Read turkana Esekiel 21 Bible Online

Esekiel 21 - turkana bible

Esekiel 21

¹Katolimok Ekapolon Akuj ayong akiroit tama,

²“Itwaan, tokienyia Yerusalem kikilak. Kikilak tani ni ilipeeneta ngitunga. Kikilak akwap a Isirael.

³Tolimok akwap a Isirael atamar abala ayong Ekapolon Akuj atamar, kingolik a, kanyoikinit ayong iyong. Alachakini ayong akuroru a akwara kang, kataar esi daang, luajokak ka luaronok.

⁴Ani aloger kaarea ayong esi daang, luajokak ka luaronok, eutun akwara kang anakiroru kang taar ngitunga daang, napei alokuju tanang kwap.

⁵Toyen itwaan daang atamar ayong Ekapolon Akuj aut akwara kang, nyerepakini nabo nakuroru.

⁶“Itwaan, tokunuak esibit eriangakina etau kon, elilimiyorit. Tokunuak ialolongi, ani kingolikineta ngitunga daang.

⁷Ani kingisete kesi iyong etamarete, ‘Nyo ikunuar iyong?’ Ilimuni iyong tama, ‘Erai kotere ngakiro na eponito. Ani epote ngakiro nguna, ipirisaar ngitai a ngitunga kadaang, elilimiyorete ngakan, irakarosi ngitunga tamaranikis ngakungin. Kingolikisi, adolut nabo esubakinosi!’ Ayong Ekapolon lo arai Ekapolon Akuj alimu nguna.”

⁸Katolimok Ekapolon Akuj ayong akiroit tama,

⁹“Itwaan, todwar. Tolimok ngitunga ngakiro na alimu ayong Ekapolon Akuj abala, Akwara, epenar akwara nabo esutar.

¹⁰Epenar taarere, esutar imilea loger a akimileaunet! Emam ekichur emini kainyo angero ngitunga kang ngakichikichiket daang ka eriras.

¹¹Ipenio akwara sodi totingere. Epenar nabo esutar nakinere ekaaran.

¹²Itwaan, kikalou kiute kainyo edodiar akwara lotunga kang earere ngikatukok a Isirael daang. Ngiaran kesi ka ngitunga kang luche. Taramaramata robo ngirarumo kus.

¹³Aroit ayong ngitunga kang ani pekelunga kesi akisech, esubakinosi nguna anikech.

¹⁴“Itwaan, todwar. Taram ngakan kon. Ichumi akwara ngakichumet nakaalak. Erai akwara aketubulon nabo eari.

¹⁵Ipirisaari ngitai a ngitunga kang. Edakakinosi lukaalak lodorin kech. Epoto ayong akwara na ebala peak. Ee robo, ikwaan ka akimilea, isutaritae taarere.

¹⁶Ee akwara nakakwanan, kichum lowae lo aloteten ka kedieny! Kichum ewae locha ingoliari iyong.

¹⁷Arami ayong dang ngakan kang, esalu angoit kang. Ayong Ekapolon Akuj alimu nguna.”

¹⁸Katolimok Ekapolon Akuj ayong akiroit tama,

¹⁹“Itwaan, kigerok ngirotin ngiarei lu itoruni akwara a ekapolon a Babilonia ebuni. Enyounete ngirotin ngulu daang anakwap a apei. Kiwaak emachar ni ichiereta ngirotin kidodiu ni eyei ere.

²⁰Kigerok erot ni itori akwara elosi akichum ere a Raba lo a Ngiamon, kigerok loche lo elosi lore a Yerusalem lo isiriamitae awas nakaagongon anakwap a Yuda.

²¹Ewei ekapolon a Babilonia ani ichiereta ngirotin. Ani esaki akiyen erot lo itori ngesi, tomuro ani ilongolongakinea ngimalea a akau, tomuro ngakujo keng nasubuna, ka akisemere ngamaliteny[19] a ibarasit ani ipeyeo.

²²Akan keng na aloteten, etingit emachar lo igiritae ‘Yerusalem’! Tolimok ngesi atamar tolem ngasua naukonoret, taram elea lo ejie, todupak ngasua naukonoret lodorin, kiriwok ngakatiputipui ta ngaduon, kisiriama ere.

²³Nyenupete ngitunga a Yerusalem nguna, kotere ngakiro nakolong sek ekongokis kesi. Tani kikoni neni, isitamunete na edwaritae nugu kesi ngasechesea kech, kichikichik kesi atamar eliworosi monan ngirikon.

²⁴Ngakiro nugu ngesi alimu ayong Ekapolon lo arai Ekapolon Akuj. Ewolun ngasechesea kus. Eyeni itwaan daang eger lo isechitotor esi. Idodiunito esi akisech alolote kus kadaang. Ejoikinit esi kirirao. Kepotokini ayong esi ngimoe kus.

²⁵“Ee ekapolon a Isirael lo nyitaleuno, iyong lokaronon, anang akolongit kon na eriras alo esal.

²⁶Alimu ayong Ekapolon lo arai Ekapolon Akuj atamar, tobuto ekiraun kon ka apukot. Nyerubakinete ngakiro ikote nipalem. Kikeu ngikebootok, totiyaa ngikapolok.

²⁷Ee robo, etiliwori ayong ere asakatan. Nakaneni nyesubakinosi nguna mati kebu ngolo aseunit ayong akirirare ere, dio ainak ayong ngesi ere.

²⁸“Itwaan, todwar. Tolimo ngakiro na alimunit ayong Ekapolon lo Ekapolon arai Akuj, alimokinit Ngiamon, lu iyenyete Ngisirael. Tolimok kesi kona, ‘Ekear akwara esakere akichumea, esutar amalamal, kimilea loger a akimileaunet.

²⁹“ ‘Ngaka alioko ngakisingolikinet na ingolianakinete esi. Alioko ngakiro na idwareenete esi. Iroko esi, nyitaleuno. Anang akolongit kus na eriras alo esal. Edoe akwara losiepion kus.

³⁰“ ‘Tobuak akwara nakuroru. Kerirae ayong esi anakwap ana kolong kisubunere. Ee robo, anakwap ana kolong kidounere.

³¹Kinomi esi angoit kang, na alakakinea ayong erirauni loger a akim. Kepotori ayong esi kainak ngitunga lukamoitanak, lu eperikinito nginyas.

³² Kimunyari esi akim. Ebukor ngaakot kus anakwap kus a ngikulepek. Emam itwaan kitamuni esi nabo jik. Ayong Ekapolon Akuj alimu nguna.’ ”