Read turkana Esekiel 11 Bible Online

Esekiel 11 - turkana bible

Esekiel 11

¹Kekeu ayong etau a Akuj kayaa lokidor lo alokide akai a Akuj. Engolik ayong ngitunga ngitomwon-arei ka ngikan ewaasi alokidor. Ayakasi neni tani Yaasania lokookeng a Asur ka Pelatia lokookeng a Benaya, lu araakasi ngikatukok ngiarei a akwap.

²Katolimok Akuj ayong tama, “Itwaan, lugu kesi lu irokete aronis ka akitutuk ngitunga a ere kalo niaronon.

³Kesi lu ebalasi, ‘Eringa esaa lodukokinet ngakais nyenanga. Ikwaan ere ka amot nakipoet, kikwaan ngoni ka akiring na eyei namot.’

⁴Tokona bocha itwaan, todwar ngakiro kech! Kasio todwar!”

⁵Tachakun etau a Akuj nikang katolimok atamar atolimok ngitunga kona, “Ngisirael, ayeni ayong ngakiro na itamete esi daang.

⁶Iara esi ngitunga lukaalak alore kalo, nabo elelebun ngawat a ngikatoak lorotin.

⁷“Tokona bocha, alimu ayong Ekapolon lo arai Ekapolon Akuj kona, ‘Iteni dir erai ere logo amot nakipoet. Nakaneni ngawat a ngitunga alu iara esi eraakasi akiring. Kemasari ayong esi nikalapatan a ere!

⁸Ikwa iemito esi akwara a? Ameuni ayong ajore a ngakwaaras kitijik esi.

⁹Kepudori ayong esi alore kepotok ngitunga a ngakwapea anache. Alimu ayong atamar kiario esi.

¹⁰Kiario esi alojie anakwap kus a ngikulepek. Toyeneta esi daang atamar arai ayong Ekapolon Akuj.

¹¹Nyeringa ere a Yerusalem kiratakini esi loger lo iratakinitor amot akiring alokeno. Kerirae ayong esi anicha iyakasi kadaang anakwap a Isirael.

¹²Iyenunete esi atamar arai ayong Ekapolon Akuj. Ipot esi tongero ngitalio kang, towout akiwap ngakiro na kadungokinit ayong esi atamar kiwapa. Pearai ipot kiwapa ngitalio a ngibukui alu kiriamito esi.’ ”

¹³Ani eringa ayong adwari, kimasakin Pelatia kwap totoan. Emasakin ayong kwap tojuk ereet ngalup, ekalou eute abala, “Wae, Ekapolon Akuj na irai Akuj! Imunyari cha iyong Ngisirael lupiyayek a?”

¹⁴Katolimok Ekapolon Akuj ayong akiroit tama,

¹⁵“Itwaan, ngitunga lu elomito Yerusalem, kiruorotor iyong ka Ngisirael luche lu kirikitoe nakwapea nache. Ebalasi kesi, ‘Eloka ngirikon ngulu emam kona ilipete Ekapolon Akuj. Kiinak ngesi ngoni akwap toliwor ayok.’

¹⁶“Tolimok tokona ngirikon luche lurukitos kon ngakiro nugu. Ayong kolong kameari esi akilom nakwapea nakalonak, dio katopetak nakwapea nache. Kaneni dang, kirukit ayong ka esi[11] anakwapea ana ilosito.

¹⁷“Tolimok kesi ngakiro na alimu ayong Ekapolon Akuj na lo arai Ekapolon Akuj, atamar kachununi ayong kesi anakwapea ana kolong ipetakinosi sodi katobuak esi akwap a Isirael.

¹⁸Ani ibongorete esi inaa, ejoikinit echakarete ibore niaronon daang ka ngakujo nasubuna nakikadakinete.

¹⁹Kainakini ayong esi etau lokitetet ka ngitamen lukiteat. Alemari ayong anikus etau lokaagongon ikoni amoru, ewaak etau lo epupi ngakiro nikus.

²⁰Sodi kirichakis ngitalio kang, ka akiwap ngakiro na adungokinit ayong. Iliworosi esi ngitunga kang atoliwor ayong Akuj kus.

²¹ Nakaneni ani ngulu eminasi ngitai kech ngakiro naaronok kikadakinete, erirae ayong kesi kotere ngakiro na asubakis. Alimu ayong Ekapolon lo arai Ekapolon Akuj nguna.”

²²Toporosi ngiborei lua ngabeben, kirukosi ka ngatairio. Ayei akwangis a Akuj a Isirael kidiama kech.

²³Sodi torotok akwangis alore tolot towo alokidiama emoru lo ayei kide ere.

²⁴Anakisingolikinet, kekea etau a Akuj ayong kidiama katobua Babilonia ni ayakasi ngirikon. Ani erumor tongopia akisingolikinet.

²⁵ Abu ayong atolimok ngirikon ngakiro daang na kedodikini Ekapolon Akuj.