Read turkana Esekiel 14 Bible Online

Esekiel 14 - turkana bible

Esekiel 14

¹Akolongit apei, pot ngikasukou ngiche a Ngisirael nikang akingita ngakiro na esaki Ekapolon Akuj.

²Sodi katolimok ayong Ekapolon Akuj akiroit tama,

³“Itwaan, achamut ngitunga lugu ngakujo nasubuna epolokinete ngitai kech. Elomakis ngakujo nguna kesi nakisech. Achamuni ayong dir kesi kengitanarete ayong ngakiro a?

⁴“Tolimok tokona kesi ngakiro na alimu ayong Ekapolon Akuj lo arai Ekapolon Akuj. Esiraelit cha daang lo echamakini ngakujo nasubuna epolokinete etau keng, sodi kilomakis ngakujo ngesi nakisech, ani kebu itwaan ngini nia ekadwaran akingita ngakiro, ayong ilope atachakini ngesi ngakiro, na itemem ka alalau a ngakujo keng.

⁵Enomete ngakiro na atachakini ayong Ngisirael ngitai kech, katobongokis ayong kainyo achadasi ngakujo nasubuna kesi anikang.

⁶“Tokona bocha, tolimok Ngisirael atamar abala ayong Ekapolon Akuj lo arai Ekapolon Akuj kona, ‘Tolunga ngasechesea kus, toisikis akilipit ngakujo kus nasubuna. Toisikisi akisub ngakiro nakikadakinete.’

⁷“Esiraelit cha daang kori itwaan a akwap anache cha daang ni elomit kiding Ngisirael, ani kanger ayong kilip ngakujo nasubuna, ani erumor tolot nia ekadwaran akingitanar ngakiro, ayong Ekapolon Akuj alope ngesi atachakini ngesi ngakiro!

⁸Alemari ayong itwaan ngini nidikil. Etiliwori ngesi ekitetemes, nabo alemari ngesi alokiding ngitunga kang, sodi toyeneta esi atamar arai ayong Ekapolon Akuj.

⁹“Ani kingal ibore ekadwaran ngolo kisudok ngakiro, toyena atamar ayong Ekapolon Akuj engalat ngesi. Erirae ayong ngesi atolema ngesi alokiding Ngisirael, lu eraakasi ngitunga kang.

¹⁰Itirete kesi eriras kech. Ikwaanikin eriras a ekadwaran ka lo a itwaan ani ingita ngakiro,

¹¹sodi nyeebongokinioto Ngisirael akibatanar anikang, nabo nyiinyasunosi make kotere ngasechesea kech. Pearai eliworosi kesi ngitunga kang, atoliwor ayong Akuj kech. Ayong Ekapolon lo arai Ekapolon Akuj alimu nguna.”

¹²Katolimok ayong Ekapolon Akuj akiroit tama,

¹³“Itwaan, ani kesech ebukut, toliwor nyekamuno ayong, atubori ayong akimuj keng, sodi atomeu eron a akoro ataar ngitunga ka ngibaren aapei.

¹⁴Arai tani toyakas ngitunga luuni lugu neni, Noa, ka Danel[13] ta Yob, keyuu ajokis kech kesi luuni make. Ayong Ekapolon Akuj lo arai Ekapolon Akuj alimu nguna.

¹⁵“Kori apedori ayong atomeu ngitieng lukaadengak taara ngitunga sodi toliwor akwap alaireng, tojongoto ngitunga akitoreenen kotere ngitieng lukaadengak.

¹⁶Tani keyakasi ngitunga luuni ngulu neni, ekongi ayong Ekapolon Akuj na erai Akuj na eyari atamar nyepedorete kesi ayuun tani talokookech kori tanakookech. Epedorete kesi ayuun ngawat kech a ngikulepek, nakaneni eliwor akwap alaireng.

¹⁷“Kori apedori atochilu ejie nakwap ngina, atolim atamar torem akwara akwap ngina, taar ngitunga ka ngibaren aapei.

¹⁸Tani keyakasi ngitunga luuni ngulu neni, ekongi ayong Ekapolon Akuj lo arai Ekapolon Akuj na ayari atamar nyepedorete kesi ayuun tani talokookech ka tanakookech, pearai eyuunosi kesi ngikulepek.

¹⁹“Kori apedori ayaun edeke loaronon nakwap ngina, atonyunyurikin ataar ngitunga ka ngibaren,

²⁰ tani keyakasi Noa, ka Daniel ta Yob neni, ekongi ayong Ekapolon lo arai Ekapolon Akuj na ayari atamar nyepedorete kesi ayuun tani talokookech kori tanakookech, eyuunosi kesi ngikulepek.”

²¹Ebala Ekapolon lo erai Ekapolon Akuj kona, “Erokearosi noi ngakiro alo Yerusalem na ayaunea ayong eriras a ngakiro kang anaomwon aronok ana eraakasi ejie, ka akoro, ka ngitieng lukaadengak ta edeke, tomunyasi ngitunga ka ngibaren aapei!

²²Kaneni dang, ani keyakasi ngitunga epuunosi, sodi kitorikokis iyong talokookech ka tanakookech kingolik iyong aronis a elote kech ka ngakiro kech, inupi dir atamar ikwa iyookino eriras lo ayaunit ayong Yerusalem.

²³Inupi iyong atamar nyerirat ayong kesi pas, na ingolikinea elote kech ka eboyor. Ayong Ekapolon lo arai Ekapolon Akuj alimu nguna.”