Read turkana Esekiel 23 Bible Online

Esekiel 23 - turkana bible

Esekiel 23

¹Katolimok Ekapolon Akuj ayong akiroit tama,

²“Itwaan, ayakasi kolong ngakaitotoi ngaarei, ngide a aberu a apei.

³Nakolong ayakatar kesi Misiri, eringa esorokoka, apot tosuba emalaanu, kimiekis ngisikin kech emunao, nabo toboliare epesuraane kech.

⁴Anyaritae naapolon Ohola, ani naachi anyaritae Oholiba. Abu ayong eut kesi, kedoikis ngide lusapa ka lupesur. Ohola ngesi Samaria, Oholiba ngesi Yerusalem.

⁵Asubi Ohola emalaanu tarai na arai aberu kang. Aminarito ngikiliok keng lua Achuru.

⁶Araakasi kesi ngasigerea na anapito ngiworui lupusiek-arengak, ka ngikapolok a arieng ta ngikarikok a ngasigerea. Araakasi kesi daang ngisorok lukebuseak lu ameto ngangolei.

⁷Toliwor ngesi amalaat a ngikapolok a Achuru kadaang. Kinyasu ngesi eboyor keng toliwor ngesi na nyitaleuno ani elipea ngakujo nasubuna a ekile kadaang alo elomete ka ngesi.

⁸Nyimiekina ngesi emalaanu keng lokolong asubi alo Misiri, kainyo aperete ngesi ka ngikiliok eringa esorokana, kinyasut ngikiliok epesuraane keng, kisunyakis etereku kech nikeng.

⁹Kotere nguna, epotok ayong ngesi lokiliok keng lua Achuru lukolong aminarito ngesi lokojokon.

¹⁰Tobutosi kesi ngiboro keng kimiekis emuner. Kirumut talokookeng ka tanakookeng. Ani ngesi alope, kichuma a ekileng taara. Kisiakis ngaberu awadaang aswamar ngesi kotere eriras lo aanyu.

¹¹“Abu nakaatokeng nabe Oholiba kingolik nguna, nakaneni toroner ngesi noi alomalaanu ka etereku kidwang nakaatokeng Ohola.

¹²Kimua ngesi ngikiliok a Achuru noi, lu araakasi ngikapolok a arieng, ka ngikarikok a ngasigerea ta ngasigerea na enapito ngiworui kech lua ngasigerea ta ngikameak ngangolei. Araakasi kesi ngisorok lukebuseak.

¹³Atoyen ayong atamar inyasuna ngesi, ekwaan eboyor kech anaarei.

¹⁴“Toroner emalaanu a Oholiba noi tominasi ngitorubei a ngikiliok a Babilonia lu atapanakinitae nawasea, iwasitae emunyen loarengan,

¹⁵eenikinitae ngarubae naaborin tanapito ngapukoto naapolok anakies. Ekwaan kesi ka ngikapolok a Babilon, a ngitunga alu alomito nakwap a Babilon.

¹⁶Napei ingolikinea ngesi ngitorubei ngulu, toting etereku jik. Tomea ngitunga nakwap a Babilonia.

¹⁷Pot Ngibabiloniae topero ka ngesi. Kinyasut ngesi a etereku kech lokojokon. Ani kinyasut kerumor, takadakis ngesi ngitunga ngulu, totiakas.

¹⁸Ani erubakini ngesi esubi emalaanu ka alosit emuner, abu ayong katakadak ngesi emiek, loger lokolong emiekinea nakaatokeng.

¹⁹Kaneni dang, abu emalaanu keng toroner noi, tosub loger lokolong asubea esorokana alo Misiri.

²⁰Kimua ngesi ngikiliok lua etereku aloaronon lu ekwarete ngesi loger lo ekwaratar ngisikiria ka ngangolei. (

²¹Oholiba, isaki iyong abongokin emalaanu lokolong isubi iyong irai apese alo Misiri, lokolong amunaata ngikiliok ngisikin kon ediseak, kitopero iyong.)

²²“Tokona bocha Oholiba, ngakiro nugu kesi alimu ayong Ekapolon lo arai Ekapolon Akuj. Echichiuni ayong ngikiliok kon lukolong kikadakinete iyong totiakas, pot kiriama iyong alowaitin kadaang.

²³Ayauni ayong Ngibabiloniae daang ka Ngakalidayo, ka ngitunga a Pekod, ka Choa, ka Koa ta lua Achuru daang. Echichiuni ayong ngisorok lukebuseak ngulu daang, lu eraakasi ngikapolok, ka ngikarikok a ngasigerea, ka ngikaweikinak a ngasigerea ta ngasigerea daang na eraakasi ngikameak ngangolei.

²⁴Epote kesi akitijikin iyong alokwap, yaut ngasigerea nakaalak ka ngaurukukui na irito ngangolei ta eegos. Kiriamete kesi iyong alowaitin kadaang, etingito ngaupwala tanapito ngapukoto. Kepotokini ayong iyong kesi, totubo kesi ngakiro kon iwapito ngitalio kech.

²⁵Idiruni angoit kang nikon, kitonyunyurikin kesi iyong. Etuborete kesi ekume kon ka ngaki, sodi taara ngide kon. Ee robo, elemarete kesi talokookon ka tanakookon, kinoma kesi eyarete.

²⁶Echilichilaarete kesi ngiworui kon tolemasi asir kon.

²⁷Ekokini ayong neni atubori etereku kon ka emalaanu lokolong isubi alo Misiri. Nyeringa nabo ingolikini ngakujo ngache nasubuna kori nyitamuni Misiri nabo jik.”

²⁸Ebala Ekapolon lo arai Ekapolon Akuj kona, “Kepotokini ayong iyong lotunga lu iremit, kitakadakinito.

²⁹Kiremokinosi kesi iyong, kitodemasi ibore daang nikolong ichidaritor iyong ngakiinyir, kitobutosi ngiboro kimiekis imuner loger a amalaat. Etereku kon ka emalaanu

³⁰kesi kiinut iyong nguna. Irai kolong iyong amalaat a ngibukui, kinyasut iyong ngakujo kech nasubuna.

³¹Kiwap iyong elote a nakaatokon. Kotere nguna, ketongobari ayong iyong ekopo a eriras lopei ngolo.”

³²Ebala Ekapolon lo erai Ekapolon Akuj kona, “Imasea iyong ekopo a nakaatokon, epolot nabo eburuk. Kikianatar daang iyong kimenyasi, kainyo ileleba ekopo.

³³Kisialolongi iyong nabo kisirakari epurot, ekopo a aemit ka nginyas, ekopo a nakaatokon Samaria.

³⁴Imasi iyong kiuyo tobelebele, tochilichilaarea ngisikin kon. Ayong Ekapolon lo arai Ekapolon Akuj alimu nguna.

³⁵“Tokona bocha, alimunit ayong Ekapolon lo arai Ekapolon Akuj abala, ‘Ani aloger kimuriakinea iyong ayong kimulenio, kitir ngichan a etereku kon ka emalaanu.’ ”

³⁶Katolimok Ekapolon Akuj ayong tama, “Itwaan, inyounit iyong akitub ngakiro a Ohola ka Oholiba? Tolimok robo kesi ngakiro nakikadakinete na esubete kesi!

³⁷Aloma kesi, nabo earete ngitunga. Aloma kesi ka ngakujo nasubuna nabo taarakis ngide lu kedoikinete kesi ayong tarata ngakipeyos.

³⁸Ani eya nguna, emenyasi kesi akai kang nabo nyirichakinito Sabato nakolong aseuni ayong.

³⁹Akolongit napei aareta kesi ngide kang, kitiliwosi ngakipeyos a ngakujo, akolongit napei ngina, pot kesi kai kang kimenyasi. Ngakiro nguna asubete kesi alokai kang.

⁴⁰“Ameanarete kesi jiik ngitunga anyaraun ngikiliok anikalonan, pot ngikiliok ngulu. Elotanarosi ngakaitotoi naarei nguna, tongura ngakonyen kech, tosiro.

⁴¹Kiboikinos lokicholongo luajokak tosipokis emeesa lo ileleba ngiboro luajokak, ka emitina ta akimiet, ngiboro lukolong ainakini ayong kesi.

⁴²Kiirarae ngitoilio a ajore ana emam ibore iche emisito, ajore a ngikiliok alu elewat ayaunio anariet. Tobutokis kesi ngasua nakan a ngaberu kanguna, kitanapa ngikiraunea luajokak anakies kech.

⁴³Atolim ayong atamar elomete kesi ka ngaberu nakolong enyasu emalaanu.

⁴⁴Abongonorete kesi namalaae nguna jiik. Abongonorete nia Ohola ka Oholiba na araakasi ngamalaae.

⁴⁵Epote ngikiliok lu etenooko, kirirata kesi loger a ngaberu anakalomak taraakas ngakaarak, kainyo eraakasi kesi ngikalomak ka ngikaarak.”

⁴⁶Ebala Ekapolon lo erai Ekapolon Akuj kona, “Yautu ajore a ngitunga kilolik kesi todema ngiboro.

⁴⁷Tachaka kesi a ngamoru ka akitijikin a ngakwaaras taara talokookech ka tanakookech, kinoma ngakais kech.

⁴⁸Atubori ayong emalaanu anakwap kadaang, toliwor akichikichiket anaberu kadaang nyeelom loger lokolong kech.

⁴⁹Ani esi ngakaitotoi naarei, kerirae ayong esi kotere emalaanu kus, ka akisech na ilipitotor esi ngakujo nasubuna. Toyeneta esi atamar arai ayong Ekapolon lo arai Akuj.”