Read turkana Esekiel 3 Bible Online

Esekiel 3 - turkana bible

Esekiel 3

¹Tolim Akuj tama, “Itwaan, tanyam ibore ni kiinakinio, tanyam akitab naga, sodi tolot kisuruor Ngisirael.”

²Abu ayong atangaam, kainak ngesi akitab atanyam.

³ Tolim ngesi tama, “Itwaan, tanyam akitab nakainak ayong iyong naga, kilelebik nakook kon.” Atanyam ayong, abob loger a akimiet a ao.

⁴Ani erumor katolimok Akuj ayong tama, “Itwaan, kape nia Ngisirael tolimok ngakiro nacha kalimokini ayong iyong.

⁵Nyakamearit ayong iyong lobukui lu ianete angajep naparing, kori nakaagongon, pearai kamearit nia Ngisirael.

⁶Nyakamearit lobukui lukaalak lu ianete angajep naparing na nyiyeni iyong. Arai katomearite lotunga lu ikote ngulu, kiirarito kesi ngakiro kon.

⁷Nakaneni nyiirarete Ngisirael ngakiro kon, kainyo nyesakete akiirar tani nakang. Ichanaka kesi etioko ngitai.

⁸Ketiliwori tokona ayong iyong lokechanan nabo lo itiono loger kech.

⁹Ketirokini ayong iyong loger a ataaba ana nyingunyakin, ketogogong loger a alumas. Nyiem kesi kori wara ngakonyen kech nyikitubul iyong kainyo eraakasi kesi ngitunga lukechanak.”

¹⁰Torubak Akuj iruoro ebala, “Itwaan, todeta ngaki kiira ngakiro nakalimokini ayong iyong daang, sodi kirichak alotau.

¹¹Ani erumor tolot lotunga kon lu eraakasi ngirikon anakwap anache, tolimok ngakiro na esuruori ayong Ekapolon lo arai Ekapolon Akuj kesi, nyekachitae erai kiirasi kori kemam.”

¹²Ani erumor kekeu ayong etau a Akuj kidiama, eira etoil loapolon egirokini loger a arikirik a akwap, tama, “Kipuroe apolou a Ekapolon Akuj anadis!”

¹³Ikwa kerai etoil lo agiro loger a arikirik a akwap eka ngiborei alu eyarete esaa lo etapatar ngabeben kech ka agiro a ngatairio ana ayakasi lokwaasea kech.

¹⁴Kekeu ayong etau kayaa nikalonan. Atorotok ayong kanomito ngakiro etau, nakaneni katotikokin ayong agogongu a Ekapolon Akuj niationon.

¹⁵Atanangu ayong lotunga lu eraakasi ngirikon lu alomito Tel Abib lokwaas a angolol a Kebar. Eruko ayong ka kesi a ngirwa a ngikan-kaarei, elikorit etau kotere ngakiro nakolong engolikini ka na eirari.

¹⁶Adaunet a ngirwa a ngikan-kaarei, katolimok Ekapolon Akuj ayong akiroit tama,

¹⁷“Itwaan, ketiliwo ayong iyong eketeon a Ngisirael. Tolimonok kesi ngakichikichiket daang na itorunete nakituk kang.

¹⁸Ani kalimok ayong itwaan niaronon atamar etoani, sodi nyiikilak iyong ngesi tapalikinea aronis keng toyuunor, etoani itwaan ngini anaronis keng, nakaneni iyong ngesi kapaikini ayong akitu keng.

¹⁹Pearai ani kikilak iyong itwaan niaronon towou ngesi areeun anaronis kori alorot keng aloaronon, etoani ngesi anaronis keng, nakaneni iyuun iyong.

²⁰“Ani keisiki itwaan ni etenoono ateneanut kisiak akisub ngakiro naaronok, sodi atolokak ayong ngesi nakiro naaronok, ani pekikilak iyong ngesi, etoani kotere akisech keng. Nyetamuni ayong ngakiro naajokak nakolong asubi ngesi. Nakaneni kapaikini ayong iyong akitu keng.

²¹Kaneni dang, ani kikilak iyong itwaan ni etenoono atamar nyeesech, sodi kiira ngesi, eyari ngesi dir kainyo eira ngakiro na ekilakinere, nabo iyuun iyong.”

²²Katotikokin ayong agogongu a Ekapolon Akuj niationon, katolimok ayong tama, “Tonyou, tolot nadipo, kesuruori ayong iyong kaina.”

²³Sodi atonyou ayong atolot nadipo. Oitiakoi! Engolik ayong akwangis a Ekapolon Akuj, loger losek engolikinitor alokwaas a angolol a Kebar. Atadakakin ayong kwap atodo aloreet.

²⁴Tolomu etau a Akuj nikang, ketonyou atowo. Katolimok ngesi ayong tama, “Kape togolokin kai kon.

²⁵Iyong itwaan, kienio iyong a ngaunoi nyiipedo alosit alokiding ngitunga.

²⁶Erumeikini ayong angajep kon nangirit na alokidiama, sodi tokinimaner iyong tongop kona ikilakini kesi, kainyo eraakasi kesi ngitunga lukechanak.

²⁷Ani ekisidi abuni ayong akisuruor iyong, angaari ayong akituk kon, tolimok iyong kesi kona, ‘Ebala Ekapolon lo erai Ekapolon Akuj ngini iirari, kimiekisi kiira. Ngini ewouni akiirar, kimiekisi towou, kainyo eraakasi kesi ngitunga lukechanak.’ ”