Read turkana Esekiel 29 Bible Online

Esekiel 29 - turkana bible

Esekiel 29

¹Akolongit na ngatomon ka ngaarei a elap alo a ngitomon, a ekaru alo a ngitomon a arikonot kosi, katolimok ayong Ekapolon Akuj akiroit tama,

²“Itwaan, kibelokin Parao ekapolon a Misiri. Todwar ngakiro naaronok anikeng ka akwap a Misiri etia ni etia.

³Tolimok atamar abala ayong Ekapolon lo arai Ekapolon Akuj kona: Kingolik a, kanyoikinit ayong iyong, Parao lo irai ekapolon a Misiri. Iyong akinyang naaronon na iperi anangolol a Nili. Abe ibala iyong, ‘Erai Nili akang, nabo ayong kolong asubuni!’

⁴Kimiek katokodak ekodait lokitinyo, atokodak ngikolea a angolol kon daang nikon. Ani erumor keriu iyong anangolol irukito ka ngikolea daang lu ekodakina nikon.

⁵ Kawatari ayong iyong nariet irukito ka ngikolea ngulu daang. Imasakin akwaan kon nalup, kimiekinae nyenuka. Epotokini ayong akwaan kon ngitieng amoding ka ngikieny tanyama.

⁶“Ikokinete ngitunga daang a Misiri eyenunete atamar ayong Ekapolon Akuj neni. Asakete Ngisirael akigienokin iyong Misiri, nakaneni tapalagag iyong loger a atiriwae.

⁷Ani kigongakinosi kesi iyong, ibu iyong tobil kichumchumia kesi ngakirididea ka akiteriangakin ngigurae kech.

⁸Tokona bocha, abala ayong Ekapolon lo arai Ekapolon Akuj kona: Kingolik a, ameuni ayong emoit lo a akwara nikon. Earete kesi ngitunga ka ngibaren daang.

⁹Eliwor Misiri alaireng na ibooyi kongin. Toyeneta ngitunga atamar arai ayong Ekapolon Akuj. “Kona ibalar iyong ‘Erai Nili akang, nabo ayong kolong asubuni’,

¹⁰kanyoikinit ayong iyong ka angolol kon ani itamitor iyong atamar erai Nili akon, abe iyong kolong isubuni. Etiliwori ayong Misiri etia ni etia alaireng na ibooyi kongin napei alore a Migidol alokwap tanang lore a Aswan alokuju, toremor jik tanang lokukuoru a Kuch.*g**

¹¹Emam itwaan kori ibarasit ichieki neni. Emam ibore emini neni a ngikaru a ngitomwon-omwon.

¹²Etiliwori ayong Misiri alaireng nakaronon noi anakwapea kadaang. A ngikaru ngitomwon-omwon eliworosi ngirerea a Misiri lua nginyas akidwang ngirerea luche daang. Etiliwori ayong Ngimisiri lu edokinito. Edokinete kesi toloto nakwapea daang, toloma kiding ngibukui.”

¹³Ebala Ekapolon lo erai Ekapolon Akuj kona, “Adaunet a ngikaru alutomwon-omwon, achununi ayong Ngimisiri anakwapea ana kolong apetakin kesi.

¹⁴Etabari ayong Ngimisiri atobuu kesi nakwap a Pasiros nikolong aponeta. Eliwor apolou kech kaneni na nyeyenikinitae.

¹⁵Ee robo, eliwor apolou kech na nyeyenikinitae akidwang ngapolosio daang. Nyeringa kesi nabo ikeunosi alobukui aluche. Etiliwori ayong kesi lu nyeyenikinitae dir, lu nyepedorete apolokin ngibukui luche.

¹⁶Nyeringa nabo Ngisirael igienokinosi Ngimisiri. Itamunete Ngisirael eger lokolong asecheta kigienokinos akwap a Misiri. Eyenunete Ngisirael atamar arai ayong Ekapolon lo arai Ekapolon Akuj.”

¹⁷Akolongit na ekingaren a elap alo ekingaren a ekaru alo a ngitomwon-arei ka ngikan-kaarei a arikonot kosi, katolimok ayong Ekapolon Akuj akiroit tama,

¹⁸“Itwaan, Nebukadinesa lo erai ekapolon a Babilonia etijikini Tiro. Kisiwok ngesi ngasigerea keng ngiegosio luapotiok tokiritoosi ngakies kech kidongo epalor, tobutoros ngisegeta kech pena ngajemei. Nakaneni emam ngesi kori ngasigerea keng ibore apot taanyut kotere akitijikin Tiro.

¹⁹Abala tokona ayong Ekapolon lo arai Ekapolon Akuj kona: Epotori ayong akwap a Misiri ainak ekapolon Nebukadinesa lo erai ekapolon a Babilonia. Elemari ngesi tangata ebari a Misiri daang tatachea ngasigerea keng.

²⁰Ainakini ayong ngesi Misiri toliwor ngesi atachitor etich lo asubi ngesi, kainyo asubete ngasigerea keng etich kang. Ayong Ekapolon lo arai Ekapolon Akuj alimu nguna.

²¹“Akolongit ngina, etogogongi ayong Ngisirael, sodi kemiek iyong, Esekiel, kiruor ani epedoreta ngitunga daang akiirar, toyeneta atamar arai ayong Ekapolon Akuj.”