Read turkana Esekiel 25 Bible Online

Esekiel 25 - turkana bible

Esekiel 25

¹Katolimok ayong Ekapolon Akuj akiroit tama,

²“Itwaan, toroas ka Ngiamon, todwar naaronok anikech.

³Tolimok kesi kiirasi ngakiro na alimunit ayong Ekapolon lo erai Ekapolon Akuj abala, kona kolong ibalatar esi ‘Ee rocha’, ani emenyarere akai kang kitiliworoe akwap a Isirael alaireng nabo kitiliworoe ngitunga a Yuda ngirikon,

⁴emiekini ayong ngitunga a akide kidwanga esi kainyo ilakara kolong esi. Edukokinete kesi ngadakarin kech nakwap kus. Enyamete kesi ageor kus tamata ngakile kus.

⁵Etiliwori ayong Raba ni edakasi ngikaala, etiliwo akwap a Ngiamon anok a ngamesekin. Toyeneta esi atamar arai ayong Ekapolon Akuj.

⁶“Ebala Ekapolon lo erai Ekapolon Akuj kona: Iramete kolong esi ngakan kus kichuro ani kikadakinitor akwap a Isirael.

⁷ Kotere nguna, kanyoikini ayong esi kepotok ngibukui lu eremete ngiboro kus. Kamunyari ayong esi jik nyiiliworosi nabo jik ebukut kori nyeemin akwap na erai akus a ngikulepek. Toyeneta atamar arai ayong Ekapolon Akuj.”

⁸Tolim Ekapolon lo erai Ekapolon Akuj tama, “Kona ebalar Moab ikwaan Yuda ka ngibukui luche daang,

⁹emiekini ayong ngirerea lupalem iratakinito ngikukuorin a Moab kitijikinoe, tani ngirerea luajokak lu enyaritae Bes Yechimos, ka Baal Meon ta Kiriasaim.

¹⁰Emiekini ayong ngirerea lua akide kidwanga Moab ka Amon, nyeeliworor nabo jik ebukut.

¹¹ Erirae ayong Ngimoab toyeneta atamar arai ayong Ekapolon Akuj.”

¹²Tolim Ekapolon lo erai Ekapolon Akuj tama, “Atachakinete kolong ngitunga a Edom ngakiro naaronok ani a Yuda. Aliwor ibore ngini asechanu naationon ani a Edom.

¹³Alimu tokona ayong atamar erirae Edom ataar ngitunga daang ka ngibaren. Eliwor akwap alaireng napei alore a Teman tanang lore a Dedan, emunyario a akwara daang.

¹⁴ Etonyouni ayong ngitunga kang Ngisirael tatachakis ngakiro naaronok ani a Edom, itemem ka eriras a angoit ka anyunyura kang. Neni ngesi eanyunea Edom aronis a eriras kang. Ayong Ekapolon Akuj Namerikanyer alimu nguna.”

¹⁵Tolim Ekapolon lo erai Ekapolon Akuj tama, “Atachakis Ngipilisti ngakiro naaronok ani a ngimoe kech alungorok, amunyasi kesi kotere arem.

¹⁶Kotere nguna, alimu ayong atamar anyoikini Ngipilisti atomunya. Amunyari ayong itwaan daang ni idongit eyari anaroatin a Pilistia.

¹⁷ Erirae ayong kesi niationon atatachak ngakiro na asubete kesi. Etikokin kesi angoit kang, toyeneta atamar arai ayong Ekapolon Akuj.”