Read turkana Esekiel 13 Bible Online

Esekiel 13 - turkana bible

Esekiel 13

¹Katolimok Ekapolon Akuj ayong akiroit tama,

²“Itwaan, kikilak ngikadwarak a Isirael lu etonguniyete ngakiro. Tolimok kesi topupokis akiroit a Ekapolon Akuj!”

³Ebala Ekapolon lo erai Ekapolon Akuj kona, “Oitiakoi! Abe etioko nginyas ianyunete esi ngikadwarak lubaang lu iwapito ngitamen kus a ngikulepek, tamam ibore ianyungarito.

⁴Ngisirael, ikwaan ngikadwarak kus ka ngikweei lu etubonorosi anasakatan.

⁵Nyiyokiyete kesi ni eyatanara anawas, kori nyebongonokinete akiduk nakitetet dang, sodi toyuunotor Ngisirael akolongit na ejie na alemu ayong Ekapolon Akuj.

⁶Esudo kesi ngakiro, adwar alioko. Ebalasi kesi, ‘Ebala Ekapolon Akuj kona,’ tarai nyemeara ayong kesi. Esubete kesi kongina esakete ayong eyook ngakiro na iruorosi kesi!

⁷Abala ayong kesi kona, ‘Eraakasi ngakisingolikinet nakus nguna ngapasiek, nabo eraakasi ngakiro na idwarete esi alioko. Ibalasi esi eraakasi ngakiro kang tarai nyisuruoro ayong esi!’ ”

⁸Ebala bocha esi Ekapolon lo erai Ekapolon Akuj kona, “Kona iruorotor esi ngakiro napasiek ka ngakisingolikinet na alioko, kanger ayong esi.

⁹Erirae ayong ngikadwarak alu iteete ngakisingolikinet napasiek ka akidwar alioko. Na echunakinotor ngitunga kang akitiak ngakiro, nyipete esi neni. Nyigirio ngirora kus lorora a Ngisirael, nabo nyibongete esi nakwap kus jik. Sodi toyena esi atamar arai ayong Ekapolon lo arai Ekapolon Akuj.

¹⁰“Engalaate ngikadwarak ngulu ngitunga kang tamasi eyei ekisil, tarai emam ekisil eyei! Nabo dang, na etagalikineta ngitunga kang akiduk awas, kiwasakis ngikadwarak ngulu emunyen loakwaan ajokon!

¹¹Tolimok tokona ngimurok lu iasete emunyen loakwaan nawas ngulu atamar erami akiru nakaalan na ngamoru, tokut ekuwam loapolon touko awas ngina.

¹² Ani eukor awas, kingitas ngitunga tamasi, ‘Ekoe, etor emunyen lo ngoon akwaan ajokon ai?’ ”

¹³Ebala tokona Ekapolon lo erai Ekapolon Akuj kona, “Kotere angoit kang, ameuni ayong ekuwam loapolon, ka akiru nakaalan ta ngamoru a akiru kinyasut awas ngina.

¹⁴Abwangi ayong awas na iwasakinete esi emunyen loakwaan, eala kidongo ngamoru na itoweitere analup esiposi make. Eukor awas kitaar esi daang, toyenea itwaan daang atamar arai ayong Ekapolon Akuj.

¹⁵“Ekokini ayong neni esunyakini anyunyura kang nawas ngina ka ngikadwarak lukolong ewasete emunyen. Kalimokini esi kona, ‘Emam awas, nabo emam lukolong ewasete emunyen.’

¹⁶Amunyari ayong ngikadwarak a Isirael lukolong adwarete ngakiro a Yerusalem atamar eyei ekisil tarai bo amam ekisil! Ayong Ekapolon lo arai Ekapolon Akuj alimu nguna.”

¹⁷Tolim Ekapolon Akuj tama, “Tokona, iyong itwaan, kingolik ngaberu a akwap kon, nguna edwarete ngakiro na etongunito kesi ngikulepek. Kikilak kesi

¹⁸tolimok atamar ebala Ekapolon Akuj lo arai Ekapolon Akuj kona, ‘Oitiakoi! Abe etioko nginyas ianyunete esi ngaberu! Idonyete esi ngibatae lu enapete ngitunga daang anakan, tomuroto ngawarui na enapito ngitunga anakies, sodi tosuba akiyar a ngitunga aluche. Isubete esi ngitunga kang, totinga akiyar a ngiche a ngakan kus, kingarakinotor esi ngikulepek.

¹⁹Kimenyarito esi ayong alongaren ngitunga kang, kitomukakinere erau lodiochichi ka akimuj nadiochichi. Iarete esi ngitunga lu nyejoikinit eario, sodi talakakis lu ejoikinit eario. Isuruorete esi ngitunga kang alioko, kitunupa kesi ngakiro kus.’

²⁰“Kalimokinit tokona ayong Ekapolon lo arai Ekapolon Akuj esi atamar aremokino ayong ngibatae lu inapito esi anakan, tosubeta ngitunga. Angedangedaari ayong anakan kus atalakak ngitunga lu isubito esi.

²¹Achilichilaari ayong ngawarui kus emiek ngitunga kang tobuchun anakan kus jik. Nyeringa nabo epete nakan kus eraakasi lu irikao. Toyeneta esi atamar arai ayong Ekapolon Akuj.

²²“Kotere alioko kus, itepeniasi esi ngitunga luajokak, lu nyasaki ayong akiwan. Itengero esi ngitunga luaronok aisikin aronis kech ka ayuun akiyar kech.

²³Asalut tokona ngakisingolikinet kus napasiek ka akidwar alioko. Ayuuni ayong ngitunga kang anakan kus, toyeneta esi atamar arai ayong Ekapolon Akuj.”