Read turkana Esekiel 19 Bible Online

Esekiel 19 - turkana bible

Esekiel 19

¹Kalimokini Ekapolon Akuj ayong atamar atoeok eeos loa akialolong logo kotere ngikatukok luarei a Isirael.

²Arai itiokon ngae? Arai itiokon angatuny! Awowooto ka ngingatunyo luche, kitanu ngitak keng alokiding kech.

³Kitanu ngesi itaok keng ipei, toliwor engatuny! Kitatam ngesi akirikare, toliwor engatuny lokanyaman ngitunga.

⁴Kiirasi ngibukui ngakiro keng tolokakis ngesi kisuruma a eloit. Kiurukukoosi ngesi Misiri a ngikodo.

⁵Kidar itiokeng ngesi ebonguni, tanang eanyuni atamar nyeringa ebonguni. Sodi kitopolou ngesi itaok keng iche, toliwor engatuny lokaadengan.

⁶Ani epoloe ngesi, kisiak akirimit akwap ka ngingatunyo luche. Kisiak ngesi dang akirikare toliwor engatuny lokanyaman ngitunga.

⁷Touko ngesi ngawasea kech nakaagongok, kinyasu ngirerea kech. Tobul ngitunga daang anakwap nacha irurumakinea ngesi.

⁸Tochunun ngibukui alowaitin kadaang a ngakwapea kech potu akirikare engatuny ngolo. Tolokakis ngaunoi kech sodi kisuruma ngesi a eloit.

⁹Kilomakis ngesi kai a engatuny, yaasi lokapolon a Babilon. Togolokinoe ngesi kaina, sodi nyiirarea akirurumare keng nabo alokidiama ngimoru a Isirael.

¹⁰Ekoni itiokon emusabib lo etakinitae lokwaas a ngakipi, lo arait tasabuk, ani ayakar nakipi nakaalak.

¹¹Apot ngaten keng nakaagongok toliworos ngaburoi a apolou. Tooyaar emusabib ngolo kilany ngikito luche. Kipuruut ngitunga alangirir a ateni keng.

¹²Nakaneni aponi ngesi torutoroe a angoit, tachakakinae nalup. Kitooniyo ngesi ekuwam lo a akide, tararaun ageor keng, tooniyosi ngaten keng naapolok tonomia akim.

¹³Etakin tokona nariet nakwap nakoonon na emam ngakipi.

¹⁴Ekam atorom keng akim, anomia ngaten keng ka ageor. Nyeringa nabo ngaten keng nakaagongok eliworosi ngaburoi a apolou. Erai eeos logo eka akialolong. Eeonokinio jiik.