Read turkana Esekiel 12 Bible Online

Esekiel 12 - turkana bible

Esekiel 12

¹Katolimok Ekapolon Akuj ayong akiroit tama,

² “Itwaan, ibooyi iyong alokiding ngitunga lu kangerito ayong. Eyakasi kesi ngakonyen tarai nyiteete, eyakasi ngaki tarai nyepupete, kainyo ichanaka kesi.

³“Tokona bocha, itwaan, tosubak ngiboro kon lupalem a itwaan ani edokinit, tonyou eringa nyewara. Kingolikis ngitunga iyong atamar inyou ilot wache. Tokona ngon epedorete ngitunga lukechanak apupokin ngakiro kon.[12]

⁴Tosubak eegos kon eringa erai apaaran kingolikineta kesi iyong, ani erumor kimiek kesi kiteosi iyong irotokini ebong, tosub idokinit nakwap ache.

⁵Toped ekwaas a akai kon topuno eegos kon, topudo iteete kesi.

⁶Kimiek kesi kingolikis iyong iriongakini eegos loseget topudo nikalapatan, irapit ngakonyen nyiingolikinea ni ilosi. Ngakiro na isubi iyong nguna, eliworosi akichikichiket ani a Ngisirael.”

⁷Atosubak ayong ngakiro nakalimokini Ekapolon Akuj. Akolongit ngina naparan, atoen ayong eegos kang loger a itwaan ani edokinit, ani atabong ngina, atoped ekwaas a akai a ngakan kang, atopudo nikalapatan na aribokinea. Atoriongak eegos loseget atorotok iteete ngitunga.

⁸Ataparach na atupit ngina, katolimok Ekapolon Akuj ayong akiroit tama,

⁹“Itwaan, ani aloger kingisitotor iyong Ngisirael lukechanak ebalasi, ‘Anukiro isubi iyong?’

¹⁰Tolimok kesi kona, ‘Ebala Ekapolon lo erai Ekapolon Akuj: eraakasi ngakiro nugu ngaka ekatukon alo epolokinit Yerusalem, ka ngitunga daang lu elomito neni.’

¹¹Tolimok kesi atamar ngakiro na isubak iyong nugu eraakasi emachar a ngakiro ana moi esubakinosi anikech. Eliworosi kesi ngitunga lu edokinito ka ngirikon.

¹²Ekatukon lo epolokinit kesi, eriongakini eegos keng loseget nakwaare tosii kitor lopuke lo epedokinete kesi lokwaas a akai. Erapi ngesi ngakonyen keng nyiingolik ni elosi.

¹³Nakaneni apetari ayong epuute kang esurum ngesi. Sodi ayaa ayong ngesi lore a Babilon, nakwap a Ngibabiloniae, totoanik neni nyingolikina akwap ngina.

¹⁴ Ngirukitos keng, ka ngiketutukok ta ngasigerea keng, apetari ayong lowaitin daang. Alachuni ayong akuroru a akwara, erita kesi.

¹⁵“Na apetarea ayong kesi lobukui luche ka ngakwapea nache, eyenunete kesi atamar arai ayong Ekapolon Akuj.

¹⁶Nakaneni emiekini ayong ngidikidio kech topuunos anakwara, ka akoro ta ngidekesinei, taanyuneta ngibukui daang atamar arai ayong Ekapolon Akuj.”

¹⁷Katolimok Ekapolon Akuj ayong akiroit tama,

¹⁸“Itwaan, tanyam akimuj kon erikiriki akwaan, tamat ngakipi imarani kotere ebuloi.

¹⁹Tolimok ngitunga daang a akwap atamar ngakiro nugu kesi elimokinit Ekapolon Akuj lo erai erai Ekapolon Akuj ngitunga a Yerusalem, lu eringa elomito nakwap kech. Emaranikinete kesi imujete, nabo ani emaase, tamaranikis kotere ebuloi. Engopi ibore daang anakwap kech, kotere aronis a ngitunga kadaang alu elomito neni.

²⁰Inyasunio ngirerea lu tokona ileleba ngitunga, nabo eliwor akwap alaireng. Toyeneta esi atamar arai ayong Ekapolon Akuj.”

²¹Katolimok Ekapolon Akuj ayong akiroit tama,

²²“Itwaan, nyo mono ibongonokinioto esi Ngisirael ngakamatak na ebeyo, ‘Eloose ngirwa tarai nyiyoonokin ngakiro na edwario.’

²³Tolimok tokona kesi ngakiro na alimu ayong Ekapolon lo arai Ekapolon Akuj kotere ngakiro nguna. Etasaluni ayong ngakamatak nguna. Anang tokona ngirwa lu iyookinotor ngakiro nguna!

²⁴“Alokiding Ngisirael, nyepete nabo ngakisingolikinet na alioko kori nyedwario ngakiro nakibatarete.

²⁵Ayong Ekapolon Akuj esuruori kesi. Iyookinosi ngakiro na alimuni ayong. Nyetinenikinete ngakiro nguna. Esi lukechanak, asubakini nguna alimu eringa esi iyarete. Ayong Ekapolon lo arai Ekapolon Akuj alimu nguna.”

²⁶Katolimok Ekapolon Akuj ayong akiroit tama,

²⁷“Itwaan, abe ebalasi Ngisirael niti iruorosi, ‘Eloka ngirwa esubakinotor ngakisingolikinet a ekadwaran kalo, nabo ngaka monan ngakiro na edwari ngesi.’

²⁸Tokona bocha, tolimok kesi atamar emam ngakiro kang na eringa etinenikinete, pearai esubakinosi ngakiro na alimu ayong. Ayong Ekapolon lo arai Ekapolon Akuj alimu nguna.”