Read turkana Esekiel 36 Bible Online

Esekiel 36 - turkana bible

Esekiel 36

¹Tolim Ekapolon Akuj tama, “Itwaan, todwar ani a ngimoru a Isirael tolimok kiirasi akiroit kang.

²Abala ayong Ekapolon arai Ekapolon Akuj kona: Echuruno kolong ngimoe a Isirael niti ebalasi, ‘Aa, arata tokona ngimoru lungorok ngul ngiyok!’

³“Todwar robo, tolimo ngakiro na alimu ayong Ekapolon lo arai Ekapolon Akuj. Nakolong alemareta ngibukui lukidunyet ngimoru a Isirael, tokokoa ebari kech, apot kesi daang kiyenya Isirael.

⁴Tokona bocha, ngimoru a Isirael, kiirasi akiroit a Ekapolon alo erai Ekapolon Akuj, nakilimokinit esi ngimoru ka ngimukur, ngayana ka ngadipoe, ta ngirerea lukasilok, esi ngalairengea, lu angatareta ngibukui lu idunyatar ngiboro ani erumor kitokianatar.

⁵“Eruorik ayong Ekapolon lo arai Ekapolon Akuj a angoit kang anakariran alobukui aluche ka Edom daang, lu echurunosi alemar ngiboro kang a etereku kech ka ngimeny, tolemasi akwap kang toliwor achokor kech, tangatasi kesi ebari a akwap kang.

⁶“Kasio todwar ngakiro a akwap a Isirael sodi tolimok ngimoru ka ngimukur, ngayana ka ngadipoe atamar abala ayong Ekapolon lo arai Ekapolon Akuj kona: Kingolik a, eruoro kotere etereku lokariran anyunyurar ayong ani esurumeta ngibukui kesi ngileech.

⁷Ekongi bocha tokona ayong Ekapolon lo arai Ekapolon Akuj abala irumete ngileech ngibukui lukidunyet kus daang.

⁸Nakaneni ani eliwor esi ngimoru a Isirael, erupunete ngakui alokito toureta ageor kotere ngitunga kang Ngisirael, kainyo aapuu kesi abongun nawi.

⁹Kingolikisi a, ebakit ayong alowae kus, areeun ayong nikus. Echilio ngalup kus kitakinae ngikinyam.

¹⁰Etalalae ayong ngitunga kus Ngisirael noi. Elomio ngawiyei a Ngisirael daang, ka ngirerea kus, tobongokinoe akiduk ngiwaitin lu inyasuna.

¹¹Etalalae ayong ngitunga kus ka ngibaren. Elomete ngitunga nikus loger lokolong sek alomitotor. Kasubea naajokak akidwang nakolong a ekingaren. Toyeneta esi atamar arai ayong Ekapolon Akuj.

¹²Ee robo, arikuni ayong ngitunga kang Ngisirael nikon. Toloma kesi nikon. Iliwor iyong akwap kech, nyilakakini iyong nabo ngide kech eriyori erogo.

¹³“Abala ayong Ekapolon lo arai Ekapolon Akuj kona: Akwap, kona ebalatar ngitunga kisuruorete iyong, ‘Inyami iyong ngitunga nabo idemi iyong ngitunga kon ngide’,

¹⁴nyeringa nabo iyong inyami ngitunga kori idemari ngitunga kon ngide, alimu ayong Ekapolon lo arai Ekapolon Akuj.

¹⁵Nyeringa iyong nabo iirari ngibukui kiyenyete iyong kori kikianatar. Itubori iyong akidem ngitunga ngide. Alimu ayong Ekapolon lo arai Ekapolon Akuj.”

¹⁶Katolimok ayong Ekapolon Akuj akiroit tama,

¹⁷“Itwaan, nakolong ebooyoto Ngisirael anakwap kech, apot kesi kitiliwosi akwap na nyitaleuno kotere eboyor kech ka ngakiro na asubete. Ekoni elote kech anakonyen kang elos a aberu ngirwa lu eyakar lolap.[30]

¹⁸Kotere nguna, abu ayong atobukok kesi anyunyura kang kotere ngitunga lu aarete kesi anakwap ka ngakujo nasubuna na elipito kesi kitiliworeta akwap na nyitaleuno.

¹⁹Atopeta ayong kesi lobukui kiealakin nakwapea. Erira ayong kesi itemem ka elote kech ta ngakiro na asubete.

²⁰Na apetakinotor kesi lobukui, apot yaut ngileech lokiro kang lo italeuno, toliwor ngitunga ebalasi, ‘Abe ngitunga a Ekapolon Akuj lugu, tarai etiisikin akwap keng!’

²¹Kechan ayong ngakiro nguna kotere ekiro kang lo italeuno lo esurumete Ngisirael ngileech awadaang anicha aloose.

²²“Tokona bocha, tolimok Ngisirael atamar abala ayong Ekapolon lo arai Ekapolon Akuj kona: Ee Ngisirael, meere kotere esi asakea ayong asubakin ngakiro na edikino asubakini. Erai kotere ekiro kang lo italeuno, lo isuruma esi ngileech anakwapea kadaang ana iloose.

²³Ani edodikini ayong ngibukui akitaleuno a ekiro kang aloapolon, ekiro lokolong isurumete esi ngileech alokiding ngibukui, eyenunete ngibukui atamar arai ayong Ekapolon Akuj. Alimu ayong Ekapolon lo arai Ekapolon Akuj. Etoruni ayong nikus edodikinea kesi atamar etaleuno ayong.

²⁴Kalemuni ayong esi alobukui katochun anakwapea kadaang kayau nakwap na erai akus a ngikulepek.

²⁵Kawatakini ayong esi ngakipi naasegak, kitaleunos anakujo kus anasubuna ka ibore daang ni kitiliwo esi lu nyitaleuno.

²⁶Kainakini ayong esi etau lokitetet ka ngitamen lukiteat. Alemari anikus etau ikoni amoru ewaak etau lo erai akiring.

²⁷Ewaakini ayong etau kang nikus kitorik esi kiwapeta ngitalio kang ka ngakiro na adunguni ayong.

²⁸Sodi toloma nakwap nakolong ainakini ayong taapaakus. Iliworosi esi ngitunga kang atoliwor ayong Akuj kus.

²⁹Kayuuni ayong esi anibore kadaang ani kitiliwori esi lu nyitaleuno. Adungokini ayong ngikinyam talalaketa sodi nyeeminio nabo eron a akoro.

³⁰Etalalae ayong ageor a ngikito ka ngalemet a ngamanat, sodi nyeeminio nabo eron a akoro lo kisurumi esi ngileech alokiding ngibukui.

³¹Itamunete esi elote kus loaronon ka ngakiro naaronok nakolong isubete esi sodi takadanakinos make kotere ngasechesea kus ka aronis.

³² Isirael, nyasubi ayong nugu daang kotere esi. Toyena nguna. Asaki esi kiruma ngileech ka etimoi kotere ngakiro na isubete esi. Alimu ayong Ekapolon lo arai Ekapolon Akuj.”

³³Ebala Ekapolon lo erai Ekapolon Akuj kona, “Akolongit naketaleunio ayong esi anasechesea kus kadaang, kemiekini esi toloma lorerea kus nabo, kemiek tobongokis akiduk ngirerea lukolong enyasunio.

³⁴Akwap nakolong arai alaireng itakinio tojongo araakau alaireng anakonyen a ngitunga kadaang alu itoreenete neni.

³⁵Etamarete kesi, ‘Akwap nakolong arai alaireng naga ekwaanikin ka amana a Eden! Ngirerea lukolong enyasunio tarata alaireng lugu kelom keduk ngawasea!’

³⁶Sodi toyena ngibukui lukidunyet lu idongito atamar ayong Ekapolon Akuj abongonokini akiduk ngirerea lukolong enyasunio, nabo abongonokini akitakin akwap nakolong arai alaireng. Alimu ayong Ekapolon Akuj nguna.”

³⁷Ebala Ekapolon Ekapolon lo erai Ekapolon Akuj kona, “Apupokini ayong nabo ngakiro nakemaimaeta Ngisirael, atosubakinea kesi ngakiro nugu, etalalae ayong kesi loger a ngisipaan a ngamesekin.

³⁸Ngirerea lu tokona inyasunitae, ilelebunosi ngitunga loger lokolong elelebakatar ngamesekin na epeyeo a ngisukukui, elelebakatar Yerusalem. Sodi toyena kesi atamar arai ayong Ekapolon Akuj.”