Read turkana Esekiel 24 Bible Online

Esekiel 24 - turkana bible

Esekiel 24

¹Akolongit na ngatomon a elap alo a ngitomon, a ekaru alo a ngikan-koomwon alo kiraakar sua ngirikon, katolimok ayong Ekapolon Akuj akiroit tama,

²“Itwaan, kigirak erwait a akolongit kana, kainyo akolongit naga ngesi isiakinea ekapolon a Babilonia akisiriam ngajorei keng ere a Yerusalem.

³Tolimok ngitunga lukang lukechanak lugu akisikwaanet naga, na alimokinit ayong Ekapolon lo arai Ekapolon Akuj kesi. Tosipok amot lokeno, kilelebik ngakipi.

⁴Kiwaak nginerin a ngaringo, nginerin luajokak, ngamuroi ka ngakwaas. Kilelebik ngakoyo naajokak.

⁵ Toseu akiring a emesek naajokon, kirepak ngakito[20] lokeno, kitukulau ngaringo ka ngakoyo, tokulata daang lokojokon.

⁶“Abala bocha tokona ayong Ekapolon lo arai Ekapolon Akuj kona, oitiakoi, abe etioko nginyas eanyuni ere a ngikaarak! Ikwaan ere ngolo ka amot na eyei, na nyetiakasi ka ekut jik! Autonor ngaringo daang a ngapei-pei esunyar.

⁷Ngitunga lu aario alore, eringa ngaakot etakanete, kainyo abukokin nataaba. Nyebukokina nalup tonuk apua.

⁸Emiek ayong ngaakot nguna anataaba nyenuka, asaki kitonyout anyunyura na atachakinea ayong ngakiro nguna.”

⁹Ebala Ekapolon lo erai Ekapolon Akuj kona, “Oitiakoi! Abe etioko nginyas eanyuni ere a ngikaarak! Ayong alope atukokini ngakito.

¹⁰Eatak ayong ngapungurei ngache, sodi erirak akim. Ani erumor etukulau akiring niajokon, etiu ngapoko, dio emiek ngakoyo iluurikini.

¹¹Atolem amot na ngasua ananyangayek ngina na emam ibore eyei tooma, ewaak nakim torirau torenger puu, kimududuyorea ekut!

¹²Etuburuna ayong pas! Nyemunyari akim ekut keng lokaalan.

¹³Yerusalem, ngakiro naaronok isubi iyong, kitiliwosi iyong ere lo nyitaleuno. Aroit ayong akitaleun iyong, nakaneni torubak iyong irai lo nyitaleuno. Nyikitaleunio iyong nabo mati kabukok ayong iyong anyunyura kang kitemokin.

¹⁴Alimu ayong Ekapolon lo arai Ekapolon Akuj kona: Anang esaa lo asubakinea ayong akiroit ngina etemok. Nyelagalagakini ayong ngasechesea kon kori nyariangakin atama kesien kare. Kerirae ayong iyong itemem ka ngakiro na isub. Ayong Ekapolon Akuj na arai Akuj alimu nguna.”

¹⁵Katolimok Ekapolon Akuj ayong akiroit tama,

¹⁶“Itwaan, kingolik a, edikino ayong angedari itwaan ni eminarit ngakonyen kon. Nakaneni tochoite ikalouni tosutonok, kori nyiilakak ngakiyo.

¹⁷Kisutusut ekiilingat. Nyiirap akou kori nyiitur kotere akigoro. Nyiirap ereet kori nyiinyam akimuj a ngapunyas.”[21]

¹⁸Esuruori sek ayong ngitunga nataparach, ani enangi ebong, totoan aberu kang. Ani iwalari akolongit nache, atosub ayong loger losek kalimokinitere.

¹⁹Kengita ngitunga ayong tamasi, “Nyo pekilimokinea iyong eger a ngakiro kanu? Nyo isubea iyong kona?”

²⁰Atatachak ayong kesi atama, “Kalimokini ayong Ekapolon Akuj akiroit atamar,

²¹atolimok Ngisirael atama, ‘Ebala Ekapolon lo erai Ekapolon Akuj kona: Kingolikisi a, etiliwori ayong akai kang na nyitaleunitoe. Akai ngina ngesi na inisatar esi agogongu keng, tojoikinite ngakonyen kus ka ngitai kus. Ani talokookus ka tanakookus nakolong edongete Yerusalem, earakinio lojie.

²²Ani erumor tosubakis esi ngakiro na asubak ayong. Nyirapete esi ngireetin kus kori nyinyamete akimuj a ngapunyas.

²³Inapete esi ngapukoto ka ngamuk. Nyisutonokinete kori nyigorosi. Ililimiyorete esi kotere ngasechesea kus, tokunuanakinos make.

²⁴Eliwor Esekiel emachar anikus, isubete esi ibore daang loger losek asubea ngesi. Ani esubakinosi nguna, toyena atamar arai ayong Ekapolon lo arai Ekapolon Akuj.’ ”

²⁵Katolimok Ekapolon Akuj ayong tama, “Tokona bocha itwaan, akolongit na ademarea ayong kesi akai kang na erai agogongu kech, na ipuruunito kesi elakara, tojoikinite ngakonyen kech ka ngitai, atodema tani talokookech ka tanakookech,

²⁶akolongit ngina, ebuni itwaan ni ebuchun anamunyaro kangina kitolimok iyong ngakiro nguna.

²⁷Akolongit napei ngina, engaar akituk kon nasek agolol, kisuruoro iyong itwaan ngini, tojongo achakina chek. Alorot kangolo, iliwor iyong emachar alotunga, toyena kesi atamar arai ayong Ekapolon Akuj.”