Read turkana Esekiel 17 Bible Online

Esekiel 17 - turkana bible

Esekiel 17

¹Katolimok Ekapolon Akuj ayong akiroit tama,

²“Itwaan, kiruor a ngakamatak, tolimok Ngisirael akisikwaanet.

³Tolimok atamar ayong Ekapolon lo arai Ekapolon Akuj alimokinit kesi abala ‘Ayei kolong egole lotiapolon noi, apolok ngabeben keng. Aoyak ngakopir keng eleleba ngakoriyek nagelagelae. Toporo egole ngolo moru a Lebanon todo nalem a echekereng

⁴sodi toruto akuyen na alokidiama noi yaa nakwap a emuchuruseenu, kiwaak lore epei a ngimuchurus.

⁵Ani erumor tolem ekitoe lodiochichi anakwap a Isirael min kitak nalup naajokak na ayakasi ngakipi nakaalak na eturupunete ekitoe ngolo.

⁶Torup ekitoe ngolo toliwor emusabib lo ekilikili lo eliarit. Kiniapasi ngaten keng kidiama ni ayei egole. Kilijakin ngaten na alokwap nalup. Toburuchiasi emusabib ngolo ngaten ka ngakui.

⁷“ ‘Ayei nabo egole eche lotiapolon. Apolok ngabeben keng noi talalak ngakopir. Toreia emusabib ngolo ngaten na alokwap logole ngolo, toreia tani ngakui keng logole ngolo, iitanit atamar kainak egole ngolo ngakipi nakaalak na idwangito na ayakasi mana na arupunitor ngesi.

⁸Nakaneni etakinitae sek emusabib ngolo mana naajokon a ngalup ni ayakasi ngakipi nakaalak, sodi torupuneta ngakui tokoniunio ngamusabib nabo toliworor emusabib loajokon noi.

⁹“ ‘Engita tokona ayong Ekapolon lo arai Ekapolon Akuj abala, ekoe, erupuni emusabib logo dir toyar a? Nyedituni egole lo ekingaren ngaten keng, ka araraun ngamusabib tobilibilaa ngaten tooniyosi a? Nyiitanit ngilinga lukaalak kori ngitunga lukaalak arutun.

¹⁰Ee etakin ro ekitoe, nakaneni erupuni dir toyar a? Nyeoniyori cha dir na ekutunea ekuwam lo akide a? Eonikini nalup na itakinitae.’ ”

¹¹Katolimok ayong Ekapolon Akuj akiroit tama,

¹²“Kingit ngitunga lukechanak lugu keyenete eger a akisikwaanet kangina. Tolimok kesi atamar abuni ekapolon a Babilonia toriko ekapolon a Yerusalem ka ngikatukok keng toloto Babilonia.

¹³Tolem epei a ngiyenet a ekapolon, tachamakin ka ngesi sodi kisikong. Tolem ngitunga lu eyenikinitae kitiliwo ngirikon

¹⁴sodi nyeanyunea akwap ngina agogongu nabo kirichakinere achamunet a ekapolon a Babilonia.

¹⁵ Nakaneni abu ekapolon a Yuda tonger ngesi, tomea ngitunga keng Misiri akilipun ngangolei ka ngasigerea nakaalak. Ekoe, idwangi a? Ebuchar dir itwaan ni esubi ngakiro na ikote nugu a? Nyichwangakini ngesi achamunet sodi tobuchar nyirira!

¹⁶“Ayong Ekapolon lo arai Ekapolon Akuj na ayari, ekongi abala, etoanikini ekapolon ngolo Babilonia kainyo asechi ngesi ngikong ka achamunet nakolong achamakinosi ka ekapolon a Babilonia lokolong ainakini ngesi apolou.

¹⁷Tani ekapolon a Misiri ka ngasigerea keng nakajwok, nyingarakinete ngesi akitijwore ngitunga a Babilonia na iriamete kesi toduko ngawasea ka akibok ngalup taareta ngitunga lukaalak.

¹⁸Asechi ngesi nguna ekongokinit nabo nyemisikina achamunet. Kona asubea ngesi ngakiro daang, nyebuchar tokona.

¹⁹“Ekongi ayong Ekapolon lo arai Ekapolon Akuj na ayari abala, erirae ayong ngesi ani asechea achamunet nakolong ekongi ngesi a ekiro kang atamar erichakini.

²⁰Apetakini ayong epuute kang kidiama keng esurum ngesi. Arikori ayong ngesi Babilonia erira kaina, kainyo kangeri ngesi ayong.

²¹Eario ngasigerea keng nakajwok a akwara, ani lu epuunosi, topetaros. Toyenea atamar ayong Ekapolon Akuj alimu nguna.”

²²Ebala Ekapolon lo arai Ekapolon Akuj kona, “Alemu ayong alem a echekereng alokooyen, atubwo ni ilijaunit alongaren. Etak moru lokooyen,

²³moru a Isirael lokooyen noi. Erupunete ngaten tokoniu ageor toliwor echekereng loajokon. Elomete ngikitetio daang a ngitieng neni. Ngikitetio daang a ngikieny, edukete ngakais naten keng.

²⁴Eyenunete ngikito daang anakwap atamar ayong arai Ekapolon Akuj. Atubi ayong ngikito lukooyak sodi eturup luuchik tooyaketa. Etooni ayong ngikito lukalibak sodi etilib lukoonok. Ayong Ekapolon Akuj alimu nguna, nabo asubakini nguna alimu.”