Read turkana Esekiel 20 Bible Online

Esekiel 20 - turkana bible

Esekiel 20

¹Akolongit na a ngatomon a elap alo a ngikan a ekaru alo a ngikan-kaarei, pot ngikasukou ngiche a Isirael nikang akingita ngakiro na esaki Ekapolon Akuj, kiboikinos ngaren kang.

²Katolimok Ekapolon Akuj ayong akiroit tama,

³“Itwaan, kisuruor ngikasukou lugu tolimok atamar abala ayong Ekapolon lo arai Ekapolon Akuj kona, ‘Iponito ba esi akingita ngakiro na asaki ayong? Ekongi ayong a ekiro kang a ilope atamar kona araakar ayong Akuj na ayari, nyachamuni ayong esi kingisete ayong ngakiro. Ayong Ekapolon Akuj alimu nguna.’

⁴“Itwaan, inyounit iyong akitub ngakiro a ngitunga kalu a? Tolimok robo kesi ngakiro nakikadakinete nakolong asubete taapakech.

⁵Tolimok kesi atamar abala ayong Ekapolon Akuj Namerikanyer kona: Akolongit nakolong aseunea ayong Isirael, abu ayong ekong anaur a Yakobo eteyen kesi alo Misiri. Ekongok kesi atama, ‘Ayong arai Ekapolon lo arai Ekapolon Akuj kus.’

⁶Akolongit ngina ekongio ayong atamar epuduni kesi anakwap a Misiri, sodi ayaa nakwap nakolong asakakini ayong kesi, na ileleba ngakile ka akimiet a ao, akwap nakebusean noi akidwang daang.

⁷Atolimok ayong kesi atama, ‘Tachakasi daang ngakujo nakikadakinete na iminasi esi, nyiitiliwosi ngawat kus na nyitaleuno kotere ngakujo nasubuna a Misiri, kainyo arai ayong Ekapolon Akuj na arai Akuj kus.’

⁸Nakaneni apot kesi katongero ayong, towout akiirar ngakiro kang. Apot nyeepalikis ngakiro kech nakikadakinete, nabo nyechakara ngakujo a Misiri nasubuna. Abu ayong atama abukokini kesi anyunyura kang, esunyak kesi angoit kang daang kaina alo Misiri.

⁹ Nakaneni abu ayong nyaasubak kongina sodi nyiimenyarere ekiro kang, kainyo alimokini kolong ayong Ngisirael alongaren ngitunga lu arukito ka kesi atamar epuduni kesi alo Misiri.

¹⁰“Sodi epud ayong kesi alo Misiri atoriko nariet.

¹¹Ainak kesi ngakitatamet kang nabo etatam ngitalio kang, lu eraakasi ani kiwap itwaan, toyar.

¹²Ainak kesi ngirwa lua Sabato toliworos emachar a achamunet kang ka kesi, lo isitamunit kesi atamar ayong Ekapolon Akuj etaleuni kesi.

¹³Nakaneni katongero Ngisirael ayong anariet. Towout akiwap ngakiro na adungokini ayong, ka ngitalio kang lu eraakasi ani kiwap itwaan, toyar. Kimenyasi kesi ngasabatoi lokojokon. Abu ayong atama atobukok kesi anyunyura kang anariet atomunya pil.

¹⁴Nakaneni abu ayong emiek ngakiro nguna kotere ekiro kang nyiimenyarere alokiding ngibukui lukolong keteete ayong epuduni Ngisirael alo Misiri.

¹⁵Tani ikoni neni, abu ayong ekong anariet atamar nyayauni kesi nakwap nakolong ainakinit ayong kesi, akwap na ileleba ngakile ka akimiet a ao, akwap nakebusean noi na idwangit ngakwapea daang.

¹⁶ Ekokini ayong neni kainyo angerete kolong kesi ngitalio kang towout akiwap ngakiro na adunguni ayong, nabo kimenyasi ngasabatoi kang, kainyo aminasi kesi akilipit ngakujo nasubuna.

¹⁷“Kaneni dang, apot kesi kesieneto ayong. Atalakak ayong kesi nyaamunya anariet.

¹⁸Atolimok ayong ngide kech anariet atama, ‘Nyiiwap ngakiro na edungunete taapaakus. Nyiirichakis ngitalio kech kori nyiinyasut ngawat kus a ngakujo kech anasubuna.

¹⁹Ayong Ekapolon Akuj arai Akuj kus. Kiwapa ngakiro na adunguni ayong, kirichakis ngitalio kang.

²⁰Kitaleutu akolongit na Sabato, na erai emachar a achamunet kang ka esi, na kisitamuni esi atamar arai ayong Ekapolon Akuj na arai Akuj kus.’

²¹“Nakaneni apot tani ngalesea nguna katongero ayong. Nyiwapa ngakiro na adungunit ayong, nabo nyirichakina ngitalio kang lu eraakasi ani kiwap itwaan, toyar. Kimenyasi kesi ngasabatoi kang. Abu ayong atama atobukok kesi anyunyura kang anariet atomunya pil.

²²Nakaneni abu ayong eratak akan kang nyaasubak nguna, sodi nyiimenyarere ekiro kang alokiding ngibukui lukolong keteete ayong epuduni Ngisirael alo Misiri.

²³Tani kikoni neni, ekong ayong anariet atamar apetari kesi nakwapea nakalonak, etolom kiding ngibukui.

²⁴ Ikokinete nguna neni kainyo awounete kesi akiwap ngitalio kang, tongero ngakiro na adunguni ayong, kimenyasi ngasabatoi kang nabo tominakis kesi akilip ngakujo nasubuna nakolong elipito taapaakech.

²⁵“Atodungok ayong kesi ngakiro naaronok ka ngitalio lu adikino kesi peanyuneta akiyar.

²⁶Enyasu ayong kesi a ngakipeyos kech a ngikulepek, emiek kesi ipeyoote ngide kech lusapa lu ekingaren. Asubi ayong kongina toyeneta kesi atamar arai ayong Ekapolon Akuj.

²⁷“Tokona bocha itwaan, tolimok Ngisirael ngakiro na esuruori ayong Ekapolon lo arai Ekapolon Akuj kesi abala, keyenyete kolong taapakech ayong loger logo, ani kamodeaneta.

²⁸Ayauni kolong ayong kesi nakwap nakolong echikakini kesi atamar ainakini. Toliwor nacha ingolikineta kesi emukura lokooyen daang, kori ekitoe lokaliban, kipeyoto ngakipeyos kech kaneni, sodi ketilileta ayong a ngakipeyos ana enomete ka emuna lo abukonokinete neni.

²⁹Engit ayong kesi atama, ‘Enyaritae ni ikeuna ni iloseenete esi ngae?’ Tolimokis kesi neni ekiro be ‘Ni ikeuna’[16] tani tokona.

³⁰Tolimok tokona Ngisirael atamar abala ayong Ekapolon lo arai Ekapolon Akuj kona: Inyasunosi esi ani isubeta ngasechesea napei kolong kata apaakus, kibataros ani iwapeta ngakiro kech nakikadakinete.

³¹Na ilemuneta esi ngadekon napei nguna ka akipeyore talokookus,[17] kitiliwosi esi ngakujo nguna lu nyitaleuno tanang akolongit naga. Ani erumor abe pot esi Ngisirael akingisit ayong ngakiro na asaki! Nakaneni ekongi ayong Ekapolon lo arai Ekapolon Akuj a ekiro kang a ilope atamar nyekemiekini esi kingisete ayong ngakiro.

³²Itiakut esi atamar isakete kikwaanikin ka ngibukui luche, kikwaanikin ka ngitunga lu elomito nakwapea nache lu ilipito ngikito ka ngatabab. Nakaneni nyesubakinosi nguna jik.

³³“Ekongi ayong Ekapolon lo arai Ekapolon Akuj a ekiro kang a ilope atamar kapolokini ayong esi a akan ana ngikilinga, ana itorwaaritae, katobukok esi anyunyura kang.

³⁴Kepuduni ayong esi alobukui, katochun anakwapea ana kolong ipetakina a akan ana ngikilinga ana itorwaaritae, dio katobukok anyunyura kang.

³⁵Kayaari esi nariet a ngibukui, atotub ngakiro kus kaneni, kikienyikina.

³⁶Loger lokolong atubio ngakiro kata apaakus anariet alo Misiri, atubi ngakiro kus loger ngolo. Ayong Ekapolon lo arai Ekapolon Akuj alimu nguna.

³⁷“Kapolokini esi niationon, kesiwapak achamunet kang.

³⁸Alemari ayong alokiding kus ngulu kangerete ayong ka ngulu ketulunyete. Etwarakini ayong kesi anakwap ana epeyonitotor, nakaneni nyelomarete nakwap a Isirael jik. Toyeneta esi atamar arai ayong Ekapolon Akuj.

³⁹“Ani eliwor esi Ngisirael, alimunit ayong Ekapolon lo arai Ekapolon Akuj atamar, kapesi tosuba ngakujo kus nasubuna. Napei tokona jik, erai kiwounito akiirar ngakiro kang. Nakaneni nyeringa nabo esi imenyarete ekiro kang lo italeuno ani ilemanakineta ngakujo kus nasubuna ngainakinet.

⁴⁰Kainyo kelipete ayong Ngisirael daang alokidiama emoru kang,[18] alo erai emoru lokooyen a Isirael. Kachamuni ayong esi kaina sodi eitan ngakipeyos kus, ka ngadekon naajokak ta ngainakinet na italeuno.

⁴¹Ani kepud ayong esi anakwapea ana kolong ipetakina esi, katochunak achamuni ngakipeyos nakaakunyok, nabo edodiuni ayong akitaleuno kang anikus kingolikis ngibukui.

⁴²Iyenunete esi atamar arai ayong Ekapolon Akuj, nakayaunea esi nakwap a Isirael, nakolong ekongi ayong atamar ainakini taapaakus.

⁴³Itamunete esi kaina elote kus ka ngakiro na isubete esi daang nakolong kinyasunete esi. Ikadanakinosi esi make kotere ngakiro naaronok daang nakolong isubete esi.

⁴⁴Ani kanyou ayong atoweik ekiro kang nyiimenyar, iyenunete esi atamar arai ayong Ekapolon Akuj, kainyo nyasubi ayong nguna itemem ka ngakiro naaronok isubete esi. Ayong Ekapolon lo arai Ekapolon Akuj alimu nguna.”

⁴⁵Katolimok Ekapolon Akuj ayong akiroit tama,

⁴⁶“Itwaan, tokienyia kuju, kikilak akwap na alokuju, todwar naaronok anamoni ana alokuju.

⁴⁷Tolimok amoni na alokuju tama, kiira ngakiro na alimunit ayong Ekapolon lo arai Ekapolon Akuj abala, kingolik a, enokakini ayong akim anikon, tonomia ngikito kon daang, lokaliban ka lokoonon. Emam ibore itudunge akim ngina kori nyedipakin asarae. Enyamiari akwap napei alokuju tanang kwap, iwarakini itwaan daang nikamonan.

⁴⁸Ingolikini itwaan daang atamar ayong Ekapolon Akuj enokak akim ngina, nabo emam itwaan itudunge.”

⁴⁹Abu ayong atama, “Wae, Ekapolon lo arai Ekapolon Akuj, alomasi ngitunga akisuburare ayong ebalasi, ‘Aliwor logo ngakisikwaanet make iruoro!’ ”