Read turkana Esekiel 18 Bible Online

Esekiel 18 - turkana bible

Esekiel 18

¹Katolimok ayong Ekapolon Akuj nabo akiroit tama,

² “Nyo ebongonokinioto ngitunga alimuunun ngakamatak nabe, ‘Anyamete taapa ngamusabib nakaabarak sodi kisaalik ngikel a ngide kech!’

³“Ekongi ayong Ekapolon lo arai Ekapolon Akuj na ayari atamar nyeringa ngakamatak nguna elimunio alo Isirael nabo.

⁴Erai akiyar a itwaan kadaang akang, akiyar ka apa ka na ikoku. Itwaan ni esechi ngesi etoani.

⁵“Ani keyei itwaan niajokon dir ni etenoono tarai ni emunoi,

⁶ni nyenyami ngakipeyos na elemikinitae ngakujo nasubuna alomoru kori nyigieno ngakujo nguna, ni nyinyasuni aberu a ekile aloche, kori nyeperete ka aberu na ibooyi,

⁷ni nyingalaari itwaan ibore keng, pearai inyiakakini ibore nisek ainakinitae idaritere amicha etachio, nyekokoi tani lu enyamit akoro, nabo einanakini lu emuner ibore ninapat,

⁸nyipotori ngesi ngaropiyae taarae amicha tangatarea na idokitoe, iratakinit akan keng anaaronok, etubi ngikesio a ngitunga eriyan.

⁹ Itwaan ngini iwapit ngakiro na adunguni ayong, nabo irichakinit ngitalio kang, etenoono ngesi eyari dir. Ayong Ekapolon lo arai Ekapolon Akuj alimu nguna.

¹⁰“Ani keyei itwaan ngini lokookeng lokokolan tarai ekaaran, lo esubi ngakiro daang

¹¹nakolong nyesuba apakeng. Enyami ngakipeyos na elemikinitae ngakujo nasubuna alomoru ka akinyasun ngaberu a ngikiliok aluche.

¹²Eboliar ngikebootok ka lu ichanasi, ekokoi nabo nyinyiakari ibore ni einakinitae idaritere amicha etachio. Ilipeene ngakujo nasubuna ka akisub ngakiro nakikadakinete,

¹³Idoki ngaropiyae na earitae amicha sodi tangatarea nache. Kotere ngakiro nguna, etoani ngesi ani asubea ngakiro nakikadakinete nugu daang. Eliworosi ngakiro a akitu keng ngaka akiding keng a ilope.

¹⁴“Ani keyei itwaan nia ngiarei ngini lokookeng, lo engolik ngasechesea nakolong asubi apakeng daang, nakaneni nyiiwap ekitetemes a apakeng.

¹⁵Nyilipit ngakujo nasubuna a Ngisirael kori nyenyami ngakipeyos na elemikinitae ngakujo nasubuna alomoru. Nyinyasuni ngaberu a ngikiliok aluche.

¹⁶Nyesechakini itwaan, nyewounea ibore a itwaan nisek idaritere amicha etachio, nabo nyekokoi pearai itani lu enyamit akoro, ka ainakin lu emuner ibore ninapat.

¹⁷Iratakinit akan keng anaaronok, nabo nyipotonori ngaropiyae taarae amicha sodi tangatarea na idokitoe. Iwapit ngakiro na adunguni ayong, kirichakinite ngitalio kang. Nyetoani ngesi kotere ngasechesea a apakeng, eyari ngesi dir.

¹⁸Ani eliwor apakeng, etoani kotere akisech keng, kainyo ademuununi lokaatokeng ngiboro tokokoi, tosubea ngitunga naaronok. Kingolik a, etoani ngesi dir kotere akisech keng.

¹⁹“Nakaneni ingitasi esi ibalasi, ‘Nyo peiriraare ikoku kotere akisech a apakeng?’ Asubi ikoku nguna iyookino ka naajokak. Erichakinit ngesi ngitalio ka akiwap lokojokon. Kotere ngakiro nguna, eyari ngesi dir.

²⁰ Itwaan ni esechi ngesi etoani. Nyetoani ikoku kotere ngasechesea a apakeng, kori nyetoani apa kotere ngasechesea a lokookeng. Einakinio itwaan niajokon ebachit kotere naajokak na esubi, nakaneni irirao itwaan niaronon kotere naaronok na esubi.

²¹“Ani kereeun itwaan niaronon anasechesea kadaang ana esubi, sodi kirichak ngitalio kang, tosub na eteniyete ka na iyookino, nyetoani ngesi. Eyari ngesi dir.

²²Erimakinio ngasechesea keng daang, eyari ngesi kotere ateneanut keng.

²³Esibit esi kajoikinit ayong Ekapolon lo arai Ekapolon Akuj akitu a itwaan aniaronon a? Mam jik! Kajoikinit ayong elungi ngesi naaronok sodi toyar.

²⁴“Nakaneni ani kepaliki itwaan ni etenoono ateneanut keng, toroner tosub ngakiro nakikadakinete na esubi itwaan niaronon, erubakini ngesi dir eyari a? Mam jik! Nyitamunio nakolong ajokak asubi ngesi tani apei. Etoani ngesi kotere amodeanut keng ka ngasechesea keng.

²⁵“Nakaneni ibalasi esi, ‘Nyiyookino ngakiro na esubi Ekapolon Akuj.’ Topupokisi Ngisirael, esibit esi nyiyookino esube kang ngakiro a? Esube kus ngakiro ngesi nyiyookino.

²⁶Na epalikinea itwaan niajokon akisub naajokak, kisiak akisub naaronok, sodi totoan, etoani ngesi kotere akisech na esubi.

²⁷Na epalikinea itwaan niaronon akisech, tosub na eteniyete ka na iyookino, eyuun ngesi.

²⁸Ani kona etamakinea ngesi toreeun anasechesea kadaang ana esubi, eyari ngesi dir, nyetoani.

²⁹Nakaneni ibalasi esi Ngisirael, ‘Nyiyookino ngakiro na esubi Ekapolon Akuj.’ Esibit esi nyiyookino esube kang ngakiro a? Esube kus ngakiro ngesi nyiyookino.

³⁰“Tokona bocha, ayong Ekapolon lo arai Ekapolon Akuj kalimokinit esi Ngisirael atamar erirae ayong itwaan daang itemem ka ngakiro na asubaki. Tolunga ngasechesea toreeunos anakiro anaaronok kadaang ana isubete esi. Warasi akisech kus nyikinyasu esi.

³¹Tolunga naaronok daang nakolong kisubeta esi ayong, taanyut ngitamen ka ngitai lukiteat. Ngisirael, nyo isaketa esi akitu?

³²Emam itwaan kajoikinit ayong akitu keng. Toreeunos anasechesea kus toyara. Ayong Ekapolon lo arai Ekapolon Akuj alimu nguna.”