Read turkana Esekiel 10 Bible Online

Esekiel 10 - turkana bible

Esekiel 10

¹Engolik ayong atorite na eriwokina kidiama ngakies a ngiborei alu a ngabeben. Kidiama kech ayei ibore ni ekoni ekicholong a apolou lo asubunitae anamoru anapus-arengan.

² Tolimok Akuj itwaan ni anapit eworu lokaanikan tama, “Kape tongichakin natairio na irimete na eyakasi kwap ngiborei lua ngabeben, sodi kilelebik ngatotol na enokete nakan kon. Ani erumor kiealak ngatotol nguna lore.” Eteeo ayong ngesi erotokini.

³Awaasi ngiborei lua ngabeben alokuju akai a Akuj esaa lo alomarea itwaan ngini. Kilelebun edou nalaar na alotooma.

⁴Todiritu akwangis a Ekapolon Akuj aloborei kangulu toten lokidor a akai a Akuj. Sodi kilelebun edou kai, kimau akicha alotooma alaar.

⁵Anangit echale lo epukipukioto ngiborei ngulu ngabeben nalaar na anikalapatan. Ekwaan ka etoil a Akuj Anaationon esaa lo iruorikinea.

⁶Ani elimokini Ekapolon Akuj itwaan ni anapit eworu lokaanikan atamar tolem akim alokiding ngatairio na erimete, na ayakasi kwap ngiborei lua ngabeben, abu itwaan ngini tolot towo alokwaas a atair a apei.

⁷Abu ipei a ngiborei kangulu kitorwa akan keng tolem akim alokiding kech, sodi kiwaak nakan a itwaan ani a eworu alokaanikan. Kidiau itwaan ngini akim ngina torotok.

⁸Engolik ayong ngiborei lua ngabeben ngulu eyei ibore ni esibit akan a itwaan kwap ngabeben kech.

⁹Ani akienyikini, engolik ngatairio ngoomwon. Atapakina atair apei lokwaas a ibore a ipei. Amalimalete ngatairio nguna loger a ngamoru anakaalak a ngaropiyae.

¹⁰Ekwaan ngatairio naomwon nguna. Asibit abutokina atair apei tooma nache.

¹¹Na erotokinioto ngiborei ngulu, apedorete alosit lowaitin luomwon daang peereasi. Ewae locha ingoliari atair na alongaren, totupakinos daang peereasi.

¹²Ngawat a ngiborei kangulu, ka ngakawa kech, ka ngakan kech, ka ngabeben ta ngatairio, ayakasi daang ngakonyen.

¹³ Eira ayong ngatairio nguna enyaritae nakerimok anakisingolikinet ana ekingaren.

¹⁴Ngiborei ngulu, ayakasi ipei kech daang ngireetin nguomwon. Arai ereet lo ekingaren eka emong, lo a ngiarei eka itwaan, lo a nguuni eka engatuny, ani lo a nguomwon eka egole. (

¹⁵Eraakasi ngiborei lupei kolong engolikini ayong anangolol a Kebar.) Na ekurupupuneta ngiborei ngulu kidiama

¹⁶ka arotokin, kirukosi ngatairio dang ka kesi. Nacha epetareta ngiborei ngulu ngabeben kech esakete aporor, kirukosi ngatairio dang ka kesi.

¹⁷Na ewaatar ngiborei ngulu, towaa ngatairio dang. Erukonorete ngatairio ka ngiborei ngulu kainyo kesi arikito ngatairio.

¹⁸Sodi torotok akwangis a Ekapolon Akuj alokidor a akai, tolot towo alokidiama ngiborei ngulu.

¹⁹Topetasi kesi ngabeben kech sodi toporosi analup eteorit ayong, kirukosi ka ngatairio. Towaa alokidor alo alokide akai a Akuj, toyei akwangis a Akuj a Isirael kidiama kech.

²⁰Atoyen ayong ngiborei ngulu atamar kesi lukolong engolikini ayong ewaasi alokwap Akuj a Isirael anangolol a Kebar.

²¹Ayakasi ipei kech daang ngireetin nguomwon ka ngabeben ngoomwon ta ibore ni asibit akan a itwaan alokwap abebenit daang.

²²Ani eliwor ngireetin, kesi lupei kolong nabo engolikini ayong anangolol a Kebar. Aloose ngiborei ngulu daang ngaren.