Read turkana Esekiel 34 Bible Online

Esekiel 34 - turkana bible

Esekiel 34

¹Katolimok Ekapolon Akuj ayong akiroit tama,

²“Itwaan, todwar naaronok ani a ngikeyokok[28] a Isirael. Todwar tolimok atamar abala ayong Ekapolon lo arai Ekapolon Akuj kesi kona: Etige ngikeyokok a Isirael! Itanasi esi make a? Ikwa meere ngamesekin ejoikinit esi itanete a?

³Inyamete esi akidietet, tanapa ngiworui lua ngajul a ngamesekin, tongola ngimesekin lukanakunak tanyama. Tarai nyitanete esi ngamesekin.

⁴Nyiitogogongo esi lupalag, nyitangalekino esi lu edeakasi, nyeena esi lu ebilil, nyebuuna esi lu ewoliyorito, nyesakara esi lu echakara. Pearai ipolokinito esi kesi a amoitanut ka akichiakiarit.

⁵Kotere nguna, apot kesi topetaros ani amamakar ekeyokon. Toliworos kesi ngamuja a ngitieng a moding kadaang.

⁶ Sodi topetakin ngamesekin kang lomukur lukooyak ka ngimoru. Ee robo, topetakinos akwap wadaang, nakaneni emam itwaan abu tasaka kesi kori kingitu.

⁷“Tokona bocha, esi ngikeyokok, kiirasi akiroit na alimunit ayong Ekapolon Akuj.

⁸Ekongi ayong Akuj na ayari atamar kona aliworotor ngamesekin kang akimuj a ngitieng a moding kadaang, ani emamakar ekeyokon, nabo nyesakara ngikeyokok kang ngamesekin kang, pearai etanasi ngikeyokok make, nyitana ngamesekin kang,

⁹tokona bocha, topupokisi esi ngikeyokok akiroit kang.

¹⁰Abala ayong Ekapolon lo arai Ekapolon Akuj kona: Kingolikisi anyoik ayong ngikeyokok. Alemari ayong ngamesekin kang anakan kech, tojongoto kesi araakau ngikeyokok kech. Nyeringa nabo ngikeyokok itanasi make. Ayuuni ayong ngamesekin kang anakituk kech, nyeeliworosi akimuj kech.”

¹¹Ebala Ekapolon lo erai Ekapolon Akuj kona, “Kingolikisi a, ayong ilope asakari ngamesekin kang etan.

¹²Loger lo esakarea ekeyokon ngamesekin keng na epetara sodi tochun wapei, eger lopei ngolo asakarea ayong dang nakang. Abuuni ayong kesi awadaang ani epetara, akolongit na imokomokakinitor adis toribokinite.

¹³Epuduni ayong kesi alobukui aluche, atochun anakwapea, sodi ayau kesi nakwap kech a ngikulepek. Eyoki ayong kesi alokidiama ngimoru a Isirael ka lokwaasea a ngileleae ta ngiwaitin lu elomito ngitunga.

¹⁴Esirajakini ayong kesi nginyia lukajokak. Kidiama ngimoru a Isirael ngesi eliwor achokor kech. Eurienikinosi kesi kidiama ngimukur a Isirael ni elibit, tadaka nginyia lukalibak.

¹⁵Ayong ilope aliwor ekeyokon a ngamesekin kang, atasakak kesi ni eurienikinosi. Ayong Ekapolon Akuj na arai Akuj alimu nguna.

¹⁶“Asakari ayong ngamesekin na echakara, atobuu na ewoliyorito, atoen na ebilil, etogogong na epalag. Ani na etumito ka na ngikilinga eyok.[29] Eyoki ayong kesi a erot alo eriyan.

¹⁷“Tokona bocha ngamesekin kang, abala ayong Ekapolon lo arai Ekapolon Akuj atiaki ibarasit ipei ka niche. Atiaki amesek ka amesek nache, atotiak ngamesekin ka ngaanei.

¹⁸Nyikiupeene esi adaka nginyia luajokak, eraakar mati kipudata tani nginyia luche a? Nyikiupeene esi akimat ngakipi nakaalimok, eraakar mati kitongorean ngakipi nache a?

¹⁹Mati ngamesekin kang nache kedaka nginyia lu ipudata esi ka ngakipi na itongorean esi a?

²⁰“Tokona bocha, alimu ayong Ekapolon lo arai Ekapolon Akuj atamar ayong ilope atubi ngakiro a ngamesekin ana etumito ka na erogo.

²¹Ijukarete esi kesi a ngisiepion ka ngisegeta sodi kigumo lupalag a ngaamwar, topetasi kesi.

²²Ayuuni ayong ngamesekin kang nyeeboliare nabo, sodi atotub ngakiro a amesek a apei ka nache.

²³Alemikini kesi ekeyokon epei, ngesi ekasuban etich kang Daudi, itani ngesi kesi toliwor ekeyokon kech.

²⁴Ayong Ekapolon Akuj aliwor Akuj kech. Ekasuban etich kang Daudi eliwor ekapolon alokiding kech. Alimu ayong Ekapolon Akuj nguna.

²⁵ Emini ayong ka kesi achamunet a ekisil ka akitwarakin ngitieng a moding anakwap, sodi kiboikinotor ngamesekin kang naroatin akaalimon nabo topero namon.

²⁶“Apiari ayong kesi emiek toloma lokwaasea a emoru kang alo italeuno. Etetepi ayong akiru ngirwa lu esakitere. Eyauni akiru ngina apiaro.

²⁷Ekokete ngikito a ageor, ebwangete ngamanat sodi tolom itwaan daang nakwap keng akaalimon. Na angedea ayong ngiriko lu eenitere ngitunga kang, atalachak kesi alotunga alu kolong arikete kesi tarata ngikedalak, ngesi eyeneta kesi atamar arai ayong Ekapolon Akuj.

²⁸Nyeringa nabo ngibukui luche edemarete kesi ebari, kori nyeringa nabo ngitieng a moding enyamete kesi. Iboikinosi kesi akaalimon. Emam itwaan itoemi kesi.

²⁹Ainakini ayong kesi ngamanat naajokak a ngalup, tasalu akoro anakwap. Nyeringa nabo ngibukui luche ekianatar kesi.

³⁰Toyena kesi daang atamar ayong Ekapolon Akuj na arai Akuj kech kirukit ka kesi, nabo eraakasi kesi Ngisirael ngitunga kang. Ayong Ekapolon lo arai Ekapolon Akuj alimu nguna.

³¹“Iraakasi esi ngamesekin kang naketani ayong, arai ayong Akuj kus. Ayong Ekapolon lo arai Ekapolon Akuj alimu nguna.”