Read turkana Esekiel 16 Bible Online

Esekiel 16 - turkana bible

Esekiel 16

¹Katolimok ayong Ekapolon Akuj nabo akiroit tama,

²“Itwaan, kidodik ngitunga a Yerusalem ngakiro nakikadakinete na esubete kesi.

³Tolimok Yerusalem atamar ayong Ekapolon Akuj lo arai Ekapolon Akuj alimunit ngakiro nugu, “Kidounio kolong iyong anakwap a Kanaan. Arai apakon ekitela a Ngiamor tarai itiokon ekitela a Ngiiti.[14]

⁴Ani eliwor akidouno kon, emam itwaan atub apusit kon akolongit na kidounere iyong, kori emam itwaan kilota iyong a ngakipi, kori kirigak amakat, kori kilogak ngiworui.

⁵Emam itwaan tani ipei ni abu kisien iyong kitosubea ngakiro nguna. Nakolong kidounere iyong, emam itwaan abu kitominak iyong. Aponi kimasakin naro nikalapatan.

⁶“Ani etoruni ayong neni, katoriam iyong ibelobelo anaakot kon. Katolimok ayong iyong kirumorito ngaakot atama, ‘Toyar,

⁷torup tokilikilu loger a ekitoe alo eyei mana.’ Ibu iyong topolo, tooyaar toliwor apese. Kiburut ngisikin, toruput tani ngitim, nakaneni imuner iyong.

⁸“Ani etoruni ayong neni nabo kengolik iyong kenang ni iiunea ekile. Abu katobutok iyong eworu kang, atarapea akwaan kon. Atachamakin ayong ka iyong atamar kiminakin. Ee robo, abu ayong katoner iyong, toliwor akang. Ayong Ekapolon Akuj lo arai Ekapolon Akuj alimu nguna.

⁹“Ani erumor atolem ayong ngakipi elotarea ngaakot anakwaan kon, kewasak iyong akimiet.

¹⁰Ketanap ngiworui lu edonyitoe asir. Katobutok ngamuk na ngileui aluajokak. Kainak awaru nakaanikan narapet akou ta eworu lokooyen lokamalamalan ajokon.

¹¹Ketanap ngigiel ka ngakoroomwa.

¹²Kainak asir na enapio alokume, ka ngamaritoi ta ekiraun loajokon lonapat anakou.

¹³Ketanap iyong egolit ka ngakwangae. Inapit iyong jiik ngiworui lukaanikak ka lukamalamalak lu edonyitoe asir. Inyami ngamugati na esubunitae anakiria anaajokak. Inyami akimiet a ao ta akimiet a ngikito. Toliwor akibuseanu kon nakesuparan, sodi toliwor iyong na ijakaanit.

¹⁴Kitoyenikin iyong anakwapea kadaang kotere akibuseanu kon naajokon, kainyo ayong kolong kesubusi iyong. Ayong Ekapolon Akuj lo arai Ekapolon Akuj alimu nguna.

¹⁵“Nakaneni ibu iyong kinyasu akibuseanu kon ka ekipur toliwor iperete ka itwaan cha daang ni etorun.

¹⁶Tolem iyong ngiworui kon ngiche kitisirio ni ilipeenea iyong, toliwor ni isubea iyong emalaanu kon neni. Emam ngakiro na ikote nguna na asubakinosi a ache kori nyesubakinosi monan.

¹⁷Tolem iyong asir a ngakwangae ka na egolit nakolong kainakini ayong iyong, tosubea ngakisikwaanet a ngikiliok sodi toloma ka kesi.

¹⁸Tolem iyong ngiworui lu edonyitoe asir lukolong kainakini ayong iyong kimukok ngakisikwaanet nguna, tolem iyong akimiet ka emitina lokolong kainakini ayong iyong, kipeyok ngakisikwaanet nguna.

¹⁹Kainakini kolong ayong iyong ngakiria naajokak, ka akimiet ta akimiet a ao, nakaneni tolem iyong akimuj ngina kitiliwo ngakipeyos na ejoikinete ngakujo kon nasubuna. Ayong Ekapolon lo arai Ekapolon Akuj alimu nguna.

²⁰“Tolem iyong talokookon ka tanakookon lukolong kidoikini iyong ayong, tachakak nakim toliworos ngakipeyos a ngakujo anasubuna. Esibit iyong epataka ngakiro a emalaanu kon a?

²¹Ikokini nabo iyong ilemuni ngide kang kipeyonok ngakujo nasubuna ai?

²²Anakiro ana kikadakinete iraakar iyong amalaat ngirwa daang, nyitamuna iyong jik ngirwa lukolong a ekiditeu kon, nakolong amamakar ibore inapit ibelobelor anaakot kon.”

²³Tolim Ekapolon lo erai Ekapolon Akuj tama, “Wae, Yerusalem! Oitiakoi! Abe etioko nginyas ianyuni iyong! Isubi iyong ngakiro naaronok nguna daang ani erumor,

²⁴toduk iyong lokwaasea a ngirotin kadaang ni ilipeenea iyong ngakujo kon nasubuna ka akisub emalaanu.

²⁵Nakisiakinet a erot kadaang, todukok iyong ni kilipet ngakujo, dio tosubea akibuseanu kon emalaanu. Toliwor iperete ka itwaan cha daang ni etorun. Toroner emalaanu kon noi akidwang daang.

²⁶Toloma iyong ka ngikidunyet kon lua etereku, kesi Ngimisiri. Ibu iyong kitalala emalaanu kon kitongo ayong a ngakiro kanguna.

²⁷“Kingolik a, anyou tokona ayong akirirare iyong ka atubwor apiaro napalem katiakakinit. Kepotok ayong iyong Ngipilisti lu eraakasi ngimoe kon, lukiremokino iyong, nabo ekadakinit emalaanu kon.

²⁸“Apot ngulu dang kitakada iyong! Ibu iyong tasaka ngitunga a Achuru. Tosuba iyong ka kesi emalaanu, nakaneni kitakad tani ngulu!

²⁹Ibu iyong kitalala emalaanu kon tani lotunga a Babilonia, lu eraakasi ngimuchurus, nakaneni kitakad tani ngulu!”

³⁰Ebala Ekapolon lo erai Ekapolon Akuj kona, “Edeak dir etau kon edeke a amera ka ngikonei! Nyikirumete iyong ngileech kotere emalaanu tani wadiochichi.

³¹Iduk iyong ni ilipeenea ngakujo nasubuna ka asubea emalaanu, iduk nakisiakinet a erot kadaang ka ni ikeuna. Nakaneni nyikoni iyong tani ngamalaae nache kainyo ijamuarit ngaropiyae.

³²Ikwaan iyong ka aberu na elomete ka ngitunga lugelayek akidwang aminakin lokile keng.

³³Abe palem bo etacheeneo amalaat, ani eliwor iyong idiakit talopae kon iinanakini ngainakinet poneta awadaang topero ka iyong.

³⁴Nyikwaan iyong ka ngamalaae nache alomalaanu kon. Emam itwaan kitingakini iyong emalaanu. Emam itwaan kitach iyong. Iyong ngesi itachi ngikiliok! Ee robo egelaana emalaanu kon!”

³⁵Tokona bocha Yerusalem, iyong amalaat naga! Kiira ngakiro na elimunit Ekapolon Akuj.

³⁶Ebala Ekapolon lo erai Ekapolon Akuj kona, “Ibutori iyong ngiworui kon loger a amalaat sodi topero kata lopae kon, dio kilip ngakujo nasubuna nakikadakinete, nabo taar ngide kon tarata ngakipeyos a ngakujo anasubuna.

³⁷Kotere ngakiro nguna, ayauni ayong talopae kon daang, lukolong imina iyong ka lukolong iremokino. Ayauni ayong kesi kiriam iyong, ani erumor atobuto ngiworui kon, sodi kisemoto kesi iyong imuner.

³⁸Kerirae ayong iyong kotere elomit ka akiar. Anangoit kang ka anyunyura, kerirae ayong iyong kataar.

³⁹Kepotokini ayong iyong talopae kon sodi toukosi kesi ngakais na isubeenea iyong emalaanu ka akilipea ngakujo nasubuna. Elemarete kesi ngiworui kon ka asir, kimiekis iyong imuner.

⁴⁰“Ichuchuunete kesi ajore a ngitunga kitachak iyong a ngamoru, sodi kitotubutubuoto iyong a ngilengea.

⁴¹Inomete kesi ngakais kon, kirirata iyong iteete ngaberu nakaalak. Ketapalikini ayong iyong emalaanu ka akipotonokin talopae kon ngiboro.

⁴²Ekokini ayong etemuni angoit kang anikon neni, edatak. Nyeringa nabo angoi kori katingi etereku kotere iyong.

⁴³Kimuriakis iyong ngakiro nakolong kasubea ayong iyong idit. Kitongo iyong ayong kotere ngakiro na isubi iyong nugu daang. Ngakiro nguna ngesi atachakinitor ayong ngakiro nakolong isubi iyong daang. Kotere nyo kolong iatakinea iyong emalaanu nakiro nakikadakinete nache sek isubi iyong? Ayong Ekapolon lo arai Ekapolon Akuj alimu nguna.”

⁴⁴Tolim Ekapolon Akuj tama, “Yerusalem, ani esakete ngitunga alimun ngakamatak anikon etamarete, ‘Nia ngatuny cha nia ngatuny!’

⁴⁵Iteni dir irai iyong ikoku a aberu ana kolong akadakinit ekile keng ka ngide keng. Ikwaan iyong ka tanakookon nakolong aremokino ngikiliok kech ka ngide. Iyong ka ngirerea luche lu idunyatar, arai itiokus aka ekitela a Ngiiti, tarai apakus eka ekitela a Ngiamor.[15]

⁴⁶“Nakaatokon naapolon ngesi Samaria. Ibakit alokwap ka ngadakarin keng. Nakaatokon naachi na alomit kuju kon ngesi Sodom ka ngadakarin keng.

⁴⁷Kitakad iyong akiwapit elote kech ka ngakiro nakikadakinete na asubete kesi. Wadiochichi cha kona, toroketa nakon noi akidwang nakech daang.

⁴⁸“Ekongi ayong Ekapolon lo arai Ekapolon Akuj na ayari atamar nakaatokon Sodom ka ngadakarin keng, nyesuba naaronok noi na ikote na isabakis iyong ka ngadakarin kon.

⁴⁹Enisasi ngesi ka tanakookeng kotere akimuj nakaalan na atingito ka eger lo ebooyoto a ekisil, nakaneni nyitana kesi lukebootok ka lu ibato ngakan.

⁵⁰Kinisakinos kesi kichanaketa, tosuba ngakiro na aremokino ayong. Atomunya ayong kesi na engolikinea nguna.

⁵¹“Ani eliwor Samaria, nyesubakina tani na enangito epewae a akisech kon. Isubak iyong nakaronok noi akidwang na asubaki ngesi. Ani itiriyanikinio aronis kon ka na naka tanakaatokon, toliwor nakech pas!

⁵²Kitir ngileech kon! Aroketa ngasechesea kon noi edwang na nakaatokon. Asubu nyesechito kesi. Kingolik tokona ngileech kon sodi kitir, kainyo itusub iyong tanakaatokon nyesechito.”

⁵³Tolimok Ekapolon Akuj Yerusalem tama, “Etojoki ayong nabo Sodom ka ngadakarin keng ta Samaria ka ngadakarin keng. Ee robo, ketojoki iyong dang.

⁵⁴Kirumete iyong ngileech kon a ilope. Idodikinete ngileech kon tanakaatokon atamar ejokak kesi.

⁵⁵Ani tanakaatokon, Sodom ka Samaria, ka tanakookech, ejokearosi ngakiro kech tobongo lopit lopalem sek. Iyong dang ka ngadakarin kon, ibongete lopit lopalem kus.

⁵⁶Pekolong ikianar iyong nakaatokon Sodom ngirwa lukolong iwogar iyong,

⁵⁷kolong eringa akisech kon nyileereuno a? Ikwaanikin tokona iyong ka Sodom. Iyong kikianatar Ngiedomae, ka Ngipilisti ta ngikidunyet kon luche lu kiremokino iyong.

⁵⁸Kitir eriras a ngakiro anaaronok anakikadakinete ana isubi iyong. Ayong Ekapolon Akuj alimu nguna.

⁵⁹“Abala ayong Ekapolon lo arai Ekapolon Akuj atamar iyong Yerusalem, kasubakinea na ejoikinit kisubere, kainyo nyirichakina iyong ngakichikakinet kon, nabo ichwangak achamunet.

⁶⁰Kaneni dang, etamuni ayong achamunet nakolong kichamakin ka iyong eringa iyong isorokana. Kichamakin ka iyong achamunet nakajik.

⁶¹Kitamu elote lokolong ilosi iyong sodi kiruma ngileech nakabuakinea iyong tanakaatokon naapolon ka naachi. Esikokini ayong kesi tanakookon, tani bo kolong pekichamakina ka iyong anakiro kanguna.

⁶²Abongokini ayong atachamakin ka iyong nabo, toyenea iyong atamar arai ayong Ekapolon Akuj.

⁶³Karimakini ayong iyong ngasechesea kon daang. Ani itamuni iyong na isubi daang, kitalarete kililing chek kotere ngileech, tobunak akituk jik. Ayong Ekapolon lo arai Ekapolon Akuj alimu nguna.”