Read turkana Esekiel 32 Bible Online

Esekiel 32 - turkana bible

Esekiel 32

¹Akolongit na ekingaren a elap alo a ngitomon ka ngiarei a ekaru alo a ngitomon ka ngiarei a arikonot kosi, kesuruor ayong Ekapolon Akuj tama,

²“Itwaan, kiloik Parao ekapolon a Misiri tolimok kona: Ibala iyong irai engatuny alokiding ngibukui, tarai bo ikoni iyong akinyang ananamea. Ipungunun iyong anangololin kon, kicholiak ngakipi a ngakejen kon, kitongorean ngangololin.

³Abala ayong Ekapolon Akuj Namerikanyer, kawatakini iyong epuute na echunakinotor ngitunga lukaalak kiriut kesi iyong lokwaas a anam.

⁴Kemasakini ayong iyong nalup, kemasakini ayong iyong naro, etodo ngikieny kidiama kon, kitanyam iyong ngibuin.

⁵Apetakini akiring kon lomoru eleleb ngadipoe daang ngawat nakatoak.

⁶Abukori ngaakot kon toleleasi lomoru, kilelebun nayana.

⁷ Nakamunyarea ayong iyong, arapi adis, etiribok ngikanyer. Emuki akolong a ngidowon toribok elap.

⁸Etudunge ayong ngakimea a adis daang, ani akwap etiribok chuch. Ayong Ekapolon lo arai Ekapolon Akuj alimu nguna.

⁹“Ichanakinosi ngitai a ngitunga alukaalak naketiliworea ayong iyong erikot[26] alokiding ngibukui, anakwapea ana nyeyena iyong nakanuan.

¹⁰Eteriangakini ayong ngibukui lukaalak a ngakiro kon. Ebuli ngikapolok nakengolikineta ayong ekeari akwara kang. Akolongit na iukoror iyong, emaranikinete kesi daang a ebuloi kotere akiyar kech.”

¹¹Alimoki Ekapolon lo erai Ekapolon Akuj ekapolon a Misiri kona, “Imasi iyong akwara a ekapolon a Babilonia.

¹²Eario ngitunga kon daang a ngakwaaras a ngibukui alukajwok, alu emoitaka akidwang ngibukui daang. Inyasunete kesi ibore daang ni inisar iyong, emunyarete ngitunga kon daang.

¹³Amunyari ngibaren kon daang alokwaas a ngakipi anakaalak. Nyeringa nabo jik akeju a itwaan icholumakini ngakipi nguna. Nyeringa nabo ngakejen a ngibaren ipudaate ngakipi nguna.

¹⁴Sodi etilii ayong ngakipi kech, toleleta ngangololin kech loger a akimiet. Ayong Ekapolon lo arai Ekapolon Akuj alimu nguna.

¹⁵Na etiliworea ayong Misiri alaireng, sodi atomunya ibore daang ni eyei nikeng, eyenunete atamar arai ayong Ekapolon Akuj.

¹⁶Eliwor eeos logo eka akigoro, lo eeokinete ngibukui igorotor akwap a Misiri ka ngitunga keng daang. Ayong Ekapolon lo arai Ekapolon Akuj alimu nguna.”

¹⁷Akolongit na ngatomon ka ngakan a elap alo ekingaren a ekaru alo a ngitomon ka ngiarei a arikonot kosi, kesuruor ayong Ekapolon Akuj tama,

¹⁸“Itwaan, kigor kotere ngitunga a Misiri daang. Toruja kesi nakwap na a ngikatoak aapei ka ngibukui luche lu eyenikinitae toloto ni eyakasi lu alomasi nakipany.

¹⁹Tolimok kona, ‘Ngae idwangito esi anakibuseanu? Kapesi lokatoak kiruko ka lu nyilipito Akuj.’

²⁰“Etoakete ngitunga a Misiri ka ngulu eario a akwara. Eari akwara kesi daang.

²¹Elimunete ngikarikok a ngajorei ka ngikengarakinak kech alokatoak tamasi, ‘Apot nege lu nyilipito Akuj, aario a akwara, eperete!’

²²“Achuru yaga, iriamito ngalielin a ngasigerea keng. Aario daang a akwara.

²³Etiyaara ngalielin kech kwap noi alokatoak. Aario ngasigerea a Achuru daang a akwara. Iriamito ngalielin kech aliel keng. Tarai kolong eringa eyarete etubulito ngitunga lu ayarete.

²⁴“Elam yaga, iriamito ngalielin a ngasigerea keng. Aario daang a akwara. Atiyaarosi kesi lokatoak peeyenete Akuj. Kolong eyarete, etubulito ngitunga. Nyelu tokona atoaka eruma ngileech ka ngikatoak luche aapei.

²⁵Eperi Elam alokiding ngulu aario, iriamito ngalielin a ngasigerea keng ngesi. Nyeyenete kesi daang Akuj. Aario daang a akwara. Kolong eyarete, etubulito ngitunga. Nyelu tokona atoaka eruma ngileech ka ngikatoak luche aapei. Eperete kesi ka lu aario.

²⁶“Mechek ka Tubal kui iriamito ngalielin a ngasigerea kech. Nyeyenete kesi daang Akuj. Aario daang a akwara. Tarai kolong eyarete, etubulito ngitunga.

²⁷Nyenuka kesi a arimatoi loger a ngikarikok a ngajorei alu kolong ngorok, alu kolong alomarete lokatoak ka ngiboro kech a ejie, icholongito ngakwaaras kech kimukokina ngaupwala kech. Ajwoko kolong ngikarikok ngulu etubulito ngitunga.

²⁸“Emunyario Ngimisiri a akwara loger ngolo, topero alokiding ngitunga lu nyeyenete Akuj.

²⁹“Edom yaga ka ngikapolok keng ta ngikatukok. Ajwoko kolong kesi nakaneni eperete tokona ka lu erikari akwara ngitunga lu nyeyenete Akuj, lu alomasi nakipany.

³⁰“Ngikatukok lua lokwap daang, eyakasi neni aapei ka Ngisidon. Etubulit kolong ajwonu kech ngitunga nakaneni aar tokona ngitunga lu nyeyenete Akuj ngulu a akwara. Eruma ngileech ka ngulu alomasi nakipany.

³¹“Na ingolikinea Parao ngitunga lu aario a akwara ngulu daang, ikilakinosi ngesi ka ngasigerea keng. Ayong Ekapolon lo arai Ekapolon Akuj alimu nguna.

³²“Alemuni kolong ayong Parao kitubul ngitunga lu eyarete, nakaneni eario ngesi ka ngasigerea keng daang kiruko ka lu nyeyenete Akuj lu aario a akwara. Ayong Ekapolon lo arai Ekapolon Akuj alimu nguna.”