Read turkana Esekiel 31 Bible Online

Esekiel 31 - turkana bible

Esekiel 31

¹Akolongit na ekingaren a elap alo a nguuni, a ekaru alo a ngitomon ka epei a arikonot kosi, katolimok ayong Ekapolon Akuj akiroit tama,

²“Itwaan tolimok Parao lo erai ekapolon a Misiri ka ngitunga keng daang kona: Ngae ikwaanatar iyong anapolou kon?

³Kesikwaani ka[24] echekereng alo Lebanon, loajokon a ngaten tomutono, enangit aita keng lodowon.[25]

⁴Kitikilikiluut ngakipi ngesi, kitooyata ngakipi na ngalup ngesi. Tobukoe neni ngakipi toleleasi ngakipi lokito luche a amoni.

⁵Kotere ngakipi nakaalak abukio, tooyar ngesi noi kilany ngikito luche a amoni. Tooyaketa ngaten keng talangiriro.

⁶Ngikieny lu eporito daang, toduko ngakais kech naten keng. Toureta ngitieng a moding alokwap ngaten keng. Kiangasi ngibukui daang alotorube keng.

⁷Ebus ekitoe ngolo lokojokon! Aoyak ngaten keng, elijara ngaten na alokwap anangito nakipi na ngalup.

⁸ Amam ngichekereng lua amana a Akuj lu ekwaanatar ekitoe ngolo. Emam ngimeyana lu ayakasi ngaten na ekote nguna. Emam ngitelitei lu amutoko loger a ekitoe kangolo. Amam ngikito a amana a Akuj lu ajokak loger keng.

⁹Esubus ayong ngesi atopeta ngaten. Ngesi eterekuyarit ngikito daang alomana a Akuj ana enyaritae Eden.

¹⁰“Tokona bocha, kalimokini ayong Ekapolon lo arai Ekapolon Akuj iyong ngakiro na esubakinosi alokitoe alo aoyaar tanang lodowon. Na aoyaaror ngesi, abu etau keng kinisakin kotere aoyau keng.

¹¹Kotere nguna, anger ayong ngesi, epotori ayong ngesi lokapolon a akwap anache, tosubakinea ngesi ekitoe ngolo nguna itemem ka aronis keng.

¹²Ngitunga a akwap anache, lukamoitanak noi akidwang ngibukui daang, etuborete ngesi tachakakis neni. Erarakin ngaten keng lomoru daang ka ngadipoe. Epetakin ngatoroma keng na ebilibilitae nangololin daang. Ialarosi ngitunga a akwap daang alotorube keng torotokis.

¹³Epote ngikieny todoto naten keng na aukor, kipudata ngitieng a moding ngaten keng.

¹⁴Ngesi atamar emam ekitoe nabo eoyaar tanang lodowon tani kemasi ngakipi nakaalak. Eraakasi daang ngikatoak loger a ngitunga. Eraakasi daang ngikalotok lokatoak.”

¹⁵Ebala Ekapolon lo erai Ekapolon Akuj kona, “Akolongit na elomarea ekitoe lokatoak, etuburuchiari ayong ngakipi na lotooma ngalup, kidodiu ibore ngini akigoro. Agoli ayong ngangololin eratak ngakipi nakaalak nyeeleleut. Ayauni ayong aribu lomoru a Lebanon sodi etooniyo ngikito a amoni daang.

¹⁶Na ayaarea ayong ngesi lokatoak, itamaranikini erue lo eukoror ngesi ngibukui. Ngikito a Eden daang ka ngikito luajokak daang ta ngikito lu etamas ngakipi nakaalak daang lukolong alomasi nalup, elakarosi na eukoror ekitoe ngolo.

¹⁷Irukorete kesi dang ka ngesi lokatoak, ni eyakasi lukolong aario a akwara. Daang lu elomito lotorube keng, epetarosi lobukui.

¹⁸“Ngae tokona ikwaanatar iyong anapolou ka ekipur, alotooma ngikito a Eden? Kiukorio iyong ka ngikito a Eden toloto lokatoak, kiruko ka lu nyilipito Akuj ta lu aari akwara. “Erai ngolo Parao ka ngitunga keng daang. Ayong Ekapolon lo arai Ekapolon Akuj alimu nguna.”