Read turkana Esekiel 30 Bible Online

Esekiel 30 - turkana bible

Esekiel 30

¹Katolimok ayong Ekapolon Akuj nabo akiroit tama,

²“Itwaan, todwar tolimo atamar abala ayong Ekapolon lo arai Ekapolon Akuj kona: Kiute tama, ‘Ekoe, keroner akolongit!

³Aapuu akolongit ngina, ee robo, aapuu akolongit a Ekapolon Akuj. Eliwor akolongit a ngidowon, akolongit na emunyarotor ngibukui.

⁴Itijikinio Misiri, emini ariaba Kuch. Eario lukaalak alo Misiri, iwokio ebari a Misiri toukoroe ngapirio a ere.’

⁵“Eari ejie ngolo tani ngasigerea na eponito alo Kuch, ka Lidia, ka Libia, ka Arabia ta Kub, tani ngitunga kang a ilope.”

⁶Ebala Ekapolon lo erai Ekapolon Akuj kona, “Napei alo Migidol alokwap tanang Aswan alokuju, eario ngikaikinak a Misiri daang alojie. Emunyario ngasigerea a Misiri nakenisak. Ayong Ekapolon Akuj Namerikanyer alimu nguna.

⁷Eliwor akwap ngina alaireng kidwang ngakwapea nache na eraakasi alaireng, inyasunio ngirerea keng noi.

⁸Na erirakinea ayong Misiri akim aapei ka ngikaikinak keng daang, ngesi eyenuneta atamar arai ayong Ekapolon Akuj.

⁹“Naenangea akolongit ngina sodi kinyasunae Misiri, ameari ayong ngimeanara a ngatubwae toloto kitoosut ngitunga a Kuch lu itumosi. Ebuli kesi noi. Ee robo, ebunit dir akolongit ngina!”

¹⁰Ebala Ekapolon lo erai Ekapolon Akuj kona, “Atubuori ayong ebari a Misiri a akan a Nebukadinesa alo erai ekapolon a Babilonia.

¹¹Nebukadinesa ka ngasigerea keng, na emoitaka noi akidwang ngibukui daang, emeunio kinyasut akwap a Misiri. Elemunete ngakwaaras kech kitijwoto Misiri, kileleba ngitunga lu eario nakwap.

¹²Etooni ayong Nili, emiekinea ngitunga luaronok akwap a Misiri. Enyasuni ayong akwap ka ibore daang ni eyei tooma keng a ngitunga a ngakwapea anache. Ayong Ekapolon Akuj alimu nguna.”

¹³Ebala Ekapolon lo erai Ekapolon Akuj kona, “Enyasuni ngakujo nasubuna, atomunya ngakujo na alioko alo Mempis. Emam ekatukon emini Misiri nabo jik. Etubuli ngitunga daang alo Misiri.

¹⁴Etiliwori ayong kuju Misiri alaireng, echunyak ere a Soan alokwap akim. Ayauni eriras lore loapolon a Tebes.

¹⁵Abukokini anyunyura kang lore a Pelusium, lo erai awas nakaagongon a Misiri, atotubwo ebari a Tebes.

¹⁶Echunyakini ayong Misiri akim. Eriabakin Pelusium lokojokon. Eukori ekuwam Tebes kilelebun ngakalel lore.

¹⁷Ngisorok a ngirerea a Eliopolis ka Bubastis, eario a akwara, toliworos ngitunga luche ngirikon.

¹⁸Eribokini akwap alo Taipanes, na abwangea ayong apolou a Misiri, tasalut ngikilinga lu inisar ngesi. Eburuchiarete ngidowon Misiri, tarata ngitunga keng ngirikon.

¹⁹Aloger kangolo, erirae ayong Misiri, toyeneta atamar arai ayong Ekapolon Akuj.”

²⁰Akolongit na ngakan-kaarei a elap alo ekingaren a ekaru alo a ngitomon ka epei a arikonot kosi, katolimok ayong Ekapolon Akuj akiroit tama,

²¹“Itwaan, abil ayong akan a ekapolon a Misiri. Emam itwaan aen tangalekinio, kori emam itwaan elogak auno torubea topedorea nabo akiting akwara.

²²Tokona bocha, abala ayong Ekapolon lo arai Ekapolon Akuj kona, kingolik a, anyoik ayong Parao ekapolon a Misiri. Abili ayong ngakan keng daang, naajokon ka nabilil, tachakun akwara anakan keng.

²³Apetakini ayong Ngimisiri lobukui, eala nakwapea daang.

²⁴Etogogongi ayong ngakan a ekapolon a Babilonia, ewaak akwara kang nakan keng. Nakaneni abili ayong ngakan a Parao, tokunuak ngesi loger a itwaan ani ewanan lokojokon.

²⁵Ee robo, etogogongi ayong ngakan a ekapolon a Babilon, sodi etapalagag na Parao, toyeneta kesi atamar arai ayong Ekapolon Akuj. Ani ewaakini ayong akwara kang nakan a ekapolon a Babilon idodiari ngesi akwara lowae a Misiri,

²⁶sodi atopeta ayong Ngimisiri lobukui kiealakin nakwapea daang, toyeneta atamar arai ayong Ekapolon Akuj.”