Read turkana Esekiel 28 Bible Online

Esekiel 28 - turkana bible

Esekiel 28

¹Katolimok ayong Ekapolon Akuj akiroit tama,

²“Itwaan, tolimok ekapolon a Tiro ngakiro na alimokinit ayong Ekapolon lo arai Ekapolon Akuj ngesi abala: Abe inisa iyong ibala, ‘Arai ayong akuj ebooyi alokicholongo a ngakujo alokiding nganamea.’ Tarai bo irai iyong itwaan, meere akuj. Tani kibala iyong ios loger a akuj.

³Awaa! Ibala iyong ios noi idwangit Danel,[23] ibala iyeni ngamunonoe daang.

⁴Aosou kon ka achwaanu kesi kitabar iyong, iudak iyong egolit ka ngakwangae lobari kon.

⁵Kotere aosou kon nakaalan alomuchuruseenu, iatak ebari kon. Kisinisak iyong ebari kon!

⁶“Alimu tokona ayong Ekapolon lo erai Ekapolon Akuj abala, kona ibalar iyong ios loger a akuj,

⁷ayauni ayong ngitunga lupeyok nikon, ngibukui lukamoitanak noi. Inyasunete kesi ajokis a aosou kon, ka akibuseanu a ebari kon.

⁸Kichakakinete kesi iyong nakipany, totoan akitu naaronon alokiding anam.

⁹Na eponeta kesi akiar iyong, eringa iyong itamari abe irai akuj a? Iliwor iyong itwaan meere akuj alongaren ngikaarak kon!

¹⁰Itoani loger a nyiingok anakan a ngitunga alu akwap anache. Ayong Ekapolon lo arai Ekapolon Akuj alimu nguna.”

¹¹Katolimok ayong Ekapolon Akuj nabo akiroit tama,

¹²“Itwaan, kikalou kotere ngakiro naaronok na eanyuni ekapolon a Tiro. Tolimok ngesi ngakiro na alimu ayong Ekapolon lo arai Ekapolon Akuj abala: Irai kolong iyong emachar a ateneanut irai lokooson tarai lokebusean!

¹³Ilomit Eden na arai amana a Akuj, inapit ngamoru nakamilimilak ngikitetio daang. Inapit naarengak puu, ka topas, ka berili, ka naarengak, ka alumasi, ka napusiek-arengak, ka napusiek-alibak, ta napusiek-alibak torengak. Ayei iyong asir a egolit. Kilemikinio kolong iyong akolongit nakisubunere.

¹⁴Ewaak ayong emalaikat loketubulon neni kiyok iyong. Tolom iyong moru kang lo italeuno tolot alokiding ngamoru kang nakamilimilak.

¹⁵Ajok elote kon napei kolong kisubunere tanang akolongit na atakanuunea akisech anikon.

¹⁶Kotere alalau a emuchuruseenu kon, tominak iyong amoitanut ka akisech. Sodi ketwarak ayong iyong alomoru kang alo italeuno loger a ibore ani ilamam. Emalaikat losek kiyoki iyong abu kitwarak iyong anamoru anakamilimilak.

¹⁷Ibu iyong kinisakinor akibuseanu kon, kitabangaania iyong ekipur kon. Abu ayong kemasa iyong nalup kingolikis ngikapolok toliwor akichikichiket anikech.

¹⁸Kotere alalau a ngasechesea kon ka engalas a emuchuruseenu kon, ibu iyong kinyasu tani ni ilipeenea. Kotere nguna atalakak ayong akim kitonomia iyong ketiliwo ekuron, anakonyen kadaang alu kingolikinete iyong.

¹⁹Ilot iyong, ilot jik, aema ngibukui daang lukolong apot kitoyena iyong. Ee robo, abul kesi, ebalasi kori kimunyario kesi dang.”

²⁰Katolimok Ekapolon Akuj ayong akiroit tama,

²¹“Itwaan, todwar ngakiro naaronok ani a Sidon.

²²Tolimok ngitunga a Sidon ngakiro na alimokinit ayong Ekapolon lo arai Ekapolon Akuj kesi abala: Ee Sidon, kingolik a! Kanyoikinit ayong iyong. Edodiuni ayong ekipur kang anakiro anakasubea iyong. Toyena ngitunga atamar arai ayong Ekapolon Akuj, na eriraa lu elomito nikon, ani araakar ayong na etaleuno.

²³Kainuni ayong iyong ngidekesinei luaronok, nabo toleleasi ngaakot alorotin kon. Edakakinosi lu eari akwara lorotin kon, kitoroo iyong akwara alowaitin kadaang. Neni iyenunea iyong atamar arai ayong Ekapolon Akuj.”

²⁴Tolim Ekapolon Akuj tama, “Ngibukui lukidunyet a Isirael lukolong emenyarito Isirael, nyeringa nabo ikwaanikinosi ka ngiikwa ta ngirega towana Isirael. Toyeneta atamar arai ayong Ekapolon lo arai Ekapolon Akuj.”

²⁵Tolim Ekapolon lo arai Ekapolon Akuj tama, “Abuuni ayong Ngisirael alobukui alu kolong apetakini ayong kesi, toyena ngibukui daang atamar etaleuno ayong. Elomete Ngisirael nakwap kech a ngikulepek nakolong ainakini ayong ekasuban etich kang Yakobo.

²⁶ Elomete neni akaalimon, toduko ngakais, kitata ngimusabib. Elomete neni akaalimon, erira ayong ngibukui lukidunyet kech daang lukolong emenyarito kesi. Toyeneta atamar arai ayong Ekapolon Akuj, na arai Akuj kech.”