngabeben ngaarei tatapas ka na ibore ani ibakitotor, sodi tarapa ngabeben nache arei ngawat.

²⁴Ani epororete kesi, eira ayong erue a ngabeben kech. Ekwaan ka erue a anam, ekwaan ka agiro a Akuj Anaationon, ekwaan ka echale a ngasigerea anakaalak. Ani ewaasi kesi, tobilakis ngabeben kech.

²⁵ Ayei etoil lo eruoro alokidiama atorite na ayei kidiama kech, ani ewaasi kesi, tobilakis ngabeben kech.

²⁶Kidiama atorite ngina, ayei ibore ni ekoni ekicholong a apolou lo asubunitae anamoru anapusiek-arengak. Ebooyi ibore ni ekwaan ka itwaan alokicholong kangolo.

²⁷Amalimali itwaan ngini loger a asuat ananyang alokiding akim. Emaunit wadaang loger a akicha anakaalan

²⁸ ana eyakasi ngajul napalem a alokakinet daang. Arai ibore ngini akwangis naakwaan kea na idodiunit ayakau a Ekapolon Akuj. Na engolikinea ayong nguna, abu atadakakin kwap atodo aloreet. Sodi eira etoil