Read turkana Esekiel 35 Bible Online

Esekiel 35 - turkana bible

Esekiel 35

¹Katolimok Ekapolon Akuj ayong tama,

²“Itwaan, todwar ngakiro naaronok ani a Edom.

³Tolimok ngitunga a emoru kangolo ngakiro na alimu ayong Ekapolon lo arai Ekapolon Akuj abala: Ee emoru a Edom, kanyoik ayong iyong! Ketiliwori ayong iyong alaireng.

⁴Enyasuni ayong ngirerea kon, etiliwo akwap alaireng. Toyenea atamar arai ayong Ekapolon Akuj.

⁵“Irai kolong iyong emoit a Isirael, dio kimiek kesi emunyario a akwara ngirwa lu ayakatar lochan, ngirwa lua eriras kech alo esal.

⁶Tokona bocha, ekongi ayong Ekapolon lo arai Ekapolon Akuj, na ayari atamar idarit iyong abukoro ngaakot, kirisete iyong ngaakot, kainyo isechit iyong ani ibukorea ngaakot, kikudete iyong ngaakot.

⁷Etiliwori ayong akwap na ngimukur a Edom alaireng atomunya itwaan daang ni itori neni.

⁸Aburuchiari ayong ngimoru a ngawat a ngitunga alu aario, sodi toburuchiasi ngawat alu eario a akwara ngimukur, ka ngadipoe ta ngangololin.

⁹Ketiliwori ayong iyong alaireng jik, emam nabo itwaan elomi lorerea kon. Toyenea atamar ayong arai Ekapolon Akuj.

¹⁰“Kona kolong ilimunio iyong tama, ‘Eliworosi Yuda ka Isirael ta ngakwapea kech ngikang, alemari ayong,’ tarai ayong Ekapolon Akuj arai Akuj kech,

¹¹ekongi tokona ayong Ekapolon lo arai Ekapolon Akuj, na ayari atamar kasubakinea ayong iyong itemem ka angoit kon ka etereku ta eger lo iremitor iyong ngitunga kang. Eyenunete kesi atamar kerirae ayong iyong kotere ngakiro nakolong isubea iyong kesi.

¹²Toyenea iyong atamar keira ayong Ekapolon Akuj iyong ilimuni kotere ngimeny tama, ‘Aliwor Isirael alaireng kiisikinere sua atomunyasi.’

¹³Eira ayong eger lo iwogar iyong kiruoror ayong niaronon.”

¹⁴Ebala Ekapolon arai Ekapolon Akuj kona, “Ketiliwori ayong iyong alaireng kichurok akwap daang kotere aukor kon,

¹⁵ loger lokolong ichuror iyong na enyasunere Isirael na erai akang. Eliworosi ngimoru a Seir alaireng, ee robo, eliwor akwap a Edom daang alaireng. Toyeneta ngitunga daang atamar ayong arai Ekapolon Akuj.”