Read turkana Esekiel 22 Bible Online

Esekiel 22 - turkana bible

Esekiel 22

¹Katolimok Ekapolon Akuj ayong akiroit tama,

²“Itwaan, inyounit iyong akitub ngakiro a ere alo a ngikaarak kalo a? Kasio tolimok ngesi ngakiro daang nakikadakinete na asub ngesi.

³Tolimok ere ngolo atamar abala ayong Ekapolon lo arai Ekapolon Akuj kona, ‘Aloger iraakar iyong ere lo iar ngitunga kon lukaalak, nabo inyasun iyong ani ilipeenea ngakujo nasubuna, adol akolongit kon.

⁴Isechit iyong ani ibukorea ngaakot a ngitunga, nabo kinyasut ngakujo na isubak iyong. Itaapu iyong akolongit kon na eriras. Adaun ngirwa kon! Ngakiro nguna kesi emiekinea ayong ngibukui kikianatar iyong, sodi kimenyasi iyong ngakwapea daang.

⁵Ngulu eapiyete ka lu eloka, kikianatar iyong kotere asechanu ka erukoonu kon.

⁶Ngikarikok a Isirael daang lu eyakasi nikon, elemunito ngikilinga kech abukorea ngaakot.

⁷Nyekeritae ngikauriak anikon. Ingalao ngitunga lua ngakwapea anache anikon. Eboliare ngikokiok ka ngapuseru.

⁸Imenyarit iyong ngiboro kang lu italeuno, kisurum ngasabatoi kang ngileech.

⁹Eyakasi nikon ngitunga lu itinganakinete luche ngakiro, esakete taarae. Imujete ngiche ngakipeyos a ngakujo anasubuna alomoru. Eyakasi lu iwapito etereku kech loaronon.

¹⁰Eyakasi nikon ngitunga lu epereenete ka ngaberu kata apakech. Etikoonorete ngiche ngaberu ngirwa lu ibooyoto.

¹¹Eraakasi ngiche ngikalomak. Imalaate ngiche ngaterak kech, kimalaate ngiche ta nakaapakech.

¹² Eyakasi nikon ngitunga lu etachio ngaropiyae taareta luche. Idokete ngiche ngaropiyae na imichaanarete Ngisirael luche, tabarakis nakingalare. Kemiekis kesi ayong. Ayong Ekapolon lo arai Ekapolon Akuj alimu nguna.

¹³“ ‘Iyong Yerusalem, kelulungikini ayong iyong akan kedichak kotere ademanu kon ka ngitunga lu iar iyong.

¹⁴Ipedori iyong ititiny a? Egogongerosi ngakan kon dir ngirwa lu kiruoror ayong ka iyong a? Alimu ayong Ekapolon Akuj, nabo asubakini.

¹⁵Kapetari ayong esi lobukui, kiealakinos nakwapea daang, sodi ekisa aronis kus.

¹⁶Kotere nguna, kimenyarete iyong ngibukui luche nakaneni iyenunete esi atamar arai ayong Ekapolon Akuj.’ ”

¹⁷Katolimok Ekapolon Akuj akiroit tama,

¹⁸“Itwaan, ekokis Ngisirael asakatan anikang. Ekokis asakatan a asuat ananyang ka asuat naakwaan, ka asuat nakirion ta asuat naapotion na idongete esaa lo itosegere asuat a akim.

¹⁹Alimu tokona ayong Ekapolon lo arai Ekapolon Akuj atamar kona ekokineta kesi daang asakatan a ngasua, achununi ayong kesi daang Yerusalem.

²⁰Achununi loger lo echununere akwangat, ka asuat nanyang, ka asuat nakirion, ka asuat naapotion ta asuat naakwaan, kiwaakinae nasarae na itosegere. Itekeiari angoit kang ka anyunyura kesi loger lo itekeianarea akim ngasua.

²¹Ee robo, achunakini ayong kesi Yerusalem, enokak akim a angoit kang kidiama kech, kitokeia kesi.

²²Itokeiario kesi alo Yerusalem loger lo itokeiarere ngasua anakim, toyeneta kesi atamar abukok ayong Ekapolon Akuj anyunyura kang kidiama kech.”

²³Katolimok Ekapolon Akuj ayong akiroit tama,

²⁴“Itwaan, tolimok Ngisirael atamar nyitaleuno akwap kech. Kotere nguna, erirae ayong a angoit kang.

²⁵Ikwaan ngikarikok kus ka engatuny lo irurumae erusi akiring a etiengit. Earete kesi ngitunga, todemasi asir ka ngiboro kech daang. Eatakis kesi ekimar a ngapuseru alore.

²⁶Ichwanganakinete ngimurok kus ngitalio kang, nabo imenyarito ngiboro kang lu italeuno. Nyetiakito kesi ngiboro lu italeuno ka lu nyitaleuno. Nyitatamete kesi ngakiro na etiakito ibore ni italeuno ka ni nyitaleuno, nabo nyekachito kesi ngasabatoi kang. Kotere ngakiro nguna, nyakakerito Ngisirael ayong.

²⁷Ikwaan ngikarikok a ere ka ngikweei lu erwakinosi akiring a ibarasit ani earete kiealasi. Earete kesi ngitunga tabareta.

²⁸Iweito ngikadwarak kus ngakiro nguna, loger lo iwasakinea itwaan emunyen lokwaan lokwaas a akai loaronon. Ingoleanakinete ngakisingolikinet na alioko, nabo edwarete ngakiro napasiek, niti ebalasi, ‘Ebala Ekapolon lo erai Ekapolon Akuj kona’, tarai bo nyisuruoro ayong Ekapolon Akuj kesi.

²⁹Ingalaate ngikabarak ngitunga ka akidem ngiboro. Eboliatar kesi ngikebootok ka lu ichanasi ta ngitunga a ngakwapea anache.

³⁰Atasak ayong itwaan alokiding kech ni edukokini awas kitowo. Ani erumor towo alongaren kang kitubuikin ni eukoro, sodi kiratak akwap nyeenyasu ayong. Nakaneni abu nyeanyunga itwaan tani ipei.

³¹ Kotere nguna abukok ayong angoit kang nikech, atomunya kesi a akim a anyunyura kang, itemem ka na asuba kesi. Ayong Ekapolon lo arai Ekapolon Akuj alimu nguna.”