Read turkana Esekiel 27 Bible Online

Esekiel 27 - turkana bible

Esekiel 27

¹Katolimok Ekapolon Akuj ayong akiroit tama,

²“Itwaan, toeok eeos lo igorore Tiro,

³ere lo eyei lokwaas a anam, lo esubi emuchuruseenu ka ngitunga lu eyakasi lokwaasea a anam daang. Tolimok ngesi ngakiro na alimu ayong Ekapolon lo arai Ekapolon Akuj abala, Tiro, inisar kolong iyong akibuseanu kon.

⁴Awi kon ngesi anam. Kisubunete kolong iyong ngikadukok loger a atubwa anakebusean.

⁵Adukete kesi a ngadomou ana ayaunio alomoru a Erimon. Yaut ngichekereng alo Lebanon kitoweeta ngakito.

⁶Yaut ngichokei alo Bachan, tosubakineta ngakito nakiguriet ngatubwae. Yaut ngitelitei alokwar a Kupuro tosubuneta ngiboro kech lujiet sodi kitisiro a ngikel a etom.

⁷Ngawarui a ngatubwae kon asubunitae anawarui a Misiri anakaanikak ajokak, ana adonyitoe asir ana ekoni abendera. Eam kon asubunitae a awaru anaajokon, anapus-arengan ayaunio alo Kupuro.

⁸Ngikegurok ngatubwae kon aponito alorerea a Sidon ka Aripad. Ngikunonoi kon a ilope kesi adokete nganamea.

⁹Ngikadukok a atubwa, Babilos kolong etatamere lokojokon. Ngikadokak nganamea lua ngatubwae kadaang asubete emuchuruseenu alodukanin kon.

¹⁰“Ngasigerea na apote alo Persia, ka Lidia ta Libia kesi araakasi ngasigerea kon. Enenekinete kesi ngaupwala kech ka ngapukoto nadakarin a ngasigerea kon. Ngulu kesi kitaanyunete iyong ekipur.

¹¹Ngasigerea na apote alo Aripad kesi eteete ngawasea kon, kiteto lu apote alo Gamad ngipemin kon. Enenekinete kesi ngaupwala kech nawasea kon. Kesi kolong kitiliworete iyong lokebusean.

¹²“Isubete iyong ka ngitunga a Sipania emuchuruseenu kotere ebari kon lokaalan. Ilemanari iyong anikech ngakwangae, ka ngasua nakirionok, ka nakaabenak ta naapotiok, tolunyae ka ngiboro kon lukaalak.

¹³Isubete iyong emuchuruseenu ka Ngigirik, ka ngitunga a Tubal ta lua Mechek. Tolema iyong anikech ngikedalak ka ngiboro lua ngasua ananyangayek, tolemasi kesi ngiboro kon.

¹⁴Igielanari iyong ngiboro kon alo Bes Togarima taanyunea ngangolei nakewokok eegos, ka ngangolei na ejie ta ngisikiria.

¹⁵Asubete ngitunga a Rode emuchuruseenu ka iyong. Kiinanakinete iyong ngitunga lu elomito lokwaasea a nganamea ngikel a etom ka ngakito nakirionok tolunyae ka ngiboro kon.

¹⁶Isubete iyong emuchuruseenu ka ngitunga a Siria. Kiinanakinete kesi iyong ngamoru napusiek-alibak ka ngawarui napusiek-arengak, ka ngawarui nakaanikak ajokak, ka ngikam ta ngamoru naarengak puu, tolunya ka ngiboro kon luajokak.

¹⁷Asubete tani ngitunga a Yuda ka Isirael emuchuruseenu ka iyong. Kiinanakinete kesi iyong ngakanoi ka akimiet a ngikito, ka ngameyana na ingelario akiger, ka akimiet a ao ta ngikito luketukukunyok akimuj.

¹⁸Asubete ngitunga a Damasko emuchuruseenu ka iyong ani alalaketa ngiboro kon. Kiinanakinete kesi iyong emuna lo ayauniyo alo Elibon, ka ngajul a ngamesekin naakwaak na ayauniyo alo Saar tolunya ka ngiboro kon.

¹⁹Alunyeenete kesi tani emuna lo ayaunio alo Usal. Kiinunete kesi iyong ngasua na irigatae ka ngikito lukitukukunyet akimuj, tolunya ka ngiboro kon.

²⁰Kiinanakinete ngitunga a Dedan iyong ngasaaja tolunya ka ngiboro kon.

²¹Kiinanakinete iyong Ngimuarabui ka ngikapolok a akwap a Kedar ngimesekin luuchik ka luapolok ta ngaanei, tolunya ka ngiboro kon.

²²Ngimuchurus a Cheba ka lua Raama kiinakinete iyong namoru nakaalak a ngaropiyae, ka egolit ta ngikito lukitukukunyet akimuj luajokak, tolunya ka ngiboro kon.

²³Ngitunga a ngirerea a Aran, ka Kane, ka Eden, ka ngimuchurus a Achuru ta Kilimad, asubete daang emuchuruseenu ka iyong.

²⁴Kigialanakinete kesi iyong ngiworui luajokak, ka lupusiek-arengak, ka lu edonyitoe asir, ka ngakap nakoriyek ta ngaunoi na idanyitae niajokon.

²⁵Ewokeeneo ngiboro kon lua emuchuruseenu a ngatubwae anaapolok anakaalak. Ikwaan iyong ka atubwa ananam, na ileleba eegos loapotion.

²⁶Nakitanangeta iyong ngikegurok kiding anam, kitobwangabwanga iyong ekuwam a akide Alokiding anam.

²⁷Ebari ka emuchuruseenu kon daang, ka ngiboro kon daang, ka ngitunga lu ayakasi natubwa daang, ngikadukok a atubwa kon ka ngimuchurus, ngasigerea daang na ayakasi natubwa, emunyakinosi daang nanam, na ebwangabwangaaror atubwa.

²⁸Ani iirario ngitoilio a ngitunga alu elikorete ngakipi, apot ngikwaasea a anam tamaranikis.

²⁹“Epudunete ngikegurok daang anatubwae kech. Ngikadokak daang ka ngikameak ngatubwae, ewaasi alokwaas a anam.

³⁰Ikalounete kesi noi kichienete iyong, kikalout enomito ngakiro ngitai, tonukakis apua nakies kech, ka akipunupuno alokuron.

³¹Aluro kotere iyong. Anapa kesi ngiguniae. Enomito ngakiro ngitai kech esaa lo igorotor.

³²Eeos lo kigorotor iyong ebalasi, ‘Ngae isikwaanio ka Tiro, Tiro na tokona echakina chek ananam?

³³Ngirwa lu ewokeenere ngiboro kon ekwakaye, itemunit iyong ngibukui daang. Tabara ngikapolok, ebari a ngiboro kon alukaalak.

³⁴Ibwangabwangaar tokona iyong ananam, isipor iyong nituluk a anam. Ngiboro kon daang ka ngikasubak etich kon, amunyakin daang ka iyong nanam.’

³⁵“Ariangakin ngitunga daang lu elomito lokwaas a anam kotere ngakiro naaronok ianyu iyong. Abul tani ngikapolok kech noi. Etakani ebuloi aloreetin kech.

³⁶ Ingopia iyong, ee robo, ingopia jik. Abul ngimuchurus daang anakwapea kadaang, kotere ebalasi kori kianyuni naaronok na ianyu iyong.”