Read turkana Esekiel 26 Bible Online

Esekiel 26 - turkana bible

Esekiel 26

¹Akolongit na ekingaren a elap alo ...,[22] a ekaru alo a ngitomon ka epei a arikonot kosi, katolimok ayong Ekapolon Akuj akiroit tama,

² “Itwaan, ekianatar ngitunga a Tiro Yerusalem ebalasi, ‘Ekoe! Ere lokolong arai ekidor a ngibukui! Adaun emuchuruseenu keng! Nyeringa nabo erai emoit yok!’

³“Tokona bocha, abala ayong Ekapolon lo arai Ekapolon Akuj kona, ere a Tiro, kanyoikinit ayong iyong. Ameuni ayong ngibukui lukaalak kitijikis iyong. Eneteunosi kesi loger a ngitoroi a anam.

⁴Inyasunete kesi ngawasea kon, toukosi ngipemin kon lu iyokiyere ere. Ani erumor atopia apua keng daang, emiek ataaba nilapat.

⁵Elukakin kiding anam toliwor ngesi eloanakinete ngikechiemak ngipuutei kech. Ayong Ekapolon Akuj na arai Akuj alimu nguna. Eremete ngibukui Tiro,

⁶eari akwara ngitunga lu elomito lorerea a Tiro, lowae a akwap anakoonon. Toyeneta kesi atamar arai ayong Ekapolon Akuj.”

⁷Ebala Ekapolon lo erai Ekapolon Akuj kona, “Ayauni ayong ekapolon lo idwangit ngikapolok daang kitijik Tiro. Enyaritae ngesi Nebukadinesa lo erai ekapolon a Babilonia. Irukunete ngesi ka ngasigerea nakaalak alokwap, edokito ngangolei, tometo ngaurukukui na iritae, toloose luche a ngakejen.

⁸Ngulu elomito lorerea a akwap anakoonon, eario alojie. Ebokarete ngimoe ngaduon ka ngakatiputipui ta ngawasea na kigagarete esi anikech.

⁹Eukorete kesi ngawasea kon a ngasua anabwanget, toukosi ngipemin a ngaepe.

¹⁰Elalak ngangolei a Nebukadinesa. Kirapi iyong apua a ngakejen kech. Erue a ngangolei kech ka ngaurukukui na iritae, itamaranikini ngawasea kon na elomuneta lodorin kus, loger lo elomunere lore lo enyasun.

¹¹Ipudaate lua ngangolei ngirotin kon, taara ngitunga kon a ngakwaaras. Eukokinio ngapirio kon naapolok nalup.

¹²Engatarete kesi ebari kon ka ngiboro a emuchuruseenu. Erimaunete ngawasea kon, toukosi ngakais kon naajokak. Elemunete kesi ngamoru ka ngakito ta echoto tachakakis nanam.

¹³Atubori ayong ngieosio kon, nyeringa nabo iirario erue a ngibunei kon.

¹⁴ Kemiekini ayong iyong irai ataaba nilapat, ni eloanakinete ngikechiemak ngipuutei kech. Nyeringa nabo iyong kidukokinio jik. Ayong Ekapolon lo arai Ekapolon Akuj alimu nguna.”

¹⁵Elimokinit Ekapolon lo erai Ekapolon Akuj ere a Tiro ebala, “Nakidwangere iyong, emaranikinete ngitunga lu elomito lokwaas a anam kotere erue lo idakaror iyong ka akigoro a ngitunga alu eario.

¹⁶Ngikapolok daang lua ngakwapea ana eyakasi lokwaas a anam, etiyaunosi alokicholongo kech a apolou, tobutosi ngiworui kech lua apolou ka lu esiritoe. Ebuloi ngesi eliwor ngiworui kech. Iboikinosi kesi nalup torubakis emaranete, tatalarito naaronok na ianyu iyong.

¹⁷Kieonokinete kesi iyong eeos lo igorore ebalasi, Wae, ere lo kiyenikinitae! Ekisar ngatubwae kon ananamea. Ipolokinit kolong iyong nganamea. Kiemito daang iyong alokwaas a anam.

¹⁸ Amaranikis tokona ngikwarin daang, akolongit na iukoror iyong naga. Ariangakinosi ngitunga kech kotere nginyas kon.”

¹⁹Ebala Ekapolon lo erai Ekapolon Akuj kona, “Ketiliwori ayong iyong alaireng loger a ngirerea alu enyasun, alu emam itwaan elomit. Kaburuchiari ayong iyong a ngakipi ana eponito anituluk a anam.

²⁰Katiyaari ayong iyong nakipany kiruko ka ngikatoak lu alomasi nakipany, lotunga lungorok. Kewaakini ayong iyong tolom lokatoak jik, nakwap a nginyas alukajik. Nyeringa iyong imini nakwap na eyakasi ngitunga lu eyarete.

²¹ Ketiliwori ayong iyong ekitetemes loketubulon, toliwor esal kon ngolo. Kisakete ngitunga iyong nakaneni nyitakanuuni nabo jik. Ayong Ekapolon lo arai Ekapolon Akuj alimu nguna.”